Read berom Yɛzɛkyɛl 20 Bible Online

Yɛzɛkyɛl 20 - berom bible

Yɛzɛkyɛl 20

¹Á sè e tuk hê kuru hê pwɛl gwo netungun gwo shey he netaama de behak e ji bemakuk Israyɛl bá vey vo byǎ na Dagwi Darwey. Yɛn a sangal e nuyel hom.

²Ko Dagwi Darwey a ha na me, a ye,

³“À mwasi, ha na bemakuk Israyɛl o, na hwo yang ɛn: ‘Darwey Dagwi Darwey a ye: Yin a vey vo byǎ na me arɛt a? Ma sira na reza hom, mê wok vô byǎ min wɛt. Me Darwey Dagwi Darwey ma ha ano.’

⁴“À mwasi, hwà ga yong o na hwo yɛrɛ a yɛn shɔt a? Hwà ga yong o na hwo yɛrɛ a yɛn shɔt a? Hwo ɛn na pyɛ̂ byɛm-byɛm de bedabeda mɛn bá ra.

⁵Yang ɛn: Darwey Dagwi Darwey a ye: Tuk de ma kasa Israyɛl, ma nára vwɔ hom e rak o na me sira a yerê Yakɔp, ko ma dura tó hom na yɛn e Misra. Ma to nára vwɔ hom e rak o ko ma yang ɛn: Me wɛ à Dagwi Darwey, Dagwi min.

⁶E tuk o, ma sira a yɛn, mê pat ɛn yi e Misra vɔk e sevwel de ma ga jama a yɛn, vwel de ha siri, ha vɔk pyɛ́ shɛrɛk, ko ha dal bwang bavwel mwa na nerat.

⁷Ma yang ɛn: Kawɛ e ji min a ye zak à pyɛ̂ byɛm-byɛm de yin a tɛ̀-yey na yɛ, yin kwon tɛ̀ bato min ligis na cī vyes yê Misra wɛt. Me wɛ à Dagwi Darwey, Dagwi min.

⁸Ko yɛn a sogo a me nehywɛ, yɛn a tɛ̀ tong na ha hom wɛt. Vit a hwak e ji mɛn de a ye zak a pyɛ̂ byɛm-byɛm de yɛn a tɛ̀ yey na yɛ, yɛn a hala cī vyes yê Misra wɛt. Ano, ma ye mê shusha lashê yey hom e ra yɛn, na me tɛ̀ shom hom ye hwo e ra yɛn e sevwel Misra.

⁹Ko ma ra ano wɛt, yaga ra ano hê tɛ̀ yere cak ye byɛs reza hom, yaga e nuyêl yére bemat jey de yɛn a sangal na yɛn, ma ga kana tɛ̀ yére mo ye tɔk ma ga kana sira mê pat BeIsrayɛl yi e sevwel Misra.

¹⁰“Ano kwong, ma pat ɛn yi e Misra ko ma kyè na yɛn vɔk e hêy gbingiring.

¹¹Ma nɔng ɛn Badu hom, ko ma basa a yɛn shɔt hom de a sé yi na gyeng yɛ de bemat be sɛ̀ neken.

¹²Ano arɔng, ma nɔng ɛn Negasi Shábat na ne sè pyɛ dura e tē hom na yɛn, yaga na yɛn a tɔk, e me Dagwi Darwey de me tɛ̀sɛ hɛn jɛrɛ.

¹³Ko mwa ano, yɛn BeIsrayɛl ba sogo a me nehywɛ e hêy gbingiring. Yɛn a kyɛ́ ɛn nà gyeng Badu hom, yɛn a byɛs shɔ̄t hom de, yi na gyêng yɛ bemat be sɛ̀ neken, ko yɛn a tɛ̀ Negasi Shábat hom ligis tyɔng wɛt. Ma yong e yey hom na me tik nepep shom hom na lashê yey hom sizɔng ne hwo e ra yɛn e hêy gbingiring, na me wey na yɛn.

¹⁴Ko ma ra ano wɛt, yaga ra ano hê tɛ̀ be byɛs reza hom e ji yére bemat jey de ma pat ɛn e bayis mɛn.

¹⁵Ano arɔng, ma sira a yɛn e hey, mê vey na yɛn e vwel de mà kana nɔng ɛn wɛt, vwel de ha siri, ko ha vɔk pyɛ́ shɛrɛk, vwel de ha dal kahɛ mo na nerat,

¹⁶yaga yɛn a ye zak a nu de ma nɔng ɛn, yɛn a gyeng Badu hom wɛt, ko yɛn a tɛ̀ Negasi Shábat hom ligis, yaga neyey mɛn na ga wɛrɛn e de sâp cī.

