Read berom Yirmiya 7 Bible Online

Yirmiya 7 - berom bible

Yirmiya 7

¹Dagwi Darwey a ha na Yirmiya a ye,

²“Ci wɔ̀ tumal e ruhup Gbɔng Duk Re Fongol Dagwi Darwey na hwo shara reha remo ngan, hwo ye, “Wok in reha Dagwi Darwey, à yin BeYuda, yin mwa de yin e yeles e rùhup vemo, na yin a re a Dagwi Darwey fongol.

³Dagwi Darwey, Da Jey Mwa, Dagwi Israyɛl a ye: Yong in begwong min na tomong min, ko mê tík in na yin a re nuyel na sangal e ngamo.

⁴Yin re nuyel wɛt na tɛ̂ gap min e ra neha bɔs nemo, na yin a tē, ‘Wot a sé sangal tyang! Gbɔng Duk Re Fongol Dagwi Darwey à womo, Gbɔng Duk Re Fongol Dagwi Darwey à womo, Gbɔng Duk Re Fongol Dagwi Darwey à womo!’ ”

⁵“Sege hin gwong sangal min gwô remo, na yin a tik râ pyɛ́ de yin a sé ra. Rá in a bemin pyɛ́ e gwong de gwa sé tsak o.

⁶Yin mɔt bemât yere dyuk, na nehyɛn tanga bekuma wɛt. Yin mɔbɔs bemat de ba ga ra pyɛ cak vyes wɛt e vwel hemo. Yin re a bedagwi beduk fongol wɛt, yaga ra ano hê wey na yin.

⁷Ka sede yin a sege begwong min o, ko mê tik in na yin a re nuyel na sangal e ngamo e vwel de ma kana nɔng bedabeda min na he sè benap min nesheneshey.

⁸“Di, yin a ga tɛ̀ gap min e ra neha bɔs.

⁹Yin e shigshi, yin e mɔbɔs bemat, yin e ragas nejwang, yin e sisa na bɔs, yin e nása nɔrɔ pyɛ̂ rangas vɔk na Baal, ko yin e re a bedagwi de yin a kana tɔk vɛ wɛt fongol.

¹⁰Yin e ra pyɛ́ yemo de ma kyɛ́ me yɛ, ko e bama mo, yin e vey tumal e nuyel hom, e Gbɔng Duk Re Fongol hom, ko yin e tē, ‘Wot a sé gyat!’ Yin a sé gyat na yin a ragas pyɛ́ vyes yemo a?

¹¹Yin e bare Gbɔng Duk Re Fongol hom wa sé kwɔn de begbik bê lɛsɛ hɛn ɛ a? Ma sé kyě bɛrɛng pyɛ́ de yin a sé ra.

¹²Ci in e Shilo, kwɔn hê mɛsɛng de ma kasa na be re a me ɛ fongol, na yin a wɔ̀ di pyɛ de ma ga ra a repomo mo, yaga banɛn de bemat hom BeIsrayɛl ba ra e hwomo.

¹³Yin a ga ra mwa yere banɛn vemo, ko mwa ano de ma ga ha na yin zang pyak, ko yin a kyɛ́ in nà wet betong na me. Yin e ka toyo a me, jeng de ma yila hin wɛt.

¹⁴Yaga ano, pyɛ de ma ra a Shilo, mê ra a Gbɔng Duk Re Fongol womo de be yila wɛ na reza hom, womo de yin a tɛ̀ gap min e ra wɛ, de ma kana nɔng in na bedabeda min arɔng.

¹⁵Mê ro in yi e bayis hom, tyɛng sede remo de ma ra a begwa min BeIsrayɛl.”

¹⁶Dagwi Darwey a ye, “À Yirmiya, hwo ra a bemat vemo won wɛt. Hwo tosho, kɛ hwo lolo me yaga yɛn wɛt, hwo shonong na me e ra yɛn wɛt, yaga mê wet betong na hwo wɛt.

¹⁷Hwà sé bɛrɛng pyɛ de yɛn a sé ra e bapomo Yuda na e nehyok Yɛrusalɛm wɛt a?

¹⁸Nèy mɛn ne jāma cɔ́gɔt, beda mɛn be pɛl kya na yɛ, ko beha mɛn be rigit nemuk na be halang mɛ̀ negat kpam-tuk rɔkrɔk yaga dagwi mɛn hwā de be yila hɛ à Gbɔng Gwɔ̀m Hwâ Lagwi. Yɛn e shusha a bedagwi o behak nɔrɔ nshi anap arɔng, yaga na yɛn a mǎ me mɛ.

¹⁹Ko e me de yɛn a sé mǎ bɛ̀? Wey, yɛn a sé mǎ bato mɛn, yɛn e tɛ̀sɛ a bato mɛn rekyen.

