Read berom Yɛzɛkyɛl 12 Bible Online

Yɛzɛkyɛl 12 - berom bible

Yɛzɛkyɛl 12

¹Dagwi Darwey a ha na me, a ye,

²“À mwasi, hwà sé sangal e tê yerê sogo nehywɛ. Yɛn a vɔk bayis, ko yɛn e kyɛ́ ɛn nà bɛrɛng na vɛ, yɛn a vɔk betong, ko yɛn e kyɛ́ ɛn nà wok na vɛ, yaga yɛn a sé yerê sogo nehywɛ.

³“Yaga ano, à mwasi, yóng a tó mo nedok nekyɔrɔk sede mwât tele yi e vwel mɛ na hwo kaba mɛ̀ gwong vɔk e de sesam, jey ye sè rɔngɔl gbey, ko yɛn a sè bɛrɛng hwo. Hwô hala lɔ mo, hwo kyè vɔk e dem dūk yɛn a sè bɛrɛng hwo, gyeng yɛn ê tɔk, yɛn a sé yerê sogo nehywɛ.

⁴Hwô tula nedok nekyɔrɔk mo sede mwat de e kyè wɔ̂ sesam, nagwi yɛn a sè bɛrɛng, ko nahywegelek hwo hala lɔ mó sede hwà sé kyè wɔ̂ sesam, yɛn a sè bɛrɛng hwo.

⁵Kas vɔng e vwara duk o, hwo nusu hwo e hɛ, yɛn a sè bɛrɛng hwo.

⁶Ko hwo jut gwɔ̂t pyɛ́ mó e ra sanat na hwo kyè mɛ, jey ya ga ye hywi, hwo bang bwang bayis mo, yaga na hwo tɔk di vwel o wɛt, yaga ma ga tɛ̀ hwo sè pyɛ dura a BeIsrayɛl.”

⁷Ma ra kayɛ pyɛ de Dagwi Darwey a ha a me. Ma tula gwɔt nedok nekyɔrɔk hom nagwi sede mwat de e kyè wɔ̂ sesam, ko nahywegelek, ma kas vɔng e vwara duk o na vɔ hom, ko ma nusu, jey ya ga ye hywi na gwɔt nedok o e ra sanat, ma nára me, yɛn a sè bɛrɛng me.

⁸Nusu hwol, Dagwi Darwey a yang me:

⁹“À mwasi, BeIsrayɛl, yerê sogo nehywɛ vane, ba rangal hwo pyɛ de hwà sé ra wɛt a?

¹⁰Yang ɛn, ‘Darwey Dagwi Darwey a ye: Hâ zarap hemo ha sé e ra gwɔ̀m Yɛrusalɛm, na mwa BeIsrayɛl de ba sé e hwomo.’ ”

¹¹Yang ɛn, “Ma sé a yin pyɛ dura, sede remo de ma ga ra, ano de bê ra a yɛn, bê hashe hɛn be kyè mɛ vɔk e de sesam.

¹²Gwɔ̀m mɛn ê jut gwɔt nedok nekyɔrɔk mɛ e ra sanat nawiri, na a hywit ɛ mɛ e vɔng de a kas e vwara duk. A rɔda bang bwang bayis mɛ na a di vwel de a sé kyè wɔ̀ hala wɛt.

¹³Mê shara segun hom e ra yɛ, na me vo ɛ́ na hɛ, ko mê kyè na yɛ vɔk e repomo Babilɔn, e vwel Babilɔn, mwa ano, ê di hɛ wɛt, ko ê ku e hwomo.

¹⁴Mê shara mwa bemat badu mɛ, na bemat gyeng ɛ, tanga bemat como mɛ e kagwɛ rwa gul jey, ko mê hwɔltɔ wal como e ra yɛn na wo wey na yɛn.

¹⁵Ano de yɛn ê tɔk mɛ wɛ à Dagwi Darwey, jeng de ma shara hɛn e mwa yére bemat jey, na me shara hɛn e bavwel baduk.

¹⁶Ko mwa ano, mê tik bwang mɛn tyɔng be hywit ɛn wal como, na vyong tanga tumbang, yaga na yɛn a ha reha tomong mɛn de ba sé byɛm-byɛm e tê yére bemat jey de yɛn a sangal na yɛn. Yi ano, yɛn ê tɔk e me wɛ à Dagwi Darwey.”

¹⁷Dagwi Darwey a to yang me:

¹⁸“À mwasi, re pyɛ́ na vôw rebek, ko a tang o wǐri na bengyip jeng de hwà sé sɔ nshi.

¹⁹Há a BeIsrayɛl, bemat vwel o ngan: ‘Darwey Dagwi Darwey a yang bemat sangal e Yɛrusalɛm wɔgɔ: Yɛn ê vow jeng de yɛn a sé re pyɛ́, ko ê tang ɛn wǐri na bengyip jeng de yɛn a sé sɔ nshi. Bê wey na vwel o, bê hashe kayɛ pyɛ ko bê hala hɛ hal, yaga yol de bemat sangal e hɛ be ragas.

²⁰Bagbɔng bapomo de ba sila na bemat a remo bê tɛ́ ɛn barin, ko vwel o hê tɛ́ ɛ gbingiring. Yi ano de yɛn ê tɔk, e me wɛ à Dagwi Darwey.’ ”

²¹Dagwi Darwey a to yang me,

²²“À mwasi, e sɛ́ à cinat ha yemo de be ha e vwel BeIsrayɛl wɔgɔ, ‘Jeng ye kweres, ko negwi-ywey na ga sila wɛt ɛ?’

²³Ko di, ha a yɛn: ‘Darwey Dagwi Darwey a ye: Mê tɛ̀ kwɔk cinat ha mo, ko bê to ha ano e Israyɛl ko tyɔng wɛt.’ Yang ɛn ngan: ‘Jeng ya ga vey bagat de kane negwi-ywey nê sila.’

²⁴“Bê to wok negwi-ywey ne bɔs, kɛ neha vyóshon e ji BeIsrayɛl wɛt.

²⁵Me Dagwi Darwey, mê ha há de me ha, ko bê sila hɛ. Bê to rɛn ɛn nà sila hɛ wɛt. À yin yerê sogo nehywɛ, e jeng min, mê ha há ko mê sila hɛ. Me Darwey Dagwi Darwey ma ha ano.”

²⁶Dagwi Darwey a to yang me,

²⁷“À mwasi, BeIsrayɛl ba sé tɛ̄ a remo wɔgɔ, ‘Negwi-ywey de e bɛrɛng na sé ne neshey pyak de ne kyè vey, e zarap yaga jeng de ya rɔngɔl yikyik.’

²⁸Yaga ano, yang ɛn: ‘Darwey Dagwi Darwey a ye: Vit a neha hom de nê to rɛn ɛn, ko há de me ha hê sila. Me Darwey Dagwi Darwey ma ha ano.’ ”