Read berom Lɛlɛ Sesin 3 Bible Online

Lɛlɛ Sesin 3 - berom bible

Lɛlɛ Sesin 3

¹Me a mwat de ma sɔ reyɔm tabak na cwang shom Dagwi.

²A ga ro me, ko a vey na me e lwil de vit a negbey.

³E rà me nju hom de e doyo vwɔ mɛ, a sǎ e de ra ano, mwa wosho.

⁴A wey na nama rebek hom na rehwo mo a to kwɔrɔs bekup hom arɔng.

⁵A rɔnɔ me na como, a bang me na lashe yêy reneng, na reyɔm.

⁶A tɛ̀ me sangal e lwil sede vemo de ba ga ros na reku.

⁷A ga rɔnɔ me na jwa de mê tɔk hywit me wɛt, a ga rɔgɔs me na ngyang dirik.

⁸Mwa ano de me dɛrɛ, me tosho me jama sɛlɛ, ko a ra yapyi na won hom.

⁹A ga bangas bapɔk hom na bègbɔng beta a ga kyě tē rɛ̌t a gwong hom.

¹⁰E wɛrɛm gwong hom sede beyar, sede gukum e waba.

¹¹A ro me yi e gwong hom, ko a hama me cɛk o cɛk o, a hala me vit à pyɛ.

¹²A hwɔtɔ gbang mɛ, ko a rene me na ket mɛ.

¹³A ta ragey hom na ket zing mɛ.

¹⁴Ma ga tɛ́ me a mwa bemat hom pyɛ shɛgɛsh. Ba lɛ̄lɛ me mwa tuk hane mo.

¹⁵A shɔk me na nshi de ne reneng. A vo me na pyɛ de ya sé kpashak.

¹⁶A tɛ̀ me tangal tyat na yìn, ko a tɛ̀ me sangal e fongol pwɛ̀ng.

¹⁷Ma vɔk yey dyɛngɛ wɛt, ma ye bam a yey pyɛng.

¹⁸Ko ma ye, “Nerat hom na ga tala hɛ, ma to vɔk sɛ̂t yey e ra Dagwi Darwey wɛt.”

¹⁹Báre nepep na kyé kyè kpɛɛ, ba sé sede nedɔm kpashak de me sɔ.

²⁰Me bare na yɛ̄ kayɛ jeng, ko ye tɛ̀ gabik hom gbɛrɛk.

²¹Mwa ano sɛ̂t yey hom he toyo jeng de me bare na pyɛ jining yemo:

²²Tɛ̂ yey Dagwi Darwey he sang tala hɛ wɛt, toshô reyɔm mɛ he sang yɛnɛ hɛ wɛt.

²³Ya sé pyas kanɛ nagasi, nerât yɛ na sé pyak tyɔng wɛt.

²⁴Gabik hom he tē, “Dagwi Darwey a sé nwang, mê vɔk sɛ̂t yey hom e ra yɛ.”

²⁵Dagwi Darwey a sé rwat na kawɛ mwat de a tɛ̀ gap mɛ e ra yɛ, na mwa vemo de be jama hɛ.

²⁶Ano a dal naka wot a gyeng na niri, na Dagwi Darwey a bin sey ot.

²⁷Ko a sé naka mwat a masa niri, a sè rɔngɔl bwot o,

²⁸na a sangal mɛ yuu nju mɛ, jeng de Dagwi a bɔrɔk hɛ na pyɛ dirik.

²⁹Wot dyɛng bato mot e búm e nɛn mɛ, gyeng rɔ̌ bwang sɛ̂t yey o ha sɛ.

³⁰Ka ba ka dak ot, be tabas a wot nengyas, ko wot sey pyɛ byɛs de ba ra mo.

³¹Yaga Darwey e kyini hot gbak-gbak wɛt.

³²Ka a ka tɛ wot lashe yey, ê tosho reyɔm mot gbak, yaga tɛ̂ yey mɛ na wot ha sila gyat.

³³Yaga a sé a yɛ pyɛ yey pyɛng wɛt na bemasi be wɔ̀t nepep na lashe yey.

³⁴Jeng de be ngwɔgɔt bemat ngyang na bol e vwel hak,

³⁵na jeng de be mɔt bemasi na neves e nuyel Womo De A Dal Na Reto Mwa,

³⁶na jeng de be tik nà gas a hwak badu e tē, Darwey e di pyɛ mo wɛt a?

³⁷E wa de e nɔng nu, ko be ra pyɛ mo sana Dagwi Darwey a ha a yɛ gyam wɛt ɛ?

³⁸A sé yi e nû Womo De A Dal Na Reto Mwa de nerat na neves ne nunus wɛt a?

³⁹Yaga sɛ́ de bemasi bê gwɔrɔng e ra tabak banɛn mɛn ɛ?

⁴⁰Tik na wot a masa, na wot a ngyɛgɛt begwong mot, na wot a toyo vey na Dagwi Darwey.

⁴¹Tik na wot wuma neyey mot na wot nása vɔ mot vɔk na Dagwi e lagwi, wot tē:

⁴²“Wot a ga ra banɛn, wot a ga sogo nehywɛ, ko hwà ga hala a wot wɛt.

⁴³Hwà ro ot ko hwà mɔbɔs hot, yaga shom mo ya ga bang tosho reyɔm mo.

⁴⁴Hwà ga to bang tó mo na bale, yaga na won mot he wul o wɛt.

⁴⁵Hwà ga tɛ̀ ot sede pyɛ serwik, na gwɔt fongol e tê bemat jey.

⁴⁶Mwa vê repugu mot be dusa hot ko be shɛgɛsh hot.

⁴⁷Wot a ga kwey e ji rezot na gawey, wot a sangal e ji reyɔm na bengyip.

⁴⁸Nemwishil nà dɔng e bayis hom sede nshî nerɔt, yaga ba ga wey na bemat hom.

⁴⁹Nemwishil hom nê tele sana tumal, sana tɛ̀ kwɔk arɔng,

⁵⁰sɛ̌ Dagwi Darwey yi e lagwi, a bɛrɛng na a di ot.

⁵¹Yey hom ye lashe hɛ e ra reyɔm beha gbɔng repomo remo.

⁵²Bemat de be ra repugu na me sana tin, ba ga tɛ̀ a me segun sede non.

⁵³Ba bomo me kwen e vɔng, ko ba bang nu mo na fwà.

⁵⁴Nshi na hwo bang me, ko ma bare: ‘Ma ga ku ow!’

⁵⁵À Dagwi Darwey, ma remo reza mo, yi e nɛ̂n vɔng o,

⁵⁶hwà wok won hom wɔgɔ, Hwo kwon bang betong e sesin hom wɛt.

⁵⁷Hwà vey bagat jeng de ma yila hwo, ko hwà ye, ‘Hwo vo bengyip wɛt!’

⁵⁸À Darwey, hwà vey sey ɛ̀ ha hom, ko hwà ga viri neken hom.

⁵⁹A Dagwi Darwey, hwà ga di buru de ba ra a me, ko hwà yɛrɛ a me shɔt tyɛng.

⁶⁰Hwà ga di begwong beves mɛn, na mwa pyɛ́ vyes de yɛn a yong a me.

⁶¹À Dagwi Darwey, hwà ga wok ɛn e de dusa me, na mwa pyɛ́ vyes de yɛn a yong a me.

⁶²Hâ nu mɛn, na barê yey mɛn mwa, ha sé e ra mɛ mwa wosho.

⁶³Bɛrɛng hɛn e sangal kɛ e tumal, be lɛ̄lɛ me e lɛ̀lɛ mɛn.

⁶⁴À Dagwi Darwey, tala hɛn tom ves mɛn tyɛng na tom vɔ mɛn!

⁶⁵Tɛ̀ neyey mɛn ne lɔl, na gawey mo he hwo e ra yɛn.

⁶⁶À Dagwi Darwey, ro ɛn e ji shom mo, na hwo wey na yɛn hywiri e jey!”