Read berom Yirmiya 9 Bible Online

Yirmiya 9 - berom bible

Yirmiya 9

¹“Káa, ka to hom ha sé hwes nshi, ko bayis hom ba sé jɔt nemwishil, na me tɔk tosho mɛ̀ nagwi na naturuk, yaga bemat hom ba ga mɔbɔs hɛn.

²Káa, ka ma yang sɛ̀, kwɔn sangal bekɛnɛt hey, kwɔn de mê lɛrɛ me ɛ̀ yi na bemat hom, na me kyè yi na yɛn. Mwa hɛn yɛn e ra pyɛ́ na tsak o wɛt, yɛn a sé regyɛng bemat rɛsɛl bemɛn.

³Yɛn a sé e yong ɛn kayɛ jeng na yɛn a há hâ bɔs. Be re negwɔm e ra vwel o na bɔs e tô tsak o. Bemat hom be ra neves e ra neves, ko yɛn a tɔk me wɛt. Me Dagwi Darwey ma ha ano.

⁴Kawɛ mwat e tē naka na wo vwara mɛ, ko hwak e tɔk tɛ̀ gap mɛ e ra gwa mɛ wɛt. Yaga kawɛ gwa, a sé mwat kwɛlɛng, ko kawɛ e ha ha ves e ra besa mɛ.

⁵Mwa hɛn be kwɛlɛng ve vwara mɛn, ko vit à womo de e ha tsak o. Yɛn a ga masa a balem mɛn vɛ́sɛ bɔs, yɛn e ragas banɛn, ko a sé a yɛn rè tosho gabɔk wɛt.

⁶Yɛn e ra pyɛ vyes cak e ra cak, hâ bɔs hak he raa hak! Yɛn a kyɛ́ ɛn nà tɔk me. Me Dagwi Darwey ma ha ano.”

⁷Yaga pyɛ́ yemo, Dagwi Darwey, Da Jey Mwa a ye: “Mê fung na me mara bemat hom, e sɛ́ kwong de mê ra na yɛn ɛ?

⁸Balem mɛn ba sé sede ket nedɔm neves, yɛn e ha hâ bɔs kayɛ jeng. Kawɛ e ha mɛɛsɛs na mwat vwara mɛ, ko e ji ha mwin, a sé tɛ̀sɛ a yɛ segun.

⁹Mê tabak hɛn yaga pyɛ́ yemo wɛt a? Mê tala yere bemat jey yemo pyɛ de yɛn a ra a me wɛt a? Me Dagwi Darwey ma ha ano.

¹⁰Ma ye: Mê tosho me dak sekun yaga beraku, mê tosho yaga nekwɔn gyeng yas e hey nà ga hworok, na ga tɛ́ ɛn vit a nerat nehak, be to wok sesin berɔndɔng wɛt. Benon mwa na ngyāma ya ga tele, ya ga kyè arɔng.

¹¹Me Dagwi Darwey ma ye: Mê tɛ̀ Yɛrusalɛm wo tɛ́ ɛ gwɔt barin, kwɔn sangal nevu-hey. Mê tɛ̀ bapomo Yuda be tɛ́ ɛn barin, kwɔn de vit à mwat.”

¹²E wa de a vɔk netsitsɛng yɛ́t na a tɔk pyɛ́ yemo ɛ? E wa de Dagwi Darwey a ga basa a yɛ, na a tɔk misang pyɛ́ yemo ɛ? Yaga sɛ́ de ba ga lashe vwel o, be hala hɛ hal sede hey gbingiring de vit a mwat de ê tɔk kyè e hɛ ɛ?

¹³Dagwi Darwey a ye, “A sé yaga yɛn a ga wuba Badu hom de ma nɔng ɛn. Yɛn a ga gyeng ha hom, kɛ be raa Badu hom wɛt.

¹⁴Yɛn a ga raa negbarak neyey mɛn, yɛn a raa Baal, sede remo de beda mɛn bá kana masa a yɛn.”

¹⁵Yaga ano, pyɛ de Dagwi Darwey, Da Jey Mwa, Dagwi Israyɛl a ye a yemo, “Di, mê tɛ̀ bemat vemo be re pyɛ́ de ya sé kpashak, na yɛn a sɔ nshi de na vɔk nedɔm arɔng.

¹⁶Mê shara hɛn e ji yére bemat jey de yɛn, kɛ beda mɛn bá tɔk yɛ wɛt, ko mê tɛ̀ bemat como be ro ɛn, sɛ̌ ma wey na yɛn mwa hywiri.”

¹⁷Dagwi Darwey, Da Jey Mwa a ye, “Bare hin na pyɛ́ de ya sé té! Yila hin beha de be ra sesin na yɛn a vey. Yila hin vê lɛlɛ sesîn vemo de ba ga kushu.”

¹⁸Bemat o ba ye, “Yang in hɛn be ra a wot lwɛlɛ sesin dey-dey, sɛ̌ bayis mot ba sila na nemwishil, ko bekwôk bayis mot ba tɛ́ ɛn varak na sesin.”

¹⁹Wet in betong na rewɔng sesin e Siyɔn, be tē, “Wot a ga wey! Ba ga tɛ̀ a wot rekyen tyɔng wɛt! Ba ga ro ot e vwel o, ba ga gangas nelɔ mot.”

²⁰Ko ma ye: “À yin beha, wet in betong na Dagwi Darwey, na yin a tɛ̀ nehywɛ min e ra neha mɛ. Masa hin a nèy behwong min sesin, na yin a masa a bemat vwara min râ lwɛlɛ sesin arɔng.

²¹Reku ra ga tut, ra yel e bapɔk nelɔ mot, ra ga yel e nelɔ begwɔ̀m mot arɔng. Ra ga mɔbɔs nèy e nehyok, na bebot bemat e nekwɔn rɛsɛl pyɛ́.”

²²Dagwi Darwey a ye, me ha ngan: “Bavin bemat ba kyě shara hɛn kagwa, sede bagwɔt yǔk e hiri, sede pyɛ́ de bemat bwal ba yɛt, be kyě bomos kpɛɛ vit a mwât tula mo.”

²³Dagwi Darwey a ye: “Bemat netsitsɛng be dak kaa na netsitsɛng mɛn o wɛt, kɛ vê gap na gap mɛn, kɛ bedaberey na yas mɛn wɛt!

²⁴Ko tik womo de e simo a ra kaa, a ra hɛ ngan, yaga a tɔk me, ko a tɔk begwong hom, me dura tsak tɛ̂ yey, me gas badu e tē, ko me ra pyɛ́ na necik e vwel o, yɛ̄ à yemo de ye pɛngɛ a me yey. Me Dagwi Darwey ma ha ano.”

²⁵Dagwi Darwey a ye, “Jeng ye kyè vey de mê tabak vemo de be kyese e cwɛl e rebek zɔng.

²⁶Yɛn vɛ a BeMisra na BeYuda, na BeƐdɔm, na BeAmɔn, na BeMowap tanga bemat hey gbingiring de be yɛt setot rato mɛn bit o. Mwa bemat vemo be kyese e cwɛl, ko mwa ano, be wɔ́ a yɛn e cwɛl e neyey mɛn wɛt. Ko BeIsrayɛl arɔng ba ga wɔ́ a yɛn e cwɛl e neyey mɛn wɛt.”