Read berom Yɛzɛkyɛl 18 Bible Online

Yɛzɛkyɛl 18 - berom bible

Yɛzɛkyɛl 18

¹Dagwi Darwey a ha na me, a ye,

²“Yin e bare sɛ́ na cinat ha de bemat be sǎ e de ha mo e ra vwel Israyɛl ɛ? Be tē: “ ‘Beda ba ga re nèy anap ne jwaatat, ko e yìn nèy mɛn de be kushu na nejwaatat o.’

³“Me Darwey Dagwi Darwey ma sira na neken hom wɔgɔ, yin ê to ra fwom na cinat ha hemo e Israyɛl wɛt.

⁴Di in, neken kawɛ mwat na sé nenang, nekên da mwa na ne hwey o. Mwat de a ra banɛn e yɛ wɛ de ê ku.

⁵“Mwat de a sé cik, ko e gas badu e tē, ko e ra necik,

⁶mwat de e re pyɛ́ de ba ga nára e berahwol sekwit wɛt, mwat de e vɔk cwey pyɛ̂ cī de BeIsrayɛl be re a yɛ fongol wɛt, mwat de e dyɛng na hwâ mwat vwara mɛ na a tɛ̀ ɛ ligis wɛt, mwat de e dyɛng na hwā e jeng berang mɛ wɛt,

⁷mwat de e mɔt mwat wɛt, mwat de e toyo a mwat na pyɛ de a nɔng e lek, mwat de e sey ɛ pyɛ mwat na retek wɛt, mwat de e nɔngɔ̂s vemo de ba vɔk vyong pyɛ́, mwat de e nɔngɔ̂s vemo de ba sé kpimit berugu,

⁸mwat de e nɔngɔs hwɔpɔ na ndi wɛt, mwat de e kyɛ́ ɛ ragas neves, mwat de e gas a bemat de be ra cuna badu e tē,

⁹mwat de e gyenges Badu hom, e raa nu de ba nɔng na nehywɛ, ko e ra pyɛ́ na tsak o — yerê mwat wane a sé cik e bayis hom, yaga ano, ê sè kwen. Me Darwey Dagwi Darwey ma ha ano.

¹⁰“Ka sede mwat o a vɔk hwey wen mɛ de a kat yol, na mɔbɔs bemat, ko e ragas a bemat cak e ji pyɛ́ yemo,

¹¹mwa ano de da mɛ e sang ra yɛ wɛt, ko e re pyɛ́ de ba ga nára e berahwol sekwit, e dyɛng na hwâ mwat vwara mɛ na a tɛ̀ ɛ ligis,

¹²e mɔt bepɛng na vemo de be jama pyɛ́ zii, e seres ɛ̀ pyɛ̂ bemat na retek, e toyo a mwat na pyɛ de a nɔng e lek wɛt, e vɔk cwey re a cī fongol, e ragas pyɛ́ de ya sé byɛm-byɛm,

¹³e hwɔpɔs a bemat pyɛ́ na ndi kɛ pyɔlɔ vyes — yerê mwat womo ê dal ko tyɔng wɛt. A remo de a ga ra pyɛ́ vyes yerê yemo, mwin ê ku, ko nemi mɛ nê sè e ra to mɛ.

¹⁴“Ko ka sede mwat o a vɔk wen mɛ, ko e bɛrɛng mwa banɛn de da mɛ a ga ra, ko e raa nekyɔ̌n da mɛ mo wɛt,

¹⁵e re pyɛ́ de ba ga nára e berahwol sekwit wɛt, kɛ e vɔk cwey pyɛ̂ cī de BeIsrayɛl be re a yɛ fongol wɛt, e dyɛng na hwâ mwat vwara mɛ na a tɛ̀ ɛ ligis wɛt,

¹⁶e mɔt mwat wɛt, e toyo a mwat na pyɛ de a nɔng e lek, e sey ɛ pyɛ mwat na retek wɛt, e nɔngɔ̂s vemo de ba vɔk vyong pyɛ́, e nɔngɔ̂s vemo de ba sé kpimit berugu,

¹⁷e kyɛ́ ɛ ragas pyɛ́ vyes, e hwɔpɔs a bemat pyɛ́ na ndi kɛ pyɔlɔ vyes wɛt, e raa nu hom ko e gyenges Badu hom — yere mwat womo ê ku yaga banɛ̂n da mɛ wɛt, ko mwin, ê se kwen.

