Read berom Yɛzɛkyɛl 13 Bible Online

Yɛzɛkyɛl 13 - berom bible

Yɛzɛkyɛl 13

¹Dagwi Darwey a ha na me, a ye,

²“À mwasi, zarap e ra bezarap Israyɛl. Zarap e ra vemo de be zarap e ra bare yey mɛn pyɛ mɛn, be tē, ‘Wok in hâ Dagwi Darwey!’

³“Darwey Dagwi Darwey a ye, ‘Gawey e ra betɔ̂n bezarap de be raa gabik tó mɛn, ko yɛn a ga di pyɛ cak wɛt!’

⁴À yin BeIsrayɛl, bezarap min ba sé yapyi zɔng sede nevu-hey de ne sǎ e de jáma pyɛ́ e bagwɔt barin.

⁵Yin a ga wɔ̀ yong nedem de jwa-pomo wa taksal wɛt, kɛ yin a to lɔk a BeIsrayɛl jwa-pomo na yɛn a dul mɛ bato mɛn e tuk como Dagwi Darwey wɛt.

⁶Pyɛ́ de yɛn e bɛrɛng e ji negwi-ywey ya sé bɔs, ko pyɛ́ de yɛn e tē yê té ya sé mwin wɛt. Yɛn e tē, ‘Dagwi Darwey a ye’, e jeng de Dagwi Darwey a ga tomo hɛn wɛt, ko mwa ano yɛn e sǎ e de gyeng silâ neha mo!

⁷Yin a ga di negwi-ywey ne bɔs, ko pyɛ́ de yin e tē yê té, ya sé mwin wɛt. Yin a ga ye, ‘Dagwi Darwey a ye’, mwa ano de ma ga tùt nu wɛt.

⁸“Yaga ano, Darwey Dagwi Darwey a ye, ‘Yaga yin a ga ha neha de nà sé mwin wɛt, ko yin a bɛrɛng negwi-ywey ne bɔs, ma sé ra repugu na yin, me Darwey Dagwi ma ha ano.

⁹Vwɔ hom gwô hwo e ra bezarap de be bɛrɛng negwi-ywey ne bɔs, ko yɛn e ha neha de na sé mwin wɛt. Yɛn ê sè e ji bemat badu hom wɛt, kɛ be jɛk baza mɛn e ji ngyɛrɛ̂ baza BeIsrayɛl wɛt, kɛ yɛn a yel e sevwel Israyɛl wɛt, ko yin ê tɔk, me wɛ à Darwey Dagwi Darwey.’

¹⁰“A sé ano yaga yɛn a ga kwɛlɛng bemat hom, be tē, ‘Netyang’ e jeng de vit à netyang, na e jeng de bemat hom ba sé yong jwa-pomo, ko bezarap o ba vey mɔmɔ wɛ na būm pwɛng.

¹¹Há a vemo de ba mɔmɔ jwa-pomo na būm pwɛng o wɔgɔ, wô gaba. Rwak wô tɛ̀ tɛmɛ-nshi, ko bècung fwala bê gabsa, ko gul rwak gwô tɛs wɛ na gap.

¹²Jeng de jwa-pomo mo wô gaba, ko bê rangal bemat o be ye, ‘Būm pwɛng de yin a mɔmɔ ɛ̀ mó á gwɛ ɛ?’

¹³“Yaga ano, Darwey Dagwi Darwey a ye, ‘E ji shom hom mê tɛ̀ gul rwak gwo hwo, ko e ji lashe yey hom, mê tɛ̀ tɛmɛ-nshi ne tá, ko bècung fwala ve shom hom bê wey na wɛ.

¹⁴Mê gangas jwa-pomo de yin a ga mɔmɔ na būm pwɛng o mo, na wo gaba e vwel, na be hàla retis o hal. Ko jeng de wô gaba, wô wey na yin e tê wɛ, ko yin ê tɔk, me wɛ à Dagwi Darwey.’

¹⁵“Ano de mê shusha shom e ra jwa-pomo mo, na e ra vemo de ba mɔmɔ wɛ na būm pwɛng, ko mê yang in, ‘Jwa-pomo mo wà to sɛ́ wɛt, kɛ vemo de ba mɔmɔ wɛ na būm pwɛng —

¹⁶yɛn vɛ à bezarap Israyɛl de bá zarap e ra Yɛrusalɛm, ko yɛn á di negwi-ywey ne sángal tyang e ra pomo mo, jeng de vit à sangal tyang.’ Me Darwey Dagwi Darwey ma ha ano.”

¹⁷Dagwi Darwey a ye, “Ano arɔng, à mwasi, sɛt bayis mo e ra behâ bemat mo de be zarap yi na bare yey mɛn. Zarap e ra yɛn,

¹⁸na hwo ye, ‘Darwey Dagwi Darwey a ye: Gawey e ra beha de be tolo a bemat balow de be tɛ̀sɛ e vɔ, ko be yong a kayɛ yere bemat nerugu bang rato na be ra mɛ jàma neken bemat! Yin ê ra jàma neken bemat hom, ko yin a sè gyeng neken o nemin a?

¹⁹Yin a ga nɔ́ng me nerey wɛt e nuyel bemat hom, yaga na yin a sɛ̀ mɛ alkama e vwɔ tanga pyɛ̂ re tyɔng zɔng. Yin e mɔbɔs bemat de jeng mɛn ya rɔngɔl, ko vemo de a sé naka be kushu yin e tikis hɛn beken. Yi ano, yin e vɛ́sɛ a bemat hom bɔs, ko yɛn e wet betong na nebɔs min.’

²⁰“Yaga ano, Darwey Dagwi Darwey a ye, ‘Ma kyɛ́ me zakzak balow de be tɛ̀sɛ e vɔ de yin e ra mɛ jàma bemat. Mê hama vɛ yi e vɔ min, na me hala washak neken bemat de yin e ra jàma mɛn sede nenon.

²¹Mê hama nerugu bang rato min, na me sey ɛ bemat hom yi e vɔ min. Yɛn ê to sè pyɛ̂ jàma e vɔ min wɛt e ngamo nuyel. Ano, yin ê tɔk, me wɛ à Dagwi Darwey.’

²²“Yin a ga tɛ̀ neyey vê cik gbɛrɛk na nebɔs min mwa, ano de ma ga ra pyɛ de yê nɔng ɛn bengyip wɛt, ko yin a ga cɔgɔs bemat beves na yɛn a tik begwong beves mɛn wɛt, na yɛn a sey neken mɛn.

²³Yaga ano, e ngamo nuyel, yin ê to bɛrɛng negwi-ywey ne bɔs wɛt, kɛ pyɛ́ de yin e tē yê té, ko yê té wɛt. Mê sey ɛ bemat hom yi e vɔ min. Yi ano, yin ê tɔk, me wɛ à Dagwi Darwey.”