Read berom Yɛzɛkyɛl 1 Bible Online

Yɛzɛkyɛl 1 - berom bible

Yɛzɛkyɛl 1

¹E tuk he tungun he pwɛl gwo naas, e shey he kuru batat (30) hê shey hê tungun hê sesam Gbɔng Gwɔ̀m Yɛhɔyakin, má sè e ji bemat sesam e hagat Rɔt Kebar e sevwel Babilɔn. Lagwi wá wunta hɛ, ko ma di Dagwi e ji negwi-ywey.

³Ko Dagwi Darwey a ha na piris mɛ, Yɛzɛkyɛl Buzi, e sevwel Babilɔn, e hagat Rɔt Kebar. Ko reto Dagwi Darwey ra hwo e ra yɛ.

⁴Ma bɛrɛng, ko ma di gûl rwak gwo pɛsɛl yi e rwa bato, ko gbara wa tē dɛbɛt e gbɔng rele, ko lagwi de wa gwɔrɔ rɛ wa lolo negbey tyɔng wɛt, ko e tê kyâ gbara mo, pyɛ cak ya nɛp sede pama.

⁵E tê gul rwak o, ma di pyɛ́ cak sede pyɛ́ cen nyaas. Ya sé sede mwasi,

⁶ko kayɛ mo ya vɔk bwang bayis banaas na bafabak banaas.

⁷Bol yɛ̄ ba sé tabat, ko ya vɔk bekwǒk bol sede vè mus, ya nɛp sede dyam pama de ba tugut.

⁸E nɛ̂n bafabak o, ya vɔk vɔ mwasi e mwa bebak benaas tyɛng na bwang bayis banaas na bafabak banaas o.

⁹Bafabak o ba ragas bemɛn. Yé doyo jeng de ye kyè wɛt, kayɛ mo ye kyè cik e nuyêl yɛ, sana doyo.

¹⁰Bwang bayis yɛ̄ ba sé ngan: Mwa ye nyaas ya vɔk bwang bayis mwasi e nuyel, na vê gukum e hagât yege, na vê mus e hagat mwɛlɛng, na vê kim e bama arɔng.

¹¹Ya nára bafabak o e rak o, kayɛ mo ya nára bafabak baba e rak o, na be ragas nenu bemɛn, ko ya bang bek yɛ na baba arɔng.

¹²Kayɛ mo ya kyè cik e nuyel yɛ, vɔk e kwɔn de gabîk yɛ ha wɔ́, ko ye doyo e jeng kwɛngɛl o wɛt.

¹³E tê pyɛ́ cen o, pyɛ cak ya sé sede hwalang de he re kya, sede mwol de he lolo, ko ya kyě gǎ e tê pyɛ́ mo. Kya mo he re bèlem-belem, ko he tabas nedyɛt yerê ne gbara.

¹⁴Pyɛ́ cen o mo ye kyě tabas na setele pep vɔk e nuyel ko ye to toros hɛ ziri sede té dɛbɛt gbara.

¹⁵Jeng de ma sé bɛrɛng pyɛ́ cen o mo, ko ma di bahara banaas sede ve kyɛkyɛ, ba sé gyirik e vwel, karɛ mo bagat na pyɛ mo cak.

¹⁶Bɛ́rɛng na yông bahara mo ba nɛp sede dyéngere ryat. Mwa vɛ̄ banaas ba sé tyɛng, ko bɛ́rɛng na yông vɛ ba sé sede hara mo hak ha sɔ́sɔ̀k hɛ́ e ji mumwɛ.

¹⁷Jeng de ye kyè, ye tɔk kyè e kawɛ bak rwa gul naas sana doyo.

¹⁸Bahara mo ba sé barey o, ko ba rɔnɔ vɛ na yɔ̄bɔ pyak de ba tɛ̀sɛ a yɛ bayis.

¹⁹Kayɛ jeng de pyɛ́ cen o ya hwo kyè, ko bahara mo ba dopɛ, ko ka sede pyɛ́ mo ya sogo e rak o, ko bahara mo be sogo arɔng.

²⁰Pyɛ́ mo ye kyè vɔk e kawɛ bak de gabîk yɛ ha simo wɔ́ ɛ, ko bahara mo be ra tyɛng ano arɔng, yaga gabik pyɛ́ cen o ha sé e ji bahara mo.

²¹Jeng de pyɛ́ cen o ye hwo kyè, ko bahara mo be kyè, ko jeng de ye tumal ko be tumal arɔng. Ka sede pyɛ́ mo ya sogo e gwi, ko bahara mo be sogo arɔng, a remo de bahara mo ba vɔk gabîk pyɛ́ cen o mó.

²²E ra rak batô pyɛ́ cen o, pyɛ cak ya sé sede ragyip de ba yong na pyɛ de ye nɛp sede madɔbi, ba shara yɛ e bato mɛn.

²³E nɛn ragyip o, pyɛ́ cen o ye nára bafabak yɛ baba tabat vɔk na bemɛn, ko kayɛ pyɛ mo ya vɔk bafabak baba de ba bang rebêk yɛ.

²⁴Ma wok rewɔng bafabak mɛn o jeng de ya sé tele, ra sé sede rewɔng tɛmɛ-nshi, na sede fwɔ̂ Dagwi Wo Reto Mwa, na sede wûs gul rwak, tanga sede lwɛ́lɛ regyɛng bemat como. Sede pyɛ́ mo ya tumal, ko ye gyirik bafabak mɛn o.

²⁵Ko be rɔ̌ wokos rewɔng yi e ra rak ragyip o.

²⁶E ra rak ragyip o pyɛ cak ya sé de ya sé sede gwofwa negwɔm de ba yong na dyengerê safir, ko ma di sede mwasi a sangal e ra gwofwa negwɔm o.

²⁷Yi e wít mɛ vɔk e rak o, ma di pyɛ de ya nɛp sede dyam pama, ya sé sede kya, ko ya rɔnɔ hɛ. Yi e wit o vɔk e vwel o, ma di pyɛ cak sede kya, ko ya lolo, ya pere wɔ rɔnɔ hɛ,

²⁸ya sé sede shatong e ji bale e tuk de rwak wó rop, ko nedyɛt negbey de na rɔnɔ hɛ na sé tyɛng ano arɔng. Nemó ne à negwi-ywey ne nedyɛt negbey ne gbɔng nerat Dagwi Darwey. Jeng de ma di ano, ma gaba gup, ko ma wok fwɔ̂ mwat hwak de a sé ha.