Read berom Yɛzɛkyɛl 2 Bible Online

Yɛzɛkyɛl 2 - berom bible

Yɛzɛkyɛl 2

¹Ko a yang me, “À mwasi, sogo e tumal. Mê ha na hwo.”

²Jeng de a sé ha neha mo, ko Gabik Dagwi ha hwo e ra me, ha tɛ̀ ma sogo e ra bol hom, ko ma wok a sé ha na me.

³A ye, “À mwasi, ma sé tomo hwo vɔk na BeIsrayɛl, yɛn yerê sogo nehywɛ. Ba ga sogo a me nehywɛ, yɛn na bedabeda mɛn ba ga buru a me pere vey e yunung.

⁴Yere mɛn ya sé gbàrak ko ye wok fwong wɛt. Ma sé tomo hwo na yɛn, ko hwo yang ɛn, ‘Wok in hâ Darwey Dagwi Darwey.’

⁵Ka yɛn a wet betong, kɛ wɛt ayi, yerê sogo nehywɛ yemo yê tɔk zarap Dagwi á sè e tē mɛn.

⁶“Ko hwo, à mwasi, hwo wok bengyip mɛn, kɛ pyɛ de yɛn ê ha wɛt, mwa ano de a sé sede shik na rɔgɔ ba gwɔrɔ hwo, ko hwà sé sangal e tê lyāng. Hwo wok bengyip neha mɛn, kɛ hwo tele hwo bɛ́rɛng mɛn wɛt, yaga yɛn a sé yerê sogo nehywɛ.

⁷Hwo há a yɛn neha hom, kɛ yɛn a wok, kɛ yɛn a kyɛ́ ɛn nà wok, yaga yɛn a sé yerê sogo nehywɛ.

⁸“Ko hwo, à mwasi, wet betong na pyɛ de me ha a hwo. Hwo kwon sè mwat sogô nehywɛ sede yerê sogo nehywɛ wɛt. Wunta nu mo na hwo re pyɛ de mê nɔng o.

⁹Sede ma bɛrɛng, ko ma di ba nára vwɔ cik vey na me, ko gwa vɔk bwok-basa e gunung e ji mo.

¹⁰A shara gwɛ̀ e nuyel hom, ko gwà vɔk jɛk e nuyel o mwa na bama mo, ba jɛk ɛ̀ neha lashe yey, na sesin tanga gawey.”