²⁰Yaga ano, me Darwey Dagwi Darwey, mê shusha shom hom vyes e ra Gbɔng Duk Re Fongol womo. Mê shusha yɛ e ra bemat, na e ra ngyāma rining o, mwa na e ra batin cɔ́gɔt tanga e ra pyɛ̂ hiri arɔng. Shom hom o yê sè sede kya de bê tɔk rimi hɛ wɛt.”

²¹Dagwi Darwey, Da Jey Mwa, Dagwi Israyɛl a ye: “Yas de yin e nása sede nɔrɔ rangas, na yemo de be nɔng in reto na yin a re banama mo. Ko di, à remo de gwa ga tɛ́ ɛ ano, re in yɛ̄ mwa zɔng hyów.

²²Ma nɔng bedabeda min nu e ra nɔrɔ pyɛ́ de be rangas, kɛ e ra nenɔrɔ nehak wɛt, jeng de ma pat ɛn e Misra.

²³Ko ma nɔng ɛn nu na yɛn a gyeng ha hom, yaga na me sè Dagwi mɛn, na yɛn a sè bemat hom arɔng. Ko ma ha a yɛn, na yɛn a sangal e gwong de ma kana nɔng ɛn nu, yaga na kayɛ pyɛ ye kyè a yɛn tyɛng.

²⁴Ko yɛn a gyeng ha hom wɛt, kɛ ba tɛ̀ nehywɛ mɛn e ra hɛ wɛt. Ko yɛn a ra kayɛ pyɛ de yey mɛn de ya sé gbarak, ko ya sé vyes, ya dura a yɛn e negya. Yɛn a gwɛ̌ ra pyɛ́ de ya sé vyes e to râ pyɛ́ ryat.

²⁵Yimo yi e tuk de bedabeda min bá nusu yi e sevwel Misra vey e yunung, ma ga dopse tomsal a yin na bemat fwom hom, bezarap hom.

²⁶Mwa ano, vit a mwat de a wet betong na ha hom, kɛ a tɛ̀ nehywɛ mɛ e ra hɛ. Yin a gwɛ̌ tɛ́ in gbarak, bemat sogo nehywɛ e ra bedabeda min.

²⁷“Ano, hwô ha a bemat hom neha nemo ko yɛn ê wet betong na hwo wɛt; hwô yila hɛn, ko yɛn ê toyo a hwo wɛt.

²⁸Hwô ha a yɛn wɔgɔ, yére bemat jey mɛn bé gyeng ha hom wɛt, me Dagwi Darwey, Dagwi mɛn, ko yɛn a masa pyɛ cak yi e tabak mɛn wɛt. Yɛn a to sey tsak o na me wɛt, ko bemat bé to wok hâ tsak o e nu mɛn wɛt.”

²⁹À bemat Yɛrusalɛm, tosho hin, yɛt in setot rato min na yin a bomos sɛ. Rá in lwɛlɛ sesin e ra berahwol, yaga me, Dagwi Darwey ma vɔk shom na yin, ma ga kyɛ́ mɛ bemat hom.

³⁰Dagwi Darwey a ye, “BeYuda ba ga ra pyɛ́ vyes e bayis hom. Yɛn a ga wɔ̀ tɛ̀ cī mɛn de me kyɛ́ me yɛ e Gbɔng Duk Re Fongol wo reza hom, ko yɛn a ga tɛ̀ wɛ ligis.

³¹Yɛn a ga lɔk gàgbang rangas yas de be tâng wɛ a Tɔfɛt e Nɛk Hinɔm, yaga na yɛn a bin nása ɛ nɔrɔ rangas nèy mɛn bewen na behwong e kya. Ma nɔng ɛn nu be ra ano wɛt — ma ka tɔk bare pyɛ yere yane wɛt.

³²Ano kwong, tē naka, jeng ya sé kyè vey de bemat bê to yila kwɔn o à Tɔfɛt kɛ Nɛk Hinɔm wɛt, ko bê tang hɛ a Nɛk Mɔbɔs Bemat, yaga yɛn a rɔda lɛsɛ bavin bemat e Tɔfɛt, sɛ̌ kwɔn o ha sila.

³³E bama mo, bavin bemat o bê tɛ́ ɛn pyɛ̂ re benon na ngyāma, ko vit à mwat de ê ro ɛ̀ yɛ.

³⁴Mê tɛ̀ be to wok lwɛ̄lɛ yey pyɛng na seshɛgɛsh e hwomo wɛt, kɛ be wok fwɔ̂ gwel na gwo was gwel e bapomo Yuda tanga e nehyok Yɛrusalɛm wɛt, yaga sevwel o sê tɛ́ ɛ barin.”