Read berom Yɛzɛkyɛl 11 Bible Online

Yɛzɛkyɛl 11 - berom bible

Yɛzɛkyɛl 11

¹Gabik Dagwi Darwey ha jut me e rak o, ko ha vey na me e ruhup rwa rak Gbɔng Duk Re Fongol Dagwi Darwey de gwo bɛrɛng rwa rak. Ano, e rwi ruhup o, bemat kuru baba na vɛ betungun (25) bá sè ɛ, hwak e ji mɛn à Yaazaniya Azur, na Pelatiya Bɛnaya, begwɔ̀m sevwel o.

²Dagwi Darwey a yang me, “À mwasi, e bemat a vemo de be yong begwong banɛn, ko yɛn e vos a bemât gbɔng repomo remo byá vyes.

³Yɛn e tē, ‘Jeng ya ga vey bagat na wot a to hwo lɔk nelɔ. Repomo ra sé sede rwêy kyeres pyɛ́, ko wot vɛ à banama mo.’

⁴Yaga ano, zarap e ra yɛn, à mwasi, zarap e ra yɛn.”

⁵Ano arɔng, gabik Dagwi Darwey ha hwo e ra me, ko ha yang me, “Yē, Dagwi Darwey a ye ngan: À BeIsrayɛl, pyɛ de yin e bare à yane. Ma tɔk pyɛ́ de ya vey e yey min.

⁶Yin a ga mɔbɔs bemat pyak e pomo mo, ko yin a ga sila nehyok hɛ na bavin mɛn.

⁷Yaga ano, Darwey Dagwi Darwey a ye: Bavin bemat de yin a tik e ji pomo mo vɛ à banama mo, ko pomo mo hɛ à rwey o, ko di, bê páa in yi e hɛ.

⁸Yin a ga tele hin wal como, ko mê vey na wɛ e ra yin. Me Darwey Dagwi Darwey ma ha ano.

⁹“Mê paa in yi e ji hɛ, ko mê nára hin e vɔ yére dyuk, na me yɛrɛ a yin shɔt.

¹⁰Yin ê wey yi na wal como e vwel Israyɛl, mê yɛrɛ a yin shɔt e tē, ko yin ê tɔk me wɛ à Dagwi Darwey.

¹¹“Pomo hemo hê sè rwey min wɛt, ko yin ê sè banama e ji hɛ wɛt. Mê yɛrɛ a yin shɔt e yɛnɛ vwel Israyɛl.

¹²Ano de yin ê tɔk, me wɛ à Dagwi Darwey, de yin a raa Badu mɛ wɛt, ko yin a kyɛ́ in nà gyeng nu de a nɔng in, ko yin a ga ra pyɛ́ tyɛng na nû yére bemat jey de ya gwɔrɔ hin.”

¹³Jeng de má sè zarap, Pelatiya Bɛnaya a vɛ̌ ku. Ko ma gaba gup, ma pɛl kun, ma ye, “Áaa à Darwey Dagwi Darwey! Hwô mɔbɔs bwang bemat de ba tɛt ɛ e Israyɛl hywiri a?”

¹⁴Dagwi Darwey a ha na me, a ye,

¹⁵“À mwasi, bemat de ba sangal e Yɛrusalɛm be tâng mwa begwa mo, na yere mo, na bemat mo de ba sé e de sesam tanga hwo, tanga mwa BeIsrayɛl wɔgɔ, ‘Yin a ga kyè yikyik yi na Dagwi Darwey. Wot a sé vemo de a nɔng ot vwel hemo na he tɛ́ ɛ nap mot.’

¹⁶“Ko di a remo, ha a yɛn ngan, ‘Darwey Dagwi a ye: Ey, e me de ma paa ɛn, ma tomo na yɛn yikyik, e tê yére bemat jey, ko ma ga shara hɛn e bavwel baduk, ko mwa ano, mê se a yɛn Kwɔn Jɛrɛ e kahɛ vwel de yɛn a sé ɛ yaga jeng tyɔng na yɛn a tɔk re a me fongol e hwomo.’

¹⁷“Yaga ano, hwo ye, ‘Darwey Dagwi Darwey a ye: Mê tula hin yi e bemat o, na me vey na yin yi e bavwel de ba kana shara hin ɛ, ko mê nɔng in vwel Israyɛl.

¹⁸Jeng de yɛn a wul hwomo, yɛn ê paa yi e hɛ mwa pyɛ́ de ma kyé me zakzak, na mwa pyɛ̂ byɛm-byɛm hɛ.

¹⁹Ma rɔda nɔng ɛn yey rining, ko me tɛ̀ gabik pas e ji mɛn. Mê pat yey mɛn de ya sé kashalang sede gwofwa yi e rebek mɛn, ko me nɔng ɛn yêy norok sede nama.

²⁰Ano yɛn ê raa Badu hom na nu hom, na yɛn a gyeng vɛ kwong. Yɛn ê sè bemat hom, ko mê sè Dagwi mɛn.

²¹Ko e ra vemo de ba tɛ̀ yey mɛn e ra pyɛ́ de ma kyé me zakzak, na yê byɛm-byɛm, mê tala hɛn neves negwɔn mɛn. Me Darwey Dagwi Darwey ma ha ano.’ ”

²²E bama mo, bekɛrup ba sogo e gwi na bafabak mɛn, ko bahara mo e bahagat mɛn, ko gbɔng nerat Dagwi Israyɛl na sé e ra rak mɛn.

²³Gbɔng nerat Dagwi Darwey nà sogo yi e tê gbɔng repomo mo, ko nà wɔ̀ tumal e ra raku wo rwa rak, wo gbɔng repomo mo.

²⁴Gabik o ha jut me tɛɛrɛ ko ha kyè na me e ji negwi-ywey, e ji gabik Dagwi, vɔk na bemat sesam e vwel Babilɔn, ko negwi-ywey de ma kana di nà hala me.

²⁵Ko ma ha a vê sesam o mwa pyɛ́ de Dagwi Darwey a ga dura a me.