Read berom Lɛlɛ Sesin 2 Bible Online

Lɛlɛ Sesin 2 - berom bible

Lɛlɛ Sesin 2

¹Káa, Darwey e ji shom me, a ga bang Siyɔn na lwil! A ga vala gbɔng nedyɛt Israyɛl yi e lagwi vey e jey sana bare na kwɔn sangal mɛ, e tuk lolô shom mɛ.

²Darwey a wey sana tósho reyɔm na kakɛ kerepomo Yakɔp, ko e ji shom mɛ de ye lolo, a hama nekwɔn dál Yuda, a gangas e vwel, a tɛ̀ ligis, segwɔm o na vê nuyel sɛ.

³E ji nepep shom mɛ a shara gap Israyɛl. A kyɛ́ ɛ nà sɛlɛ hɛn jeng de vê repugu ba vey. A re Yakɔp sede kya de he re kayɛ pyɛ de ya gwɔrɔ hɛ.

⁴A mara ket mɛ sede wò repugu, na vwɔ yege mɛ sede wo como. A ga mɔbɔs mwa vemo de be ra kaa na yɛn, e kwɔn sangal bemat Siyɔn A ga shusha shom mɛ sede kya.

⁵Darwey a ga tɛ́ ɛ sede wo repugu, a ga wey na Israyɛl. A ga gangas mwa nelɔ begwɔ̀m mɛn, a ga hala nekwɔn dal mɛn e barin. A ga gwɛ̌ a BeYuda sesin na lashe yey tyɔng wɛt.

⁶A ga gangas kwɔn sangal mɛ sede bwi, a ga wey na kwɔn re a yɛ fongol, Dagwi Darwey a ga bang e Siyɔn, mwa nzem tanga negasî Shábat. Ko a ga kyini gbɔng shom mɛ, gbɔng gwɔ̀m na piris mɛ.

⁷Darwey a ga kyini gàgbang rangas nɔrɔ yas mɛ, a ga gas ɛ na kwɔn re a yɛ fongol, a ga nára e vwɔ wo repugu mɛ, varâ duk nelɔ begwɔ̀m mɛ. Ba mok e Gbɔng Duk Re Fongol Dagwi Darwey, sede e tuk nzem bemat mɛ.

⁸Dagwi Darwey a tɛ̀ e yey mɛ be gangas bedwa gbɔng repomo Siyɔn. A nára rwik mara, a hwɔtɔ vwɔ mɛ na a wey na rɛ wɛt, a tɛ̀ be tosho dwa na tyɔ̌n gyeng wɛ, be lashe hɛn mwa vɛ.

⁹Rùhup wɛ bà ga ye pyɔp e vwel ko ba ga kwɔrɔs vɛ. Gbɔng Gwɔ̀m o na bemat badu mɛ ba wɔ́ na yɛn e tê yére bemat, be to wok hâ tusa wɛt. Ko bezarap Dagwi Darwey be to di negwi-ywey yi na yɛ wɛt.

¹⁰Bemakuk Siyɔn mwa, ba sangal e vwel yuu-yuu, ba tɛ̀ fongol e bato, na berugu sesin e babek. Bebot behwong Yɛrusalɛm ba ga ye det a bato mɛn e vwel.

¹¹Bayis hom ba ga tɛ́ ɛn mwangalang na sesin, yey hom ye lɔl. Ma ga tɛ́ me gbɛrɛk na lashe yey yaga ba ga wey na bemat hom. Nèy na nèy vɔ na sé kushu e nehyok gbɔng repomo mó.

¹²Ne tosho a beneng mɛn, ne tē, “Pyɛ̂ re na nshi sɔ a nɛ?” Ne gabsa e nehyok, sede ba ga mǎ nɛ, ko ne kushu hywɛ-hywɛ e vɔ beneng nɛ.

¹³À Yɛrusalɛm, mê yang o ala, mê tyɛngrɛ hwo na sɛ́ ɛ? Mê bɛrɛng reyɔm mo sede rê wa na me bin wɔrɔk hwo mɛ, à Siyɔn ɛ? Rezot mo ra sé tes sede gworep. Wa ê tɔk tɛ̀ o tyang ɛ?

¹⁴Bezarap Dagwi be yis a hwo na negwi-ywey ne bɔs. Be kulu a hwo banɛn mo wɛshɛrɛk na be toyo na hwo yi e sesam wɛt, ko yɛn e yi a hwo na neha siitit de na sé bɔs, na pyɛ kwɛlɛng.

¹⁵Bemat de be kweres e gwong be dak vɔ na be byɛs o mɛ. Be rugum bato mɛn, ko be shɛgɛsh barin Yɛrusalɛm, be tē: “Gbɔng pomo rat a hemo de há sè a mwa jey pyɛ yey pyɛng a?”

¹⁶Mwa bemat repugu mo be tabas a hwo nengyas, be tē cwɛ̀ɛp, be roros nenu mɛn, be dak sekun, be tē, “Wot a ga wey na rɛ! Ngya ngya! Tuk a hemo de wot a vɔk e yey! Á hemo de wot e gyeng, wot a ga di hɛ!”

¹⁷Dagwi Darwey a ga ra pyɛ de á yong, a ga sila ha de á ha, sede remo de á kana tē ano raane, a ga wey na hɛ vit a nemwishish. A ga tɛ̀ wo repugu a vɔk yey pyɛng e ra hwo, a gwɛ̌ a wo repugu gap e ra hwo.

¹⁸Tosho ngyat-ngyat vɔk na Darwey, a yin bemat Siyɔn! Tik nemwishil min ne dɔng sede rɔt, naturuk na nagwi! Hwo kwon pɔng wɛt, bayis mo be pɔng arɔng wɛt.

¹⁹Sogo, tosho naturuk, e jeng, e jeng! Shusha yey mo sede nshi e nuyel Dagwi Darwey! Nára vɔ mo vɔk na yɛ, yaga neken nèy mo, nemo de na sé kushu na vyong, e tô kahɛ hyok!

²⁰À Dagwi Darwey, bɛrɛng na hwo di! E beva de hwà ga sang ra a yɛn ano ɛ? Beha be re nèy mɛn de yɛn a tɛ̀ yey na nɛ a? Be mɔrɔ piris kɛ zarap Dagwi, e kwɔn re fongol Darwey a?

²¹Bavin bebot bemat na bemakuk ba dyɛngɛs tɔɔlɔl e fongol e nehyok, bebot bewen na behwong hom, de ba ga mɔbɔs e como. Hwà ga tów ɛn na bewal sana nemwishish e tuk de shom mo ya sogo.

²²Sede remo de be rini regyɛng bemat e tuk nzem, ano hwà rini a me pyɛ bengyip. E tuk shom Dagwi Darwey, vit a hwak de a hywit ɛ, a dal. Nèy hom de ma tɔs ko ma ras nɛ, ko vê repugu hom ba vey wey mɛ hywiri.