Read berom Yɛzɛkyɛl 14 Bible Online

Yɛzɛkyɛl 14 - berom bible

Yɛzɛkyɛl 14

¹Tuhak behak e ji bemakuk Israyɛl ba vey na me, ko ba sangal e nuyel hom.

²Ko Dagwi Darwey a vɛ̌ ha na me, a ye,

³“À Yɛzɛkyɛl, mwasi, bemat vemo ba ga tɛ̀ neyey mɛn e ra sap cī, ko ba ga tɛ̀ pyɛ̂ banɛn mɛn ye sè pyɛ̂ té bugurɛk e nuyel mɛn. Mê simo yɛn a vey vo byǎ na me a?

⁴“Ko di, ha na yɛn, na hwo yang ɛn: ‘Darwey Dagwi Darwey a ye: Kawɛ WoIsrayɛl de a ga nɔ̂ng cī yey mɛ, na a tɛ̀ pyɛ̂ banɛn mɛ be tɛ́ ɛ a yɛ pyɛ yé bugurɛk, ko mwa ano, a vey vo byǎ na zarap Dagwi, ko me Dagwi Darwey mê toyo a yɛ tyɛng na nepyak banɛn cī de e sap yɛ,

⁵yi ano, mê tɛ̀-e-yey, mê toyo na neyey BeIsrayɛl vey na me, yɛn vemo de ba ga kana ye waa à neyey mɛn e de sap cī vyes.’

⁶“Yaga ano, ha a BeIsrayɛl ngan: ‘Darwey Dagwi Darwey a ye: Tosho hin gabɔk, na yin a doyo yi e cī min, na yin a doyo bayis min yi e mwa pyɛ̂ byɛm-byɛm min.’

⁷“Yaga kawɛ WoIsrayɛl, kɛ hwak e ji bemat yére dyuk de a sé sangal na BeIsrayɛl, ba doyo a me mā na be tɛ̀ yey mɛn e ra sap cī, na be tɛ̀ pyɛ̂ banɛn mɛn ye tɛ́ ɛ a yɛn pyɛ̂ té bugurɛk e nuyel hom, ko mwa ano, yɛn a vey na zarap hom na be vo byǎ na yɛ yi na me, ko me Dagwi Darwey mê toyo a yɛn na byǎ mo.

⁸Mê sɛt bayîs repugu e ra yɛn, mê tɛ̀ ɛn be sè pyɛ dura na pyɛ cinat ha, na me pat ɛn yi e ji bemat hom, ano de yin ê tɔk, me wɛ à Dagwi Darwey.

⁹“Ka sede zarap hom a buru, ko a toyo a yin na hâ bɔs, a sé yaga me, Dagwi Darwey, ma ga tɛ̀ ɛ a ra ano, ko mê nára vwɔ̂ repugu hom e ra yɛ, na me wey na yɛ yi e ji bemat hom BeIsrayɛl.

¹⁰Ko mê tabak hɛn tyɛng — yɛ mwat de a vey vo byǎ mo tanga zarap o arɔng,

¹¹yaga na BeIsrayɛl be to ye rɛng yi na me, kɛ be to tɛ̀ bato mɛn ligis na mwa neburu mɛn wɛt. Ano yɛn ê sè bemat hom, ko mê sè Dagwi mɛn. Me Darwey Dagwi ma ha ano.”

¹²Dagwi Darwey a to ha na me, a ye:

¹³“À mwasi, ka sede vwel ha ra banɛn, ko ha sey tsak o na me wɛt, ko mê nára vwɔ̂ repugu hom e ra hɛ, mê bang gwông sɛ̂ pyɛ̂ re hɛ, na me vey na vyong e ra hɛ, na me wey na bemat hɛ mwa na yas hɛ.

¹⁴Ka Nowa, na Danyɛl tanga Iyɔp yɛn vemo betat, ba yang sè e ji hɛ, yɛn a yang sey neken mɛn nju mɛn zɔng yi na necik mɛn. Me Darwey Dagwi Darwey ma ha ano.

¹⁵Ka ma tomo ngyāma e vwel o na ye ngwɔgɔt hɛ, na he tɛ́ ɛ gbingiring, ko vit à mwat de a tɔk kwey e ji hɛ yaga ngyāma mo,

¹⁶ko ka bemat betat vemo ba yang sè e ji hɛ, ko me Darwey Dagwi Darwey, ma sira na neken hom, yɛn a yang tɔk sey nèy bewen kɛ behwông hɛ wɛt, ba yang sey bato mɛn yɛn nju mɛn zɔng, ko vwel o ha yang nàra gbingiring.

¹⁷“Kɛ ka sede ma vey na wal como e ra vwel o, ko me ye, Tik wal como wo kwey e vwel ó, ko ma wey na mwa bemasi, na yas yi e hɛ,

¹⁸mwa ano de bemat betat vemo ba yang sè e ji hɛ, me Darwey Dagwi Darwey ma sira na neken hom, yɛn a yang sey nèy bewen kɛ behwong wɛt, ko yɛn nju mɛn zɔng de ba yâng sey bato mɛn.

¹⁹Ko ka ma tomo na tumbang e ra vwel o, ko ma losho shom hom mwa na nemi e ra hɛ, na me wey na bemasi, na yas tanga ngyāma yi e hɛ,

²⁰ka Nowa, na Danyɛl tanga Iyɔp ba yang sè e hɛ, me Darwey Dagwi Darwey ma sira na neken hom, yɛn a yang sey nèy bewen kɛ behwong wɛt, yɛn a yang sey neken mɛn nju mɛn zɔng yi na necik mɛn.

²¹“Darwey Dagwi Darwey a ye, ‘Tàga jeng de mê tomo na pyɛ̂ wey nyas yê shɔt e ra vwel o, yɛ à wal como, na vyong, na ngyāma tanga tumbang, na ye wey na bemasi, na yas yi e hɛ!’

²²Mwa ano, bê tik ɛ bwang behak e ji hɛ, yɛn nèy bewen na behwong de bê hywit ɛn, yɛn ê vey na yin. Sede hwà di begwong mɛn na tomong ves mɛn, ko ê yang o lɔ̀ɔ na neves de ma vey mɛ e ra Yɛrusalɛm, na mwa pyɛ́ de ma vey mɛ e ra repomo mo.

²³Pyɛ́ de ma ra yê yang o lɔ̀ɔ jeng de hwà di negwɔn na tomong ves mɛn, ko hwô tɔk a sé zɔng-reng wɛt de ma ra pyɛ̂ mwa de ma ga ra e pomo mo. Me Darwey Dagwi Darwey ma ha ano.”