Read berom Yirmiya 6 Bible Online

Yirmiya 6 - berom bible

Yirmiya 6

¹“À yin BeBɛnyamin, tele hin vɔk e kwɔn dal yi e tê Yɛrusalɛm. Pɛl in durum e Tekowa, na yin tɛ̀ sekyeng pyɛ dura e Bet-Hakɛrɛm. Rezot re lulum e rwa bato, na gbɔng gawey arɔng.

²Ma ga tyɛngrɛ Siyɔn na kwɔn sehwey de ha dal mwa na nerat.

³Belek na kara vyēl mɛn bê vey hwo e ra kwɔn o, yɛn ê tɛ̀ bǔk mɛn bē gwɔrɔ mɛ hɛ, kawɛ e ji mɛn ê ye ngyɔk e dem de a simo.

⁴Yong in yaga como e ra hɛ, sogo hin na wot a hwo hɛ e tê-gwi! Gawey e ra wot, gwi gwa ga wɔ̂ wɔ, ko necam nahywegelek na sé gwɛ̌ tɛ́ ɛn nelis.

⁵Sogo hin, na wot a hwo hɛ naturuk, na wot a wey na nelɔ begwɔ̀m mɛn!”

⁶Dagwi Darwey, Da Jey Mwa, a ye: “Tow in batin cɔ́gɔt hɛ! Yong in pyɛ gang jwa gbɔng repomo Yɛrusalɛm. E hɛ de wot ê tabak, bé mɔt bemat zɔng e ji hɛ.

⁷Sede remo de hwes gwo gyeng nshî gwɛ naka, ano de Yɛrusalɛm wo gyenges neves wɛ arɔng. Be wokos reha yol na wey na pyɛ́ e ji hɛ, nerɔ na baram ba sé e ji hɛ kayɛ jeng.

⁸À bemat Yɛrusalɛm, wok in túsa, ka ano wɛt mê kyini hin, me tɛ̀ pomo mó he tɛ́ ɛ gbingiring, dem de vit a mwat de ê sangal ɛ.”

⁹Dagwi Darwey, Da Jey Mwa a ye: “Kyě jama hin bagbat BeIsrayɛl sede remo de be jama bagbat nèy anap. Rá sede mwat vos nèy anap de e to raa na vɔ mɛ, nelang de a ga kana vos.

¹⁰Mê ha na me tusa beva na yɛn a bin wok ɛ? Di betong mɛn ba sé rip, yɛn e tɔk wet vɛ wɛt. Hâ Dagwi Darwey ha sé a yɛn pyɛ byɛs, yɛn e wok nerat hɛ wɛt.

¹¹Yey hom ya sila na shom Dagwi Darwey, ko me tɔk re nuyel na vɔk yɛ wɛt. Shusha yɛ e ra nèy e nehyok, na e ra netula bewen arɔng. Bê hashe beras na beha, mwa na bemakuk kpushuk.

¹²Bê nɔng bemat behak nelɔ mɛn, hiri mɛn tanga beha mɛn arɔng. Mê nára vwɔ̂ tabak hom e ra bemat vwel o. Me Dagwi Darwey ma ha ano.

¹³Yi e swɛl o vɔk e rwey o mɛn, kawɛ e ji mɛn a vɔk cwey pyɔlɔ vyes. Yi na zarap, vɔk na piris, kawɛ e ji mɛn e vɛ́sɛ bɔs.

¹⁴Yɛn e rɔgɔs baram bemat hom yɛt wɛt, be tē, ‘Netyang, kayɛ pyɛ ya sé tyang’, ko vit a pyɛ de ya sé tyang.

¹⁵Yɛn a ra pyɛ̂ rekyen, yɛn a ra pyɛ̂ byɛm-byɛm, ko mwa ano, yɛn a vo rekyen wɛt, yɛn a wok neves râ pyɛ̂ byɛm-byɛm wɛt. Yaga ano, yɛn ê gabsa sede vemo de ba ga gabsa arɔng, e jeng de mê tabak hɛn, ko yɛn ê gabsa e jey arɔng. Me Dagwi Darwey ma ha ano.”

