Read berom Yirmiya 8 Bible Online

Yirmiya 8 - berom bible

Yirmiya 8

¹Dagwi Darwey a ye, “E jeng yane, bê paa bekup begwɔ̀m Yuda na vɛ bemat nuyel mɛn, vɛ bepiris hom, na vɛ bezarap hom, tanga vɛ bemat Yɛrusalɛm yi e besak mɛn.

²Bê tɛnɛ vɛ e gwi, na e pwɛl tanga e mwa netangacɛn lagwi, pyɛ́ yemo de bemat o bá kana tɛ̀ yey na yɛ, ko yɛn á ra a yɛ fwom, yɛn á kana raa yɛ, bá kyese vos badu na yɛ, ko yɛn á re a yɛ fongol arɔng. Bê tula bekup o kɛ be rangas vɛ wɛt, ko bê nàra sede bagwɔt fongol e vwel.

³Ko yere bemat jey vyes, yemo de ya dal, ko yɛn a sé sangal e nekwɔn de ma ga shara hɛn vɔk ɛ, bê dal na simo be kushu e tô re nuyel na sangal beken. Me Dagwi Darwey, Da Jey Mwa ma ha ano.”

⁴“Hwô yang ɛn, Dagwi Darwey a ye ngan: Sede bemat be gaba, be to sogo wɛt a? Ka sede ba vuru gwong, be to ɛn wɛt a?

⁵Yaga sɛ́ de yin bemat hom yin a doyo yi na me, yin a nàra e de doyo yi na me ɛ? Yɛn a ga kaba kwɛlɛng na vɔ ba, yɛn a ga kyɛ́ ɛn nà toyo.

⁶Ma ga wet betong hywɛ, ko yɛn e ha tsak o wɛt. Vit à womo de e doyo yi e neves, e tē, ‘Ma ga ra sɛ́ ɛ!’ Kawɛ e ji mɛn a ga doyo e begwong mɛ, sede dwa de wo tele na yol wɔ̀ yel e ji como.

⁷Shwɛ́l de ye tele e lagwi ya tɔk jeng de ye toyo, ko bewǔtut, na nenon bakwɔk, tanga belarwat yɛn e gyeng jeng toyo mɛn, ko bemat hom ba tɔk Badu Dagwi Darwey wɛt.

⁸Yi e rɛ de yin e tē, ‘Wot a sé tsɛng-tsɛng, ko wot a tɔk Badu Dagwi Darwey ba sé na wot’, ko e ji ha min, bemat-jɛk ba ga segsa Badu mo na bɔs.

⁹Bê nɔng ve netsitsɛng rekyen, ê sè a yɛn yɔɔt, ko bê vos ɛn. A vemo de yɛn a ga kyɛ́ ɛn hâ Dagwi Darwey, ko e nɛ̌ netsitsɛng de yɛn a vɔk ɛ?

¹⁰Yaga ano, mê nɔng bemat beduk beha mɛn, ko hiri mɛn, na bemat de ba re ɛn e como. Yaga yi e swɛl vɔk e rwey o mɛn kawɛ e ji mɛn a vɔk cwey pyɔlɔ vyes. Yi e zarap, vɔk e piris, kawɛ e ji mɛn e vɛ́sɛ bɔs.

¹¹Yɛn e rɔgɔs baram bemat hom yɛt wɛt, be tē, ‘Netyang, kayɛ pyɛ ya sé tyang’, ko vit à pyɛ de ya sé tyang.

¹²Yɛn e ra pyɛ̂ rekyen, yɛn e ra pyɛ̂ byɛm-byɛm, ko mwa ano, yɛn e vo rekyen wɛt, yɛn dura vô rekyen wɛt. Yaga ano yɛn ê gabsa sede vemo de be gabsa e jeng de mê tabak hɛn, ko ê sè yɛnɛ mɛn à hane. Me Dagwi Darwey ma ha ano.

¹³Jeng de ma kana simo tula hɛn, ko yɛn á sè sede retin anap de ra tɔs wɛt, sede retin regwi de ra mara wɛt, berang o mwa ba ga ye nɔɔshɔsh, ko ma ga nɔ̂ng bemat beduk gwong na be sey ɛ vwel o. Me Dagwi Darwey ma ha ano.

¹⁴Bemat Yɛrusalɛm ba rangal ba ye: ‘Yaga sɛ́ de wot a sé sangal bɛs ɛ? Vey in, na wot wɔ̀ lɛrɛ hot e bapomo de ba gwɔrɔ vɛ, na wot a wey e hwomo, yaga Dagwi Darwey, Dagwi mot a ga gang ot na shɔt reku, ko a ga nɔng ot nshî nedɔm na wot a sɔ, yaga wot a ga ra a Dagwi Darwey banɛn.’

¹⁵Wot a jama sangal netyang, ko vit à nerat, wot a jama tɛ́ tyang ko vit, sɛ̌ bengyip zɔng!

¹⁶Be wokos pɛsɛl bawol bedwa mɛn e Dan, vwel o mwa he digis na tosho bedwa mɛn. Yɛn a ga vey wey na vwel o, na kayɛ pyɛ de ya sila hɛ̄, vê gbɔng repomo mo tanga ve sangal e ji rɛ.

¹⁷Di, ma sé hala begwɔ̄m e tē min, bègàbak de be tɔk ra hwal vɛ wɛt, ko bê roros hin. Me Dagwi Darwey ma ha ano.”

¹⁸Bê tɔk tɛ̀ lashe yey hom tyang wɛt. Yey hom ye royo mɛ̀.

¹⁹Wet in betong! Me wok sesin bemat hom e yɛnɛ vwel o mwa. “Dagwi Darwey a to sé e Siyɔn wɛt a? Gbɔng Gwɔ̀m Siyɔn a to sé e hwomo wɛt a?” Dagwi Darwey, Gbɔng Gwɔ̀m mɛn a toyo, a ye, “Yaga sɛ́ de yin a tɛ̀ me lashe yey yi na re a cī fongol, tanga yi na té guduruk a bedagwi bavwel baduk de ba sé yapyi ɛ?”

²⁰Nahywɛp na ga kwey, bwal gwa ga tala hɛ, ko ba ga sey neken mot wɛt.

²¹A remo de ba ga ngwɔgɔt bemat hom, mwa na me arɔng, ma sé ra sesin a sé a mɛ kpɔrɔk mwa.

²²Vit a hwal dyɛ̂ng yey e Gileyat a? Vit a vwoshon e hwomo a? Yaga sɛ́ kwong de ba ga tɔk tɛ̀ bemat hom tyang wɛt ɛ?