Read berom Yɛzɛkyɛl 22 Bible Online

Yɛzɛkyɛl 22 - berom bible

Yɛzɛkyɛl 22

¹A vane ano, Dagwi Darwey a to ha na me, a ye,

²“À mwasi, hwà ga yong o na hwo yɛrɛ a yɛn shɔt a? Hwô ra a gbɔng repomô Yɛrusalɛm de ra ga lusha nemi bemat shɔt a? Há a rɛ wɛshɛrɛk mwa pyɛ̂ byɛm-byɛm de ra ga ra.

³Hwô ye: ‘Darwey Dagwi Darwey a ye: À gbɔng repomo, yaga hwà ga mɔbɔs bemat mo pyak, ko hwà ga to tɛ̀ to mo ligis na re a cī fongol, jeng mo ya sé kyè vey.

⁴Ba ga gang o na shɔt nemi de hwà ga lusha, hwà ga tɛ́ o ligis na cī de hwà yong. Di, tuk rezot mo ha sé kyè vey, jeng tabak mo ya ga pom arɔng. Yaga ano, ma tik yére bemat jey be dùsa hwo, ko mwa bavwel be shɛgɛsh hwo.

⁵Bavwêl bagat na vê yikyik bê shɛgɛsh hwo yaga hwà sé vwes tyɔng wɛt, ko hwà kat lûk bemat.

⁶“ ‘Di, kawɛ gwɔ̀m Israyɛl de a sé e ji mo, yi na nerey mɛ, a tɛ̀ gap mɛ e ra lusha nemi.

⁷E ji mo, bemat be byɛs beda na beneng mɛn, be tak a bemât yére dyuk, ko be mɔt nehyɛn na bekuma.

⁸Yin e byɛs pyɛ̂ jɛrɛ hom, ko yin e ra jɔgɔ na Negasi Shábat hom.

⁹Behak e ji min be vɛ́sɛ bɔs e ra behak na be lusha nemi mɛn, behak be reres pyɛ́ de be nása a cī e beraku, ko behak be ragas gwot arɔng.

¹⁰Behak be dyɛngɛs na beha beda mɛn, ko behak be dyɛngɛs na beha na retek e jeng berang mɛn.

¹¹Behak be ragas pyɛ̂ byɛm-byɛm na behâ bemat vwara mɛn, behak be ragas gwot na behâ nèy mɛn, kɛ na begwa mɛn behwong e beda mɛn.

¹²Behak e ji min be sey pyɛ̂ bang nu na be lusha nemi, behak be nɔngɔs hwɔpɔ na ndi pyak, ko be rɛsɛl a bemât vwara mɛn yɛ e ra pyɔlɔ pwoy na be mɔt ɛn, ko yin a ga ye bam à me. Me Darwey Dagwi Darwey ma ha ano.

¹³“ ‘Di, me dak vɔ hom na neyɔɔ̀t pyɔlɔ de yin a re, na yerê nemi de yin a lusha e tē min.

¹⁴Yey min yê sè tiing, kɛ vɔ min bê nàra na gap jeng de mê teshe na yin bɛ̀? Me Dagwi Darwey ma ha ano, ko mê ra ano.

¹⁵Mê shara hin e tê yére bemat jey ko mê kyě bere hin e bavwel detidetu, ko mê tɛ̀ kwɔ̂k neligis min.

¹⁶Yi na neburu min, yin ê sè ligis e bayis yére bemat jey, ko yin ê tɔk me wɛ à Dagwi Darwey.’ ”

¹⁷Dagwi Darwey a yang me,

¹⁸“À mwasi, mwa BeIsrayɛl ba ga tɛ́ ɛn a me sede gbàrak-dyam ye dyam pyɛng, na dyam pama, na mbus, na dyam tanga dyam shi, mwa yɛ ya ga suk ɛ́, ya ga ye ywey e guna-ju, ya ga tɛ́ ɛ gbàrak-dyam.

¹⁹Yaga ano, Darwey Dagwi Darwey a ye, a remo de mwa bemat o ba ga tɛ́ ɛn sede gbàrak-dyam, mê tula hɛn e tê Yɛrusalɛm.

²⁰Tyɛng sede remo de be tula dyam pyɛng, na dyam pama, na dyam, na dyam shi tanga mbus e guna-ju, na be tɛ̀ kya e ra yɛ̄ na ye ye ywey, ano de mê tula hɛn e ji shom hom, na e ji lashê yey hom, ko mê tɛ̀ in e hwomo na me ye ywey à yin.

²¹Mê tula hin, ko me pɛsɛl hin na kyâ shom hom, ko yin ê ye ywey e ji hɛ.

²²Sede remo de be ye ywey a dyam pyɛng e fwam rugut dyam, ano de yin ê ye ywey e ji rɛ, ko yin ê tɔk, e me Dagwi Darwey de ma shusha shom hom e ra yin.”

²³Dagwi Darwey a to ha na me, a ye,

²⁴“À mwasi, há a vwel Israyɛl ngan: Hwà sé vwel de ba ga yishing haalal wɛt, kɛ rwak wo rop e ra hɛ e tûk shom hom arɔng wɛt.

²⁵Begwɔ̀m mo ba sé sede begukum de be lulum e de hamâ pyɛ de ba ga vos. Yɛn e mɔbɔs bemat, be re ɛn, be hashe pyɛ̂ nedanerey mɛn mwa na nedok nekyɔrɔk de yɛn a sɛ̀. Yɛn a tɛ̀ beha pyak be tɛ́ ɛn bekuma.

²⁶Bepiris mɛn ba ga kwɔrɔ Badu hom, ko bà ra jɔgɔ na pyɛ̂ jɛrɛ hom. Yɛn a tɔk gas pyɛ́ de ya sé jɛrɛ na yê zɔng-reng wɛt, ko yɛn a tɔk basa a bemat na be gas pyɛ́ de ya sé haalal na yemo de ya sé ligis wɛt. Yɛn e gyenges Negasi Shábat hom wɛt, yi ano yɛn e ra jɔgɔ na reza hom.

²⁷Begwɔ̀m mɛn ba sé sede bebwá de be hama ngyāma de ba vos, bé lusha nemi, ko bé mɔbɔs bemat na be sɛ̀ pyɔlɔ vyes.

²⁸Bezarap Dagwi mɛn be bangas a yɛn neves o sede ba mɔmɔ duk na būm pwɛng, yɛn e bɛrɛng negwi-ywey ne bɔs, yɛn e há a yɛn pyɛ́ de yê té yê bɔs, ko yɛn e tē, ‘Darwey Dagwi Darwey a ye’, mwa ano de Dagwi Darwey a ga hanat wɛt.

²⁹Bemat vwel o ba ga mɔt bemat, ko ba ga seres ɛ pyɛ́ mɛn na retek, yɛn a ga mɔt bepɛng na vemo de ba vɔk pyɛ wɛt, ko yɛn a ga tak a yére dyuk e gwong de gwa sé cik wɛt.

³⁰Ma ga jama mwat e ji mɛn de ê lɔk jwa-pomo mo na a dul rɛ e nekwɔn de nà ga gabsa yaga na pomo mo he dal e jeng shom hom, ko ma tɔk sɛ̀ mwat o wɛt.

³¹Yaga ano, ma ga shusha shom hom e ra yɛn, ma ga wey na yɛn na kyâ shom hom, ko ma ga tɛ̀ pyɔlɔ̂ tomong mɛn e ra bato mɛn. Me Darwey Dagwi Darwey ma ha ano.”