Read berom Yɛzɛkyɛl 16 Bible Online

Yɛzɛkyɛl 16 - berom bible

Yɛzɛkyɛl 16

²“À mwasi, dura a Yɛrusalɛm pyɛ̂ byɛm-byɛm de wa ga ra.

³Ha a wɛ pyɛ de me Darwey Dagwi Darwey ma sé ha e ra wɛ ngan: “Súsu mō tanga tɔ mo bá sè e sevwel Kanaan. Da mo á sè WoAmɔr, ko de mo á sè WoHiti.

⁴E tuk de bá tɔ o, ba yere cǒp mo wɛt, ko bá kus o na nshi na hwo sè haalal wɛt, bá mɔmɔ hwo na nevwashe kɛ bá bang o na pyɛ banga wɛt.

⁵Vit à mwat de á wok nemwishish kɛ á tosho reyɔm mo, na a ra a hwo pyɛ́ yemo, ko bá bomo hwo e majey, yaga bá byɛnɛng hwo tuk de bá tɔ o.

⁶“Má sè kwey bagat na hwo, ko ma di o hwá sè biring e nemî tɔ mo, ma yang o, ‘Sè kwen!

⁷Rās sede cɔgɔt ryat!’ Hwà ras, hwà tɛ́ o lwis, ko hwà tɛ́ o zing-hwong. Hwà tá bavasal, tot rato mo ha ras, ko mwa ano hwà rɔngɔl kpimit.

⁸“Ma to kwey bagat na hwo, ma bɛrɛng hwo, ko ma di hwà ga wul jeng de bê tɛ̀ yey na hwo. Ma shara hagât rugu hom e ra hwo, ko ma bang mɛ nekpimit mo. Ma sira a hwo, ko ma wuna me na sira na hwo, ko hwà ga tɛ́ o nwang. Me Darwey Dagwi Darwey ma ha ano.

⁹“Ano kwong, ma kus o na nshi, ma kus nemi de hwà liring hwo mɛ, ko ma mɔmɔ hwo na něy.

¹⁰Ma tɛ̀ a hwo rugu de ba kyɔrɔk tolo mo na nzem, ko ma tɛ̀ a hwo bekpatak rehwo berat vit à yere mo. Ma tɔrɔ hwo na rugû linen rwat, ko ma bang o na pyɛ banga ye silikyi.

¹¹Ma tɔrɔ hwo na yɔ̀m dyéngere ryat. Ma tɛ̀ a hwo nerwěy e vɔ, na bèlɛlɛ e fwɔ,

¹²na yɔbɔ e wol, na dyam-tong e betong tanga kpin rwat tyɔng wɛt e rato.

¹³Ano, ba tɔrɔ hwo na dyam shinang na dyam pyɛng, ko berugû tɛ́sɛ mo ba sé ve linen puruk, na ve silikyi tanga vemo de ba tɔrɔ vɛ yɔkyɔk. Pyɛ̂ re mo ba yongos yɛ na nemuk alkama myeenen, na shok tanga něy pwat. Hwà tɛ́ o zɛrɛ tyɔng wɛt, hwà jam na hwo sè hwâ gbɔng gwɔ̀m.

¹⁴Hwà tɛ̀ za de ha shara hɛ e kayɛ yere bemat jey yaga nezɛrɛ mo de na sé gyat, yaga gbɔng nedyɛt hom de ma tɛ̀ e ra hwo. Me Darwey Dagwi Darwey ma ha ano.

¹⁵“Ko mwa ano, hwà tɛ̀ gap mo e ra nezɛrɛ mo, hwà hwo ra nedeneves yaga za de hwà vɔk. Hwà sǎ e de râ nɛ na kawɛ mwat de a sé kwey.

¹⁶Hwà hashe berugu mo behak vɛ bùm rat ko hwo yong a tó mo mɛ nekwɔn sekwit e ra garang na hwo ragas nedeneves e ji nɛ, ba ga sang ra ano wɛt, ko bê sang ra ano e nuyel wɛt.

¹⁷Hwà to jut pyɛ̂ tɔrɔ yê dyam shinang na dyam pyɛng hom de ma nɔng o, ko hwà yong a tó mo mɛ cī beras o, yaga na hwo ra nedeneves na yɛn.

¹⁸Hwà hashe berugu mo de ba kyɔrɔk tolo mo, vemo de ma nɔng o, hwà tɛ̀sɛ a pyɛ́ mo, ko hwà nása a yɛ něy pwat na pyɛ̂ nesang hyɔɔlɔl de ma nɔng o.

¹⁹Ano arɔng, kpam-tuk de ma nɔng o — ma nɔng o pyɛ̂ re yê nemuk myeenen, na něy pwat tanga shok de ya dal mwa na nerat ko hwà nása a yɛn yɛ sede pyɛ̂ nesang hyɔɔlɔl, yaga na hwo pɛngɛ a cī mo yey. Me Darwey Dagwi Darwey ma ha ano.

²⁰“Ano arɔng, hwà hashe nèy mo bewen na behwong de hwà tɔs a me, ko hwà nása nɛ sede nɔrɔ yas de be rangas a cī. Hwà ra ano sede nedeneves o na vey a hwo wɛt!

²¹Hwà hashe nèy hom na hwo nása nɛ sede nɔrɔ yas de be rangas a cī.

²²E ji ragas pyɛ̂ byɛm-byɛm yemo, mwa na nedeneves mo, hwà ka bare na jeng nehwong mo, na jeng nekpimit mo, tanga jeng de hwá kyě biring e nemî tɔ mo wɛt.”

²³Darwey Dagwi Darwey a ye: “E ra mwa neves de hwà ga ragas: Gawey! Gawey e ra hwo!

²⁴Hwà lɔk a tó mo gàgbang, ko hwà yong a tó mo kwɔ̂n sekwit hê garang e kahɛ lala.

²⁵E tô kahɛ hyok, hwà lɔk a tó mo kwɔn sekwit. Hwà ye waa a nezɛrɛ mo, ko hwà nára a kawɛ mwat de a sé kwey tó mo, yi ano, hwà ga gwɛ̌ nevês nedeneves mo.

²⁶Hwà ga ra nedeneves na BeMisra, bemat vwara mo de ba kat gwot. Hwà ban o e de ragas nedeneves na hwo cɔgɔs mɛ̀ shom hom.

²⁷“Yaga ano, ma ga nára vwɔ hom gwô repugu cik e ra hwo, ma ga tɛt nu mó mo hê nerat hom vey na hwo. Ma ga nára hwo e vɔ BeFilisti de be ra repugu na hwo, ko yɛn e wok rekyen negwɔn gwot mo tyɔng wɛt.

²⁸“Hwá ragas nedeneves mo na BeAsirya, yaga nemó de hwá kyě ragas ná vey á hwo wɛt. Hwá tɛ́ o devwes mɛn, ko mwa ano yɛn á ka vey a hwo wɛt.

²⁹Hwá gwɛ̌ nedeneves na Babilɔn, vwêl bejik, ko vemo mwa bá ka vey a hwo wɛt.”

³⁰Darwey Dagwi Darwey a ye, “Hwà kat telê bayis, hwà ga kyě gǎ e de râ pyɛ́ yemo na bemat vemo mwa sede devwes sana vo rekyen.

³¹Hwà lɔk a tó mo gàgbang e tô kahɛ hyok, ko hwà yong a tó mo kwɔn sekwit hê garang e kahɛ lala! Mwa ano, hwó ra sede devwes wo mwin wɛt, yaga hwó kyɛgɛs hwo serês pyɔlɔ fwom o.

³²Hwà sé hwâ nejwang, hwó dyɛngɛs na beras beduk e tô rwas mo!

³³Beras be nɔngɔs mwa bedebeves nenɔrɔ, ko hwo hwó nɔngɔ̂s berâs yey mo mó nenɔrɔ e negya, hwó nɔngɔs hɛn pyɛ̂ bang nu na yɛn a vɛ̀sɛ na hwo yi e kagwa yaga râ nejwang na hwo.

³⁴Yi ano, hwà sé detu na bwang beha e de ragas nedeneves mō, vit à mwat de e jama hwo na a ra nedeneves na hwo. Be nɔngɔs hwo dyâm nejwang o wɛt, e hwo de hwó nɔngɔs hɛn yɛ e negya, yaga ano de hwà sé detu na bwang mɛn.”

³⁵“Yaga ano, à hwo Yɛrusalɛm devwes! Wok pyɛ de Dagwi Darwey a sé ha.

³⁶Darwey Dagwi Darwey a ye, ‘A remo, cwey pyɛ́ vyes mo ya ga nusu wɛshɛrɛk, ko ba ga hywɛrɛm hwo e de nedeneves na bemât yey mo, na yaga mwa cī mo, na yaga nemi nèy mo de hwà ga mɔbɔs na hwo nása a cī.

³⁷Yaga ano, mê tula mwa bemat yey mo de hwà kana simo hɛn, mwa vemo de hwà tɛ̀ yey na yɛn, na vemo de hwà kyɛ́ o hɛn. Mê tula hɛn e ra hwo yi e kawɛ bak, ko mê hywɛrɛm hwo na yɛn a bɛrɛng nekpimit mo mwa.

³⁸Mê gang o na shɔt sede yè beha de be ragas nejwang, ko bé lusha nemi bemat arɔng, ko mê tabak hwo na shɔt reku e ji shom hom, na repugu hom.

³⁹Mê nára hwo e vɔ mɛn, ko yɛn ê gangas begagbang sekwit mo, yɛn ê bugut nekwɔn garang ne ragas nedeneves mo. Yɛn ê paa berugu mo, ko be hashe pyɛ́ de hwá kyě tɔrɔ hwo mɛ yɔkyɔk, ko bê hala hwo kpimit sede jeng tɔ́ mo.’

⁴⁰“Yɛn ê tula regyɛng bemat e ra hwo, ko yɛn ê tó o na beta, ko be tó o na bewal mɛn cɛk o cɛk o arɔng.

⁴¹Yɛn ê dak kya e nelɔ mo, ko bê tik bagyɛng beha be di de be tak a hwo. Mê tɛ̀ hwo tik nedeneves, ko hwô tik nɔngɔs berâs yey mo nenɔrɔ arɔng.

⁴²Ano de shom hom yê ye rɔ̀s, ko repugu hom rê to sè e ra hwo wɛt. Mê sè tiing, ko mê to wok shom wɛt.

⁴³A remo de hwà ga to bare na jeng nehwong mo wɛt, ko hwà ga nɔ́ng me shom sizɔng na mwa pyɛ́ de hwà ga ra, yaga ano, ma ga toyo na negwɔn neves mo e ra to mo. Hwà ga gwɛ̌ negwɔn gwot nemo e ra bwang pyɛ̂ byɛm-byɛm de hwá ragas wɛt a? Me Darwey Dagwi Darwey ma ha ano!”

⁴⁴“Bemat bê ha cinat ha yemo e ra hwo Yɛrusalɛm, de ya ye: Hwong e raa negwɔn neng mɛ.

⁴⁵Hwà sé hwông neng mo mwin, hwà kyɛ́ o rwas mo mwa na nèy mo. Hwà sé sede begwa mo behwong de ba ye zak a beras mɛn na nèy mɛn. Neng mo á sè WoHiti, ko da mo á sè WoAmɔr.

⁴⁶Gwa mo kunat hwong o à Samariya de á sangal na behwóng mɛ e rwa bato na yin, ko gwa mo swɛl hwong o de á sangal e rwa batin na yɛn, à Sɔdɔm tanga behwóng mɛ.

⁴⁷Hwá raa begwong mɛn na ragas pyɛ̂ byɛm-byɛm mɛn zɔng wɛt, ko e ji jeng tyɔng, hwá dal ɛn na neves e mwa begwong mo.

⁴⁸“Me Darwey Dagwi Darwey ma sira na reza hom, ma ye: Sɔdɔm, gwa mo hwong swɛl na behwóng mɛ ba ga ra pyɛ́ vyes de hwo na behwóng mo yin a ga ra wɛt.