¹⁷“Mwa ano, ma wok nemwishish mɛn, ma dul tó hom sana wey na yɛn, ko ma yɛnɛ na yɛn e hey wɛt.

¹⁸Ma yang nèy mɛn e hey: Yin kwon raa badu bedabeda min, kɛ yin gyeng nu de yɛn a nɔng in, kɛ yin tɛ̀ bato min ligis na cī mɛn wɛt.

¹⁹Me wɛ à Dagwi Darwey, Dagwi min. Gyeng in Badu hom, tē in naka na yin a gyeng nu hom mwa.

²⁰Gyeng in Negasi Shábat hom jɛrɛ, tik na ne sè pyɛ dura e tē hom na yin, yaga na bemat be tɔk, me wɛ à Dagwi Darwey, Dagwi min.

²¹“Ko nèy o na sogo a me nehywɛ, yɛn a kyɛ́ ɛn nà gyeng Badu hom, yɛn a raa nu de ma nɔng ɛn wɛt, a sé e yɛ̄ de, ka sede mwat a gyeng naka ko ê sè kwen. Yɛn a tɛ̀ Negasi Shábat hom ligis. Ma yong e yey hom na me tik nepep shom hom na lashê yey hom sizɔng ne hwo e ra yɛn e hey.

²²Ko ma nára vwɔ hom e ra yɛn wɛt, yaga ra ano hê tɛ̀ be byɛs reza hom e ji yére bemat jey de ma pat ɛn e bayis mɛn.

²³Ano arɔng, ma sira a yɛn e hey wɔgɔ, mê shara hɛn e ji mwa yére bemat jey, ko mê gasang hɛn e bavwel baduk,

²⁴yaga yɛn a ga raa nu hom wɛt, ko yɛn a ga ye zak a Badu hom, ko yɛn a ga tɛ̀ Negasi Shábat hom ligis, yɛn a ga sɛt bayis mɛn e ra cî bedabeda mɛn.

²⁵Ano arɔng, ma nɔng ɛn Badu baves, na nu de ba tɔk tɛ̀ ɛn be sè beken wɛt.

²⁶Ma tik ɛn be tɛ̀ bato mɛn ligis na pyɛ́ de yɛn e nása nɔrɔ yɛ, mwa na nása nɔrɔ nèy negel mɛn bewen, yaga na me tɛ̀ a sè a yɛn byɛm-byɛm, na yɛn a bin tɔk me wɛ à Dagwi Darwey.

²⁷“Ko di, à mwasi, ha na BeIsrayɛl, yang ɛn, Darwey Dagwi Darwey a ye, ‘Gwong o hwak à gwomo de bedabeda min bá tono na reza hom yi na kyɛ́ ɛn nà sey tsak o na me.

²⁸Yaga jeng de ma vey na yɛn e vwel de ma sira na me nɔng ɛn, ko kayɛ jeng de yɛn a di rahwol lwis hwak, kɛ kayɛ cɔgɔt de ya vɔk berang pyak, ko e hwomo yɛn e nása nɔrɔ̂ yas, na nenɔrɔ de ne nɔngɔs me shom sizɔng. E hwomo arɔng yɛn e nása nenɔrɔ pyɛ̂ nesang hyɔɔlɔl, mwa na nenɔrɔ nshi anap.

²⁹Ma rangal hɛn, ma ye: E wɛ̌ rahwol de yin e turus vɔk ɛ arɛt? Yi ano, bé tang wɛ à Rahwol Sekwit pere vey e yunung.’

³⁰A remo, ha a BeIsrayɛl ngan: ‘Darwey Dagwi Darwey a ye: Yin ê sǎ e de tɛ́sɛ bato min ligis, e de raà negwɔn bedabeda min, na yin a ye rɛng e de ragas pyɛ̂ byɛm-byɛm mɛn a?

³¹Jeng de yin e nása nenɔrɔ min, na yin a nása nenɔrɔ nèy min e kya, yin e tɛ̀sɛ bato min ligis na mwa cī min o pere vey e yunung. Ko yin ê vo byǎ sɛ́, à yin BeIsrayɛl ɛ? Me Darwey Dagwi Darwey ma sira na reza hom, mê tik in na yin a vo byǎ na me wɛt.

³²Báre de yin a vɔk e neyey min wɔgɔ, yin e simo yin sangal sede bwang yére bemat jey, na yére dyuk yê bavwel bahak, na yin a re a batin cɔ́gɔt na beta fongol. Ko pyɛ́ yemo yê sang té wɛt.’ ”

³³Darwey Dagwi Darwey a ye: “Ma sira na reza hom, ko ma sé ha a yin mwin wɔgɔ, e ji shom hom, mê re negwɔm e ra yin, na vwɔ hom gwô gap, na mwa reto de ma vɔk.

³⁴Mê toyo na yin yi e yére bemat jey e ji shom hom, na vwɔ hom gwô gap na mwa reto de ma vɔk, jeng de ma tula hin yi e mwa bavwel de ma ga kana shara hin ɛ.

³⁵Mê vey na yin e hey hê yére bemat jey, ko e hwomo, mê ra a yin shɔt bayis na bayis.

³⁶Sede remo de má gang bedabeda min na shɔt e hêy vwel Misra, ano de mê gang in na shɔt arɔng. Me Darwey Dagwi Darwey ma ha ano.

³⁷“Mê tɛ̀ yin kwey e nɛ̂n gwele hom vivining sede lwek vyēl e ra, ko mê tɛ̀ yin a gyeng wuna-na-sira hom na yin.

³⁸Mê paa yi e ji min vemo de be sogo a me nehywɛ, na vemo de be ragas a me banɛn. Mê páa ɛn yi e bavwel de ba sé sangal ɛ sede bekɛnɛt, ko mê tik ɛn be toyo e vwel Israyɛl wɛt. Yi ano, yin ê tɔk me wɛ à Dagwi Darwey.

³⁹“À yin BeIsrayɛl, Darwey Dagwi Darwey a ye, ‘Ci wɔ̀ sap in cī min, kawɛ e ji min a remo tanga e ngamo nuyel, ka sede yin ê wet betong na me wɛt, ko yin kwon ra jɔgɔ na reza hom rê jɛrɛ na nása nenɔrɔ yas min tanga sâp cī min wɛt.’ ”

⁴⁰Darwey Dagwi Darwey a ye, “Yaga e hwomo e ra raku hom wo jɛrɛ, raku wo rak o wo Israyɛl, mwa BeIsrayɛl, kawɛ mwat e vwel o, ê re a me fongol. E hwomo mê séy ɛn. A sé e hwomo arɔng de mê jama yin vey a me na nenɔrɔ min, na pyɛ̂ nenɔrɔ min de ya dal mwa na nerat, tanga nenɔrɔ de yin a tik jaram yaga me.

⁴¹Mê séy in sede pyɛ̂ nesang hyɔɔlɔl jeng de ma pat in yi e bwang bemat, na me tula hin yi e bavwel de ba ga kana shara hin ɛ. Mê dura nejɛrɛ hom e tē min e bayis yére bemat jey.

⁴²Yin ê tɔk me wɛ à Dagwi Darwey jeng de ma toyo na yin e vwel Israyɛl, vwel de ma kana sira na me nɔng bedabeda min.

⁴³E hwomo, yin ê bare na negwɔn min ne raane, na tomong de bà tɛ̀ in ligis, ko yin ê di neves bato min yaga pyɛ̂ byɛm-byɛm de yin á ragas.

⁴⁴Yin ê tɔk me wɛ à Dagwi Darwey jeng de ma ra a yin nerat yaga reza hom, a sé yaga pyɔlɔ̂ tomong ves min kɛ yaga gwòng min de ba sé gwɔrɔdɔk wɛt, à yin BeIsrayɛl. Me Darwey Dagwi Darwey ma ha ano.”

⁴⁵Dagwi Darwey a ha na me, a ye,

⁴⁶“À mwasi, sɛt bayis mo vɔk e rwa batin, basa a yɛn, ko hwo zarap e ra vwel rehwôt Nɛgɛf.

⁴⁷Há a rehwôt Nɛgɛf wɔgɔ: Wok in hâ Dagwi Darwey! Darwey Dagwi Darwey a ye, ‘Wet in betong! Ma sé kyè wɔ̀ dak kya e ra hwo, ko hê re kayɛ cɔgɔt lya na berang e ji mō, mwa na kayɛ mo de ya ga hworok. Vit a pyɛ de yê tɔk rimi kya mo, ko kawɛ mwat ê wok nevɛ̌t balem kya mo de hê re yi e rwa batin vɔk e rwa bato.

⁴⁸Kavɛ bemat beken bê tɔk e me Dagwi Darwey de ma tɛ̀ kya mo, vit à mwat de ê tɔk rimi hɛ.’ ”

⁴⁹Ko ma ye: “Áaa, à Darwey Dagwi Darwey, yɛn e tang me, ‘E hā na gwɔrɔ-há zɔng wɛt a!’ ”