Read berom Lɛlɛ Sesin 5 Bible Online

Lɛlɛ Sesin 5 - berom bible

Lɛlɛ Sesin 5

¹À Dagwi Darwey, bare na pyɛ de ya ga té na wot, bɛrɛng hot na hwo di de be byɛs ot.

²Benap mot ba ga wɛrɛ e vɔ bemat beduk, Bemat yére dyuk ba sé sangal e nelɔ mot.

³Wot a ga tɛ́ ot nehyɛn, vit a beda, beneng mot ba ga tɛ́ ɛn sede bekuma.

⁴A sé gbing-gbing wot tala nshi de wot e sɔ, wot e sɛ̀ cɔ́gɔt wɛt sɛ̌ na dyām.

⁵Wot a ga ruru, ko vit à pɔnglɔ, ko be kyě dak hot sede berɔndɔng de ba vɔk ɛn na swesek.

⁶Wot a ra gafiri na Misra tanga Asirya, na wot sɛ pyɛ̂ re de yê vey a wot.

⁷Bedabeda mot bá ra banɛn, ko a remo yɛn a to sɛ́ wɛt, wot a sé sɔ reyɔ̂m banɛn mɛn.

⁸E besam de be re negwɔm e ra wot, vit a mwat de ê pat ot e vɔ mɛn.

⁹Sɛ̌ wot a nɔng neken mot e ngyen na wot de sɛ pyɛ̂ re, yaga vê mɔbɔs bemat be kyě gǎ e hey.

¹⁰Rehwô rebek mot ra fus sede vû kya, ko vyong ye rangas hot sede mwat bêk fes.

¹¹Ba ga dyɛngɛs na beha mot na retek e Siyɔn, ko na beyorom-behwong mot e bapomo Yuda.

¹²Ba ta a bemat nuyel ngyɔt na vɔ mɛn, ko ba nɔng bemakuk mot nerey wɛt.

¹³Ba tɛ̀ bewen mot be hwongo pyɛ́, ko nèy bewen né ra didendes na nedirik cɔ́gɔt.

¹⁴Bemakuk be to sangsal e ruhup gbɔng repomo wɛt, ko bebot bemat be tɔk to ra lɛlɛ wɛt.

¹⁵Yey pyɛng ya to sé e neyey mot wɛt, rɛɛ mot ha ga tɛ́ ɛ sesin.

¹⁶Kpin negwɔm wa ga gaba e rato mot. Gawey e ra wot yaga wot a ga ra banɛn!

¹⁷Yaga ano neyey mot ne royo, bayis mot be bɛrɛng dip-di-dip arɔng.

¹⁸Yaga Raku Siyɔn wa ga tɛ́ ɛ barin, nevu-hey ne kyě gǎ e wɛ.

¹⁹Ko hwo, à Dagwi Darwey, hwó re negwɔm nesheneshey. Gwofwa negwɔm mo gwô nára vɔk e mwa nezamang.

²⁰Yaga sɛ́ de hwà ga ye waa a hot, hwà ga ye bam à hot jeng pyak ano ɛ?

²¹Toyo na wot vey na hwo, ko wot ê to toyo. Toyo na wot, à Dagwi Darwey, sede remo de wot á sè raane!

²²Sɛ̌ gyeng hwà ga ye zak a hot vit, e ji shom de ya vɔk yɛnɛ wɛt.