Read berom Yɛzɛkyɛl 21 Bible Online

Yɛzɛkyɛl 21 - berom bible

Yɛzɛkyɛl 21

¹Dagwi Darwey a yang me,

²“À mwasi, sɛt bayis mo vɔk e Yɛrusalɛm na hwo ha e ra nekwɔn re fongol mɛn. Zarap e ra vwel Israyɛl,

³ko hwo yang vwel o, Dagwi Darwey a ye, ‘Ma sé kyè vey hwo e ra hwo. Mê hwɔltɔ wal hom yi e fwal o, ko me mɔbɔs hin mɛ mwa, vê cik na beves.

⁴A remo de mê wey na vê cik mwa na beves o, mê hwolto wal hom e ra kawɛ mwat de a sé kwen, yi e rwa batin vɔk e rwa bato,

⁵ko kawɛ mwat ê tɔk, me Dagwi Darwey ma ga hwɔltɔ wal hom yi e fwal o, ko mê to gyira wɛ wɛt.’

⁶“À mwasi, rus, rus e bayis mɛn sede yey mo yé kyè wɔ takla na rezot.

⁷Sede yɛn a rangal hwo, ba ye, ‘Yaga sɛ́ de hwó rus ano ɛ?’ Ko hwo toyo a yɛn, ‘Yaga reha pyɛ de ye kyè wɔ̀ té.’ E jeng o, neyey mɛn nê dak na bengyip, vɔ mɛn bê tɛ́ ɛn gbɛrɛk, yɛn ê to vɔk yey ting wɛt, ko bakwot mɛn bê vow. Jeng o ya sé kyè vey a remo, á yemo! Me Darwey Dagwi Darwey ma ha ano.”

⁸Dagwi Darwey a yang me,

⁹“À mwasi, zarap na hwo ye: Darwey a yang me na me ye: “ ‘Wal, wal de ba ga lɔ̌, ba ga tugut wɛ arɔng.

¹⁰Ba ga lɔ̌ wɛ yaga mɔbɔs bemat, ba ga tugut wɛ na wo tē dɛrɛp sede gbara! Yi e rɛ̌ de wot e ra nzem ɛ? Yin a ga byɛs tusa, na vô byǎ.

¹¹Ba nɔng wal o na be tugut, na be yong wɛ yaga fwom. Ba ga lɔ̌, ko ba tugut wɛ, na be nára a mwat mɔbɔs bemat wɛ.

¹²À mwasi, tosho na hwo dak sekun, yaga wal o wa sé yaga mɔbɔs bemat hom, na mwa bemat nuyel Israyɛl. Bê mɔbɔs hɛn na bwang bemat hom mwa. Ányeé yeèy! Tɛ̀ in vɔ e to!

¹³Ma sé masa bemat hom, ko ka sede yɛn a byɛs gwele mo, pyɛ mo yê té wɛt a? Me Darwey Dagwi Darwey ma ha ano.

¹⁴Ano, à hwo mwasi, zarap, na hwo dak vɔ mo. Tik wal wo hwo e ra yɛn zang tat, wà sé wâl mɔbɔs bemat. Wa sé wâl gbɔng mwat, wô nɔng ɛn bengyip e kawɛ bak.

¹⁵Yaga ano neyey ne dak, ko pyak be tē bugurɛk. E mwa rùhup mɛn ma ga tɛ̀ wal. Ányeyêy! Be tâng wɛ dɛbɛt, ba ga tugut wɛ yaga mɔbɔs bemat.

¹⁶Hwo ɛn e vwɔ yege! Tow ɛn e vwɔ mwɛlɛng! E kawɛ bak de hwà doyo ɛ.

¹⁷Me arɔng mê dak vɔ hom, mê tɛ̀ shom hom yɛ ye rɔ̀s. Me Dagwi Darwey ma ha ano.’ ”

¹⁸Dagwi Darwey a to ha na me, a ye,

¹⁹“À mwasi, dura gwòng ba de gbɔng gwɔ̀m Babilɔn ê tɔk vey na wal como mɛ. Mwa gwòng o bê nusu yi e vwel hining o. Yong pyɛ dura na hwo tɛ̀ yɛ e gasang gwong de gwo kyè wɔ e gbɔng repomo.

