Read berom Yɛzɛkyɛl 10 Bible Online

Yɛzɛkyɛl 10 - berom bible

Yɛzɛkyɛl 10

¹Ma bɛrɛng, ko e ra rak ragyip de wa sé e ratɛt bekɛrup, ma di pyɛ cak e ra rak mɛn sede dyéngere safir, ba yong yɛ sede gwofwa negwɔm.

²Ko Dagwi a yang mwat de a tɛ̀ rugû linen, “Ci e tê baharâ nɛ̂n bekɛrup. Vɛ́ cíla kya pyak e vwɔ, ko hwo waram e ra gbɔng repomo Yɛrusalɛm.” A wɔ̀ yel e hwomo me sè bɛrɛng hɛ.

³Bekɛrup bá sè tumal e hagat rwa batin Gbɔng Duk Re Fongol o jeng de mwat o á yel, ko rele ra hwo bang lala ji mo.

⁴Gbɔng nerat Dagwi Darwey nà sogo yi e ra bekɛrup o, ko na kyè vɔk e rwi Gbɔng Duk o, ko rele mo ra sila wɛ, ko lala mo ha sila na nɛ̂p gbɔng nerat Dagwi Darwey.

⁵Ba wok rewɔ̂ng bafabak bekɛrup o pere vɔk e lala majey, sede fwɔ̂ Dagwi Wo Reto Mwa jeng de a sé ha.

⁶Jeng de Dagwi Darwey a nɔ̂ng mwat de a tɛ̀ rugu linen nu, a ye, “Vɛ́ kya yi e tê bahara de ba sé e nɛ̂n bekɛrup.” Mwat o a yel ko a tumal e hagat rehara mo hak.

⁷Kɛrup o hwak wa nára vwɔ yi e tê bekɛrup o vɔk e cíla kya de ya sé e tē mɛn, wa vɛ́ yɛ, wa tɛ̀ yɛ e vɔ mwat de a tɛ̀ rugu linen o, a sey yɛ, ko a nusu mɛ e jey.

⁸Bekɛrup o ba vɔk pyɛ de ya sé sede vwɔ mwasi e nɛ̂n karɛ refabak.

⁹Ma bɛrɛng, ko ma di bahara banaas e bahagat bekɛrup o, hara hining e hagat kawɛ kɛrup. Ka sede ba bɛrɛng bahara mo, ko ba tē bwerep sede dyéngere ryat.

¹⁰Ko bɛ́rɛng bahara mo mwa vɛ banaas ba sé tyɛng, ko kagwɛ mo gwa vɔk hara hak de ha yel e ji mumwɛ.

¹¹Jeng de be hwo kyè, be tɔk kyè e kawɛ e ji bebak benaas sana doyo, ko e kawɛ bak de bahara nuyel ba raa, ko bwang o be raa sana doyo e jeng kwɛngɛl o.

¹²Babek vɛ mwa, na nèma mɛn, na vɔ mɛn, na bafabak o, tanga bahara mo mwa — bahara mo mwa vɛ banaas ba sila na bayis e kawɛ bak.

¹³Ko e ra reha bahara mo, ma wok fwɔ gwa yila vɛ à baharâ doysa.

¹⁴Kawɛ kɛrup wa vɔk bwang bayis banaas. Bwang o gwô mɛsɛng gwa sé gwô mus, gwô neba gwa sé gwô mwasi, gwô netat gwa sé gwô gukum, ko gwô nenaas gwa sé gwô kim.

¹⁵Bekɛrup o ba sogo e gwi, vɛ à pyɛ́ cen de má kana di e hagat Rɔt Kebar.

¹⁶Jeng de bekɛrup o ba hwo kyè, ko bahara mo ba kyè tanga vɛ̄ kudurung. Jeng de bekɛrup ba jut bafabak mɛn na be sogo yi e vwel, ko bahara vê bahagat mɛn ba dopɛ pang.

¹⁷Sede ba tumal, bwang o gwo tumal arɔng, ko jeng de be sogo e gwi, bwang o gwo sogo tanga vɛ̀, yaga gabik pyɛ́ cen o ya sé e ji vɛ.

¹⁸E bama mo, gbɔng nerat Dagwi Darwey na hala rwi Gbɔng Duk Re Fongol ko na tumal e ra tɛt bekɛrup.

¹⁹Bekɛrup ba shara bafabak mɛn ko ba sogo yi e vwel e bayis hom, ba nusu na bahara mo e bahagat mɛn. Ba tumal e ruhup rwa rak gwô Gbɔng Duk Re Fongol Dagwi Darwey, ko gbɔng nerat Dagwi Israyɛl na sé e ra tɛt mɛn.

²⁰Yemo yɛ a pyɛ́ cen de ma kana di e nɛ̂n Dagwi Israyɛl e hagat Rɔt Kebar, ko ma tɔk e yɛ̄ à bekɛrup o.

²¹Kayɛ mo ya vɔk bwang bayis banaas, kayɛ mo na bafabak banaas, ko e nɛ̂n bafabak mɛn o, ba vɔk pyɛ́ cak sede vɔ mwasi.

²²Bwang bayis mɛn ba sé sede vane de ma kana di e hagat Rɔt Kebar. Kayɛ pyɛ mo ya kyè cik e nuyel yɛ̀.