¹⁶Dagwi Darwey a ye ngan: “Tumal hin e gasang gwong na yin bɛrɛng, ko yin rangal gwong roso, e dem de gwa kwey ɛ, ko yin raa gwɛ, na yin a sɛ̀ a begabik min pɔngɔ. Ko yɛn a ye: Wot ê raa gwɛ wɛt.

¹⁷Ano arɔng, ma tɛ̀ a yin vê bɛrɛng nekanang. Tē in naka na wûs durum! Ko yɛn a ye: Wot ê tē naka wɛt.

¹⁸Yaga ano, wok in, à yin yére bemat jey, na yin a tɔk, à yin regyɛng bemat, pyɛ de yê té na yɛn.

¹⁹À bemat jey, wok in, ma sé kyè wɔ vey na gawey e ra bemat, sede pyɔlɔ begwong beves de yɛn a yongos, yaga yɛn a tɛ̀ tong na neha hom wɛt, ko e ra reha Badu hom, yɛn a ga ye zak à vɛ.

²⁰Nerat sɛ́ de pyɛ̂ nesang hyɔɔlɔl de be yis mɛ e Sheba na vɔk a me, kɛ pyɛ̂ nesang nerat yi e vwel yikyik ɛ? Me sey nɔrɔ yas de yin e rangas wɛt, kɛ nenɔrɔ de yin e nása, nɛ́ pɛngɛ a me yey wɛt.”

²¹Yaga ano, Dagwi Darwey a ye: “Di, ma sé tɛ̀ e nuyel bemat vemo pyɛ tiris bol de yɛn a tiris ɛ bol, beda na nèy e dem o, mwat vwara na sa mɛ bê wey.”

²²Dagwi Darwey a ye: “Di, bemat ba sé kyè vey yi e vwel rwa bato, yere bemat jey ryey de ya sé yikyik ya sé yóng ɛ yaga tô como.

²³Yɛn a ga hashe begbang na bebara, yɛn a sé beves sizɔng, vit a nemwishish, lulum mɛn ha sé sede hê gworep. Yɛn e tele e ra bedwa, na yɔ̀m bemat como vɔk e de como e ra yin bemat Siyɔn!

²⁴Wot a ga wok reha mɛn, ko vɔ mot ba ga tɛ́ ɛn gbɛrɛk, wot e ririm na rezot, na nepep yere ne hwâ tɔ.

²⁵Hwo kwon kyè wɔ e hey, kɛ hwo kyè e gwong wɛt, yaga wal wò repugu mo wo tē bwerep, ba ga tɛ̀ a wot bengyip e kawɛ bak.”

²⁶Dagwi Darwey a yâng bemat mɛ, “Tɛ̀ in berugu sesin, na yin biring e fongol pwɛng, ra in sesin yere hê hwey hining zɔng, tosho hin sizɔng, yaga womo de e kyè vey wey na yin, ê hwo e ra yin pút.”

²⁷“À Yirmiya, ma ga tɛ̀ hwo sè mwat mára na wo yong bemat hom, yaga na hwo bin tɔk, na hwo mara begwong mɛn.

²⁸Yɛn a kú ɛn e de sogo nehywɛ, be kyě kyè na sedusa. Yɛn a sé gbarak sede dyam pama tanga dyam, mwa hɛn be ragas neves.

²⁹Begaruk mɛn be pɛsɛl kya mo na gap, kya mo he wey na dyam o, be re nuyel na rugut o zɔng-reng, yaga gbàrak dyam o wo nusu wɛt.

³⁰Bê tang ɛn a gbàrak dyam pyɛng, yaga Dagwi Darwey a ga ye zak a hɛn.”