²⁰Dura gwong de wal o wô kwey ɛ vɔk e Raba wo BeAmɔn, kɛ vɔk e Yuda, na vɔk e Yɛrusalɛm de ba rɔnɔ na jwa.

²¹Yaga gbɔng gwɔ̀m a sé e tumal e gasang gwòng o. E gasang gwòng ba mo, ê bɛrɛng na bes, ê zugut zing ket mɛ, ê rangâl cī mɛ gwong o, ko a bɛrɛng yɛɛlɛl yêy yas de a ga kana nára nɔrɔ̂ yɛ.

²²Vwɔ yege mɛ gwô hwɔtɔ kwɛt de gwa dura Yɛrusalɛm. Ano bê tɛ̀ pyɛ gang jwa-pomo, a nɔng nû mɔbɔs bemat, a tɛ̀ sekun como e ra hɛ, a tɛ̀ pyɛ̂ gang rùhup o, na be tula gwofongol vɔk e jwa-pomo mo, tanga na be yong na be tút e ra tyɔ́n jwa-pomo mo arɔng.

²³Ko na yɛn bemât Yɛrusalɛm, yɛn ê sey tsak o na ha mo wɛt, yaga yɛn a ga kana wuna hɛn na sira na yere bemât gap, ko mwa ano, ha mo hê bare a yɛn na banɛn mɛn, ko ê re ɛn e como.

²⁴“Yaga ano, me Darwey Dagwi Darwey ma ye: Yin a ga to bare na buru min, a remo de ba ga wunta banɛn min dɛdɛrɛng, e kavɛ tomong min, ba di banɛn min wɛshɛrɛk, a remo yin e de bare, yaga ano bê re in e como.

²⁵“Ko di hwo, hwey gwɔ̀m Israyɛl de hwà sé vwes sizɔng, hwo de jeng mo ya ga pom, jeng tabak mo hê yɛnɛ mo.”

²⁶Darwey Dagwi Darwey a ye: “Pat in toro rato mó, mwa na kpin negwɔm o, pyɛ́ yê nàra sede raane wɛt. Bê nɔ̂ng womo de be byɛs nerey, ko wo nerey bê gyirik hɛ.

²⁷Gawey, gawey, gawey! Ey mê tɛ̀ a yɛ gawey! Pyɛ ya ga sang té ano wɛt. Sɛ̌ dâ pyɛ mo a vey, ko mê nɔng ɛ pyɛ mɛ.”

²⁸Ko di hwo, à mwasi, zarap na hwo ye, “Darwey Dagwi Darwey a ha e ra BeAmɔn na e ra dusa mɛn ngan: “ ‘Wal, wal! Ba ga hwɔltɔ wɛ yaga mɔbɔs bemat, ba ga tugut wɛ na wo re, wɔ tē dɛrɛp sede gbara.

²⁹Be dúsa a yin negwi-ywey ne bɔs, yin e bɛrɛng na bes hê kwɛlɛng, be tē yin ê di wɛng e ra vê repugu min, bemât yol, vê ragas neves, be tē jeng mɛn ya ga vey, jeng tabak mɛn hê yɛnɛ mo.

³⁰Toyo na wal o e fwal wɛ! E kwɔn de bá kana tɔ in ɛ, E vwel de yin á yi ɛ, mê ra a yin shɔt.

³¹Mê shusha shom hom e ra yin, na kyâ lashe yey hom, mê pɛsɛl hɛ e ra yin. Mê nára hin e vɔ bemat beves, vemo de ba vɔk sekwɛl mɔbɔs bemat.

³²Yin ê sè sede cɔ́gɔt kya, nemi min nê yel e vwel. Bê to bare na yin ko tyɔng wɛt, yaga me Dagwi Darwey ma ha ano.’ ”