Read berom Yɛzɛkyɛl 17 Bible Online

Yɛzɛkyɛl 17 - berom bible

Yɛzɛkyɛl 17

¹Dagwi Darwey a ha na me, a ye,

²“À Yɛzɛkyɛl, mwasi, ha a BeIsrayɛl cinat ha na gwɔrɔ-há hemo.

³Yang ɛn: ‘Darwey Dagwi Darwey a ye: “ ‘Gbɔng kim, wo bagbɔng bafabak, de ba vɔk nenu nelis, na babok pyak vê bùm pyak, wa vey e Lɛbanɔn. Wa wɔ pat tô cɔgɔt sida,

⁴wa kwɔrɔ túlu pas hê cɔgɔt o. Wa kyè mɛ vɔk e vwêl bejik, wa wɔ tus hɛ e gbɔng pomo bemat byɛ.

⁵Ano wa jut yerê cɔgɔt vwel o, wa wɔ̀ tus e bwi de gwa siri naka. E dem nshi polos wa yong yɛ̀ sede lâng wùrum.

⁶Cɔgɔt o ya turuk ko ya tɛ́ ɛ cɔgɔt anap, ya ras vɔk e rak o wɛt, ko ya shara hɛ. Nelang o na doyo wɔ̀ sɛ kim o, berinis o ba rás tsik e vwel. Ano, ya tɛ́ ɛ cɔgɔt anap, ya tá nelang, ya tá berang pyak.

⁷Gbɔng kim o hwak wa to yi, wa vɔk bafabak barey na babok pyak. Ko di! Tin anap o ha nára berinis hɛ wɔ̀ sɛ kim o. Ha nára nelang hɛ vɔk na wɛ, yaga na wo tɛ̀sɛ a hɛ nshi. Yi e dem de ba tus ɛ hɛ,

⁸ba ga kana zep hɛ e vwel de ha siri bagat na nshi polos, yaga na he tɛ̀ nelang, na he tɔs nèy. Ha sé tin anap rat.’

⁹“Yē, Darwey Dagwi Darwey a ye ngan: “Tin o hê nàra naka a? Kim o wô luyu berinis o, wò hama nèy o, yaga na berang bepas be hworok wɛt a? Bê jāma vwɔ̂ gap, kɛ bemat pyak na be luyu berinis o wɛt.

¹⁰Jeng de ba to zep hɛ, hê dal a? Jeng de gul rak gwa hwo e ra hɛ, hê hworok hywiri, hê hworok e dem de ha kana sé ras ɛ wɛt a?”

¹¹Dagwi Darwey a to yang me,

¹²“Rangâl BeIsrayɛl, yerê sogo nehywɛ ngan: Yin a tɔk cap gwɔrɔ-há mo a? Yang ɛn, gbɔng gwɔ̀m vwel Babilɔn á vey e Yɛrusalɛm, á jut gbɔng gwɔ̀m o na begbɔng bemat fwom mɛ, á kyè mɛ vɔk e Babilɔn.

¹³A jut hwak e ji bemat lɔ gwɔ̀m o, a wuna hɛ na sira na yɛ, ko a tɛ̀ ɛ a sira na a raa hɛ — e jeng o a ga kana hashe begbɔng bemat vwel o e sesam,

¹⁴na a tɛ̀ bemat segwɔm o be dyɛng bato mɛn, be tɔk sogo nehywɛ wɛt, na be gyeng sira de yɛn a ga ra a yɛ.

¹⁵Ko gbɔng gwɔ̀m Yuda mo a sogo a yɛ nehywɛ, a tomo betom vɔk e Misra na be wɔ̀ sɛ̀ a yɛ bedwa tanga gbɔng regyɛng bemat como. Ê kyɛm a di wɛng bɛ? Mwat de a ra pyɛ́ yerê yemo ê hywit ɛ a? Ê tɔk kwɔrɔ wuna-na-sira de a ga sira e ra hɛ na a nusu hɛ hyɔl sana tabak wɛt arɛt?

¹⁶“Me Darwey Dagwi Darwey ma sira me, ma ye: Mwin gbɔng gwɔ̀m womo ê ku e vwel Babilɔn, yaga a ga sila wuna-na-sira de a ga ra na gbɔng gwɔ̀m Babilɔn wɛt, yɛ de a tɛ̀ ɛ e ra gwofwa negwɔm o.

¹⁷Farawo, gbɔng gwɔ̀m Misra, de a vɔk bemat como vê gap sizɔng ê kyɛm a sɛlɛ hɛ na como mo wɛt, a remo de ba ga lɔk pyɛ gang jwa-pomo ko ba ga tula gwofongol na be vey bagat na pomo mo, yaga na be yel, be mɔbɔs bemât he pyak.

¹⁸Ko ê kyɛm a hywit ɛ wɛt yaga a ga gyeng sira mɛ wɛt, a ga kwɔrɔ wuna-na-sira de a ga kana ra yi na nɔ̂ng nu mɛ e ra pyɛ́ yemo.

¹⁹“Ano, me Darwey Dagwi Darwey ma sira, mê tabak hɛ yaga a ga kwɔrɔ wuna-na-sira de a ga kana sira na reza hom na a gyeng hɛ, ko a de tɔk sila hɛ wɛt.

²⁰Mê tɛ̀ a yɛ segun na me vo ɛ mɛ. Mê kyè na yɛ vɔk e vwel Babilɔn na me tabak hɛ e hwomo, yaga a gyeng ha hom na tsak o wɛt.

²¹Bemat de a kasa de ba dal mwa na tô como, bê mɔbɔs vɛ na wal como, ko vemo de ba dal, bê shara hɛn e kagwɛ rwa gul. Ano de yin ê tɔk, e me Dagwi Darwey de ma ha ano.”

²²Darwey Dagwi Darwey a ye: “Me pyɛ hom mê pat túlu pas, yi e ra rak cɔgɔt sida lyis, mê yong hɛ. Mê kwɔrɔ lang de ha túruk yi e ra rak lang de ha sé tulu. Mê wɔ̀ zep hɛ e ra rak raku lwis.

²³E ra tɛ̂t rakû Israyɛl mê wɔ̀ tus hɛ, yaga na he tɛ̀ nelang na he mara nèy, ko hê tɛ́ ɛ gbɔng cɔgɔ̂t sida. E nɛn yɛ, kayɛ yerê benon yê sangal ɛ, e necam nelang o, kayɛ yerê benon bafabak yê tɛ̀ barɛngɛ e ra yɛ.

²⁴Mwa cɔ́gɔt hey yê tɔk, e me wɛ à Dagwi Darwey. Me gyirik cɔgɔt lyis, me tut na cɔgɔt shɛl. Me tɛ̀ cɔgɔt berang gwim-gwim ye hworok, ko me tɛ̀ cɔgɔt cogot ye vɔk berang pyak. Me Dagwi Darwey ma ha ano. Mê ra pyɛ de ma ye mê ra.”