¹⁸Ko da mɛ, yaga a kat yol, e seres ɛ̀ pyɛ̂ bemat na retek, e sang ra a bemat mɛ pyɛ ryat wɛt, ko mwin, mwat womo ê ku yaga banɛn mɛ.

¹⁹“Mwa ano, yin ê rangal yin ye, ‘Yaga sɛ́ de wen o ê sɔ reyɔm banɛ̂n da mɛ wɛt ɛ? Ka sede wen o a gas badu e tē ko a ra necik, a gyeng mwa Badu hom naka, ko mwin, ê sè kwen.’

²⁰Mwat de a ra banɛn ê ku. Hwey hê sɔ reyɔm yaga banɛ̂n da mɛ wɛt, ano arɔng, da kɛ neng ê sɔ reyɔm yaga banɛn hwey o wɛt, necik wo cik nê sè nemɛ, ko nevês wo neves nê sè nemɛ arɔng.

²¹“Ko ka sede mwat vwes a hala mwa banɛn de a ga ra, a gyeng Badu hom na a gas badu e tē, ko a ra necik, ko mwin ê sè kwen, ê ku wɛt.

²²E ngamo nuyel vit à banɛn de a ga ra de bê to bare na vɛ e ra yɛ. A rɔda sè kwen mwin, yaga tomong mɛ de ba sé cik.

²³Me Darwey Dagwi Darwey ma ye: Yin e bare, me wok netâ bɛrɛng rekû mwat vwes a? Tyɔng-tyɔng wɛt, me dal na simo me di a doyo yi e banɛn mɛ na a sè kwen.

²⁴“Ko ka sede mwat de a sé cik a hala necik mɛ na a ra banɛn yi na raà mwa pyɛ̂ byɛm-byɛm de bemat beves be ragas, a sé naka na a sè kwen a? Bê bare na tomông de ba sé cik de a ga kana ra vey e jeng o wɛt, ê ku mwin yaga nevit tsak o de ba ga gang ɛ na nɛ tanga banɛn de a ga ra.

²⁵“Ko yin e tē, ‘Pyɛ de Darwey e ra ya sé tyɛng wɛt.’ Wet in betong na me, à yin BeIsrayɛl. Yin e bare, gwông râ pyɛ́ hom gwa sé tyɛng wɛt a? E pyɛ́ de yin e ra de ya sé tyɛng wɛt e negya wɛt a?

²⁶Jeng de mwat de a sé cik a doyo yi e necik mɛ, a ra pyɛ vyes, ko a ku, a ku yaga pyɛ buru de yɛ pyɛ mɛ a ra.

²⁷Ano arɔng, jeng de mwat vwes a hala neves mɛ na a gas badu e tē, na a ra necik, e sey neken mɛ.

²⁸A remo de a ga kasa na a hala mwa pyɛ́ vyes de á kana ra, mwin ê nàra kwen, ê ku wɛt.

²⁹Ko mwa ano yin BeIsrayɛl yin e tē, ‘Pyɛ de Darwey e ra ya sé tyɛng wɛt a?’ A sé e pyɛ́ de yin e ra de ya sé vyes wɛt a?

³⁰“Ko di in, me Darwey Dagwi Darwey, ma sé ha a yin BeIsrayɛl, mê ra a kawɛ e ji min shɔt yi na pyɛ́ de e ragas. Doyo hin yi e banɛn min, hala hin mwa neves min, yē in jaram yi e pyɛ́ de ye tɛ̀ yin buru.

³¹Gas in na mwa neves de yin a ga ragas a me, ano, yin jama a bato min yey pyas na gabik pas! Yaga sɛ́ de yin ê kushu, à yin BeIsrayɛl ɛ?

³²Me Darwey Dagwi Darwey me wok netâ bɛrɛng rekû mwat hwak wɛt, yaga ano, doyo hin yi e banɛn min na yin a sè beken!”