⁴⁹Burû Sɔdɔm gwa mo hwong á het ngan: Yɛ na behwóng mɛ bá ra kaa, bá tē shɛrɛk na pyɛ́, yɛn á tē bɛs na pyɛ̂ nedanerey, ko yɛn á sɛlɛ bepɛng na vemo de ba bidɛ wɛt.

⁵⁰Yɛn á toros bato mɛn, ko yɛn á ragas pyɛ̂ byɛm-byɛm e bayis hom. Yaga ano, má wey na yɛn, remo-remo de ma di ano.

⁵¹“Samariya wà ga ra rebit banɛn mo wɛt, hwà ga ra pyɛ̂ byɛm-byɛm de ya dal myɛn, ko hwà ga tɛ̀ begwa mo behwong be bɛrɛng, yɛn a sé cik, sede yɛn a tyɛngrɛ hɛn na mwa pyɛ̂ byɛm-byɛm de hwà ga ra.

⁵²Ko di hwo arɔng, niri na rekyen de hwó sɔ. Banɛn mo ba dal vê begwa mo behwong na neves, ko ka sede ba tyɛngrɛ vɛ na bemɛ̀n, ko a sé sede yɛn a ga ra pyɛ vyes cak wɛt. Yɛn a dal o na necik. Yaga ano, hwo arɔng, tik na hwo vo rekyen, na hwo niri na byɛs, yaga nevês negwɔn mo nà ga tɛ̀ begwa mo be bɛrɛng yɛn a sé cik.”

⁵³“Mê toyo na yin yi e sesam. Mê toyo á Sɔdɔm na behwóng mɛ na pyɛ̂ nedanerey mɛn, mê ra a Samariya na behwóng mɛ tyɛng ano arɔng, ko mê toyo a hwo, à Yɛrusalɛm na myo e jeng o arɔng,

⁵⁴yaga na hwo niri na rekyen, na byɛs yi na mwa pyɛ́ vyes de hwà ga ra, yi ano, bê wɔrɔk hɛn.

⁵⁵Jeng de begwa mo behwong wɔgɔ, Sɔdɔm na behwóng mɛ bê toyo sede raane, ko Samariya na behwóng mɛ bê sè ano arɔng, ko hwo na behwóng mo yin ê toyo sede raane arɔng.

⁵⁶Hwá ra ryɔgɔ̂t gwà mo Sɔdɔm e nepɔlɔ nere de hwá sè ra kaa,

⁵⁷gyam na be kulu neves mo wɛt a? Ko di, a remo hwà sé pyɛ ryɔgɔt na BeƐdɔm, na bemat vwara mɛn tanga BeFilisti, yɛn mwa de ba gwɔrɔ hwo ko yɛn e byɛs o.

⁵⁸A sé gbing-gbing na hwo sɔ reyɔm yaga gwot tanga pyɛ̂ byɛm-byɛm de hwà ga ragas. Me Dagwi Darwey ma ha ano.”

⁵⁹Darwey Dagwi Darwey a ye, “Mê teshe na hwo tyɛng na negwɔn mo, yaga hwà kyɛ́ o sana gyeng sira mo, ko hwà ga kwɔrɔ wuna-na-sira mo na me.

⁶⁰Mwa ano, mê bare na wuna-na-sira hom na hwo e nehwong mo, ko mê to wuna me na sira de hê nàra gbak-gbak.

⁶¹Ano, hwô bare na pyɛ́ de hwá kana ra, ko hwô vo rekyên yɛ jeng de ma jut begwa mo behwong — kunat na swɛl — ko ma nɔng o vɛ sede behwóng mo, mê ra ano e ra pyɛ mwa de mê nɔng o e ji wuna-na-sira hom na hwo.

⁶²Mê to wuna me na sira na hwo gak, ko hwô tɔk, me wɛ à Dagwi Darwey.

⁶³Yi ano, hwô bare, ko ê sè a hwo bùrum, hwô tɔk to wunta nu mo wɛt yaga rekyen, jeng de ma hala a hwo mwa pyɛ́ de hwà ga ra. Me Darwey Dagwi Darwey ma ha ano.”