Read berom Lɛlɛ Sesin 1 Bible Online

Lɛlɛ Sesin 1 - berom bible

Lɛlɛ Sesin 1

¹Káa, Yɛrusalɛm e dyɛngɛ yuu nju wɛ, raane wá sila na bemat, raane jey yá nɔng wɛ nerey. Wa ga tɛ́ ɛ sede kuma a remo; yɛ wɛ á sè derwey bebak bavwel, A remo wa ga tɛ́ ɛ sam.

²Wo tosho mwa naturuk, nemwishil ne tele e bagbɔf o. E ji besa wɛ vê raane, vit a gwining de a tɛt ɛ̀ na a vey wɔrɔk wɛ. Mwa besa gafiri wɛ ba ga ro wɛ, ko ba sê repugu na wɛ a remo.

³Ba ga hashe BeYuda wɔ̂ sesam na reyɔm na rezot pyak. Yɛn a sangal na yére bemat jey, vit a kwɔn de ê yang ɛn ɛ̀ lɔ̀ɔ. Vê repugu ba rɔnɔ hɛn, vit a gwong de bê hywit ɛn ɛ.

⁴Gwòng vɔk e Siyɔn ba sé sede kwɔn sesin, vit a mwat de e kyese nzem wɛ a remo. Ri ruhup wɛ ba ga tɛ́ ɛn wǐn, bepiris wɛ be rus. Bebot behwong wɛ a sé a yɛn yɔɔt, wa sé di rezot tyɔng wɛt.

⁵Vê yol na wɛ ba ga di wɛng, vê repugu wɛ be re nedanelɔ. Dagwi Darwey pyɛ mɛ a ga tɛ̀ wo sɔ reyɔm, yaga banɛn wɛ de ba sé pyak sizɔng. Ba ga vos nèy wɛ vɔk e de sesam, né kyè e nuyel vê tak a nɛ.

⁶Gbɔng nerat Siyɔn na ga tala hɛn, mwa na gbɔng nedyɛt wɛ. Begwɔ̀m wɛ ba ga tɛ́ ɛn sede beròs de ba sɛ̀ kwɔn sehwey wɛt, a sé a vɛ gbɛrɛk e de tele, e nuyel begbam.

⁷Yɛrusalɛm wó bare na nerat wɛ raane, a remo na reyɔm na rezot. Jeng de bemât wɛ bá gaba e vɔ vê repugu, vit a mwat de á sɛ̀ na a sɛlɛ wɛ. Bemat de bá re wɛ, bá shɛgɛsh wɛ jeng de wá gaba.

⁸Yɛrusalɛm wa ga ra banɛn sizɔng, wa ga tɛ́ ɛ pyɛ ligis. Mwa vê nɔng wɛ nerey raane be byɛs wɛ, yaga yɛn a ga di nekpimit wɛ. Wo rus na gap pyɛ wɛ, wa ga doyo bayis wɛ e jey.

⁹Bá bɛrɛng neligis wɛ kyɛrɛng, ko pyɛ cak de yê té ya ka bɔrɔk wɛ wɛt. Gaba wɛ há se ves tyɔng wɛt; Vit a mwat de á tɔk wɔrɔk wɛ. “À Dagwi Darwey, di rezot hom, yaga wo repugu e ra dàndik!”

¹⁰Vê repugu ba ga nára vɔ mɛn, e ra pyɛ̂ nedanerey wɛ, wa ga di yére bemat jey ya vey jugu kwɔn re fongol wɛ, yɛn vemo de hwà dul ɛn nà yel e ji yére bemat mo.

¹¹Bemat wɛ mwa be rus e de jama pyɛ de bê re, yɛn e nɔngɔs pyɛ̂ nedanerey mɛn mwa, na be re be nàra beken. “À Dagwi Darwey, bɛrɛng na hwo di, de ma ga tɛ́ me zagarik.”

¹²“À yin vê kweres, bɛrɛng na yin di lashê yey hom. Lashe yey hak ha sé yere hemo de ha hwo e ra me, hemo de Dagwi Darwey a bomo me na hɛ, e tuk nepep shom mɛ a?

¹³A tomo na kya yi e rak o, kya de he re e bekup hom. A shara segun e bol hom, a toyo na me na bama. Ko a ye waa a me kayɛ jeng, a hala me na royo pep-pep.

¹⁴A tula banɛn hom mwa ko a rɔgɔs a me vɛ mwa. A tɛ̀ vɛ e rafwɔ hom, ko ma tɛ́ me gbɛrɛk na nedirik o. Darwey a nára me e vɔ vê repugu, ko ma tɔk ra retek wɛt.

¹⁵Darwey a ye zak à vê gap, mwa vê como de ba sé na me. A tomo regyɛng bemat e ra me, na be vey wey na bewen hom. A ngwɔgɔt BeYuda bemat hom sede nèy anap e dem farang o.

¹⁶Pyɛ ma yane de ya tɛ̀ me tosho bayis hom be rop nemwishil. Vit a mwat de ê tɔk wɔrɔk me, vit a mwat de ê gwɛ a me yey ting. Ba ga shara nèy hom, yaga wo repugu a dal me na gap.”

¹⁷Siyɔn wa nára vɔ wɛ e gwi, ko vit a mwat de ê wɔrɔk wɛ. Dagwi Darwey a ga nɔng nu e ra Yakɔp na vê vwara mɛ be tɛ́ ɛn vê repugu, Yɛrusalɛm wa ga tɛ́ ɛ pyɛ ligis e tē mɛn.

¹⁸“Ko Dagwi Darwey a gas badu e tē, yaga ma ga gyeng ha mɛ wɛt. Wok in, à yin bemat e kagwa, na yin a di rezot hom. Bebot bewen na behwong hom ba ga hashe vɛ vɔk e de sesam.

¹⁹Ma yila vê yey hom, ko yɛn a kyɛ́ ɛn nà sɛlɛ. Bepiris na bemat nuyel, ba ga kushu e nehyok gbɔng pomo, e de jama pyɛ̂ re, na be wuru me gap mɛn.

²⁰À Dagwi Darwey, di rezot hom, jim hom ye tsip. Yey hom ye vow, yaga ma ga sogo a hwo nehywɛ. Be mɔbɔs bemat e nehyok, ko e ji beduk mwa, be kushu.

²¹Yɛn e wok de me rus, ko vit à wo wɔrɔk. Vê repugu mwa ba wok reha rezot hom ko yɛn a vɔk yey pyɛng na pyɛ de hwà ra. Vèy na tuk de hwà sira e ra hɛ raane, na yɛn arɔng be se sede me!

²²Tɛ̀ tom ves mɛn be sè kyɛrɛng e bayis mo, na hwo teshe na yɛn arɔng, sede remo de hwà teshe na me yaga mwa neburu hom. Yaga rus hom ha sé nunus pyak, ko yey hom ye pere royo me.”