Read berom Lɛlɛ Sesin 4 Bible Online

Lɛlɛ Sesin 4 - berom bible

Lɛlɛ Sesin 4

¹Di dyam shinang de yá kana nɛp, celes dyam shinang ya ga tɛ́ ɛ dìlim! Beta berat ba ga shara hɛn kpɛɛ, e tô kahɛ hyok.

²Bewen Siyɔn bá sè a wot berat sizɔng, sede dyam shinang, ko a remo be teshe na yɛn, sede nerwey secwem, fwôm vwɔ mwat.

³Nevu-hey mwa ne nɔngɔs nèy mɛn nevasal na ne ras mɛ, ko bemat hom ba ga tɛ́ ɛn beves, sede bengyuwa de be teshe na nèy mɛn e hey gbingiring.

⁴Be halsa nèy mɛn ne kushu na vyong tanga yey hwɔshɔ, nèy ne ra won pyɛ̂ re de vit a mwat de ê nɔng ɛn.

⁵Bemat de bá re pyɛ̂ gananang be kushu na vyong e nehyok. Vemo de ba ras ɛn na nedanerey, be kyě jama pyɛ́ e bagwɔt fongol.

⁶Tábak bemat hom ha dal hê bemat Sɔdɔm de gawey há hwo e ra yɛn gobok, sana ra ɛn na vwɔ.

⁷Nèy gwɔ̀m mɛn ná sè haalal, ná dal nemuk-fwala, ná dal nevasal na nepɛng. Babek nɛ bá sè basinang hyul-hyul, ba dal koral, setot mɛn sá nɛp sede dyéngere safir.

⁸A remo bayis mɛn ba dal hwalang na nesit, be tɔk ɛn e nehyok wɛt, rehwo rebek mɛn ra ga gunus hɛ e ra bekup o, ra ga hworok sede kpɔk cɔgɔt.

⁹Vê yey pyɛng a vemo de ba kushu na bewal como, e ra vemo de vyong ya kulsa hɛn. Vemo de neken mɛn na tɛrɛ hɛn vit, ba shim ɛn pyɛ̂ hwiri.

¹⁰Beha berat ba kyé nèy mɛn na vɔ mɛn, pyɛ̂ re mɛn à yane, e jeng de bá wey na bemat hom.

¹¹Dagwi Darwey a hala shom mɛ e ra yɛn, a shusha shom me vyes sizɔng. A dak kya e Siyɔn, ko ha re wɛ mwa vɔk e tis o.

¹²Begwɔ̀m jey bá sey tsak o wɛt, kɛ behak e ji bemat sangal e jey, wɔgɔ, bemat repugu, kɛ bemat beves, bê sang yel e ruhup Yɛrusalɛm.

¹³Pyɛ́ mó ya té yi na banɛn bezarap Dagwi, na neves bepiris mɛ arɔng, de yɛn á lusha nemi vê cik, e tê gbɔng repomo mo.

¹⁴Yɛn a kyě gǎ e nehyok de na ga tɛ́ ɛn ligis na nemi. Yi ano, vit a mwat de a simo, a ra berugu mɛn.

¹⁵Bemat ba gbɔ ba tang ɛn, “Kyè in e jey! Yin a ga tɛ́ in ligis! Yin ra ot wɛt!” Ano yɛn a tɛ́ ɛn bemât tele, be kyě gǎ, yére bemat jey ya kyě ha e ra yɛn wɔgɔ, “Tyɔng tyɔng wɛt, yɛn ê to sǎ e ngamo wɛt.”

¹⁶Dagwi Darwey pyɛ mɛ a shara hɛn, ê to bɛrɛng hɛn naka wɛt. Ba to nɔ̂ng bepiris nerey wɛt, yɛn a to tē naka na bemakuk arɔng wɛt.

¹⁷Bayis mot ba ga ruru na lolo zɔng-reng e de jamâ sɛlɛ. Wot a lolo bayis tyɔng wɛt e ra yere bemat jey de yê tɔk sey ot wɛt.

¹⁸Ba raa nekyɔ̌n bol mot, yaga ano wot a tɔk kyě kyè e nehyok mot wɛt. Yɛnɛ mot ha ga pom, jeng mot ya ga tala hɛ.

¹⁹Bemat de ba rùnus hot ba dal kim de wo sogo e gwi na nèdey. Yɛn a hwo e ra wot e beraku, yɛn a gyeng ot e waba e hey.

²⁰Yɛ de wot a tɛ̀ gap mot e ra yɛ, yɛ de Dagwi Darwey a ga kasa, a ga gaba e segun mɛn. Yɛ de wot a ha e ra yɛ wɔgɔ, “Wot ê sangal e nɛ̂n necam mɛ e tê yére bemat jey.”

²¹Shɛgɛsh hin, na yin vɔk yey pyɛng, à yin BeƐdɔm, yin de yin a sangal e vwel Us. Rezot min re kyè vey arɔng, yin ê feng siring, ko yin ê hywɛrɛm hin.

²²À yin bemat Siyɔn, ba ga tala tabak banɛn min. Dagwi ê re nuyel na tik in e ji sesam wɛt. Ko yin BeƐdɔm, ê tabak banɛn min, ê wuma banɛn min ngwɛnjɛng!