Read berom Yɛzɛkyɛl 23 Bible Online

Yɛzɛkyɛl 23 - berom bible

Yɛzɛkyɛl 23

²“À mwasi, behwong behak beba bá sè de neng mɛn á sè gwining.

³Jeng de yɛn á rɔngɔl bebot o, e sangal e Misra yɛn á hwo ra nedeneves, bá mɔgɔm nenu bavasal mɛn, ko bá kyě wusum bavasâl neyorom mɛn.

⁴Rezâ hwong kunat o à Ohola ko rê gwà mɛ mo à Oholiba. Yɛn á sè benang, ko yɛn á tɔs á me nèy bewen na behwong. E ra baza mɛn, Ohola yɛ̀ wɛ à Samariya ko Oholiba à Yɛrusalɛm.

⁵Ohola á ra nedeneves, mwa ano de á sè nwang, á vɔk cwey bemât yey mɛ, yɛn BeAsirya.

⁶Yɛn á sè bemât como de yɔ̀m fwom mɛn yá sè zwey, yɛn á sè bemât badu gwɔ̀m, na begbɔng bemat como arɔng, yɛn á sè bewen berat e bɛrɛng, ko ba sè bemat como bedwa.

⁷Á ra nedeneves na mwâ hɛn, yɛn begbɔng BeAsirya, ko á tɛ́ ɛ ligis na mwa cī kawɛ e ji mɛn de á sè wo yey mɛ.

⁸Á hala nedeneves de á pɛrɛ e Misra wɛt. Jeng de á sè rɔ̌ hwong, bemat bá kyě dyɛngɛs na yɛ, ko bá kyě wusum ragey neyorom mɛ, na be kwɔshɔ cwey gwot mɛn e ra yɛ.

⁹Yi ano, ma nára hɛ e vɔ bemât yey mɛ, yɛn BeAsirya de á vɔk cwey mɛn.

¹⁰Yɛn á hywɛrɛm hɛ kpimit, bá sey ɛ nèy mɛ bewen na behwong, ko e bama mo yɛn á mɔrɔ hɛ na wal. A tɛ́ ɛ pyɛ cinat ha e ji beha, yaga shɔt de ba yɛrɛ a yɛ.

¹¹“Gwa mɛ Oholiba á bɛrɛng pyɛ́ de yá té, ko mwa ano á sè jwang o a dal gwa mɛ na cwey beras ko nedeneves o nemɛ ná shɛsh ne gwa mɛ.

¹²Á vɔk cwey BeAsirya — yɛn bemât badu gwɔ̀m, na begbɔng bemat como, na bemat como de bá tɛ̀ yɔ̀m mɛn tanga bemat como bedwa, mwa hɛn bá sè bewen berat e bɛrɛng.

¹³Ma di de a ga tɛ̀ to mɛ ligis arɔng, hwak á radɛ mumwɛ na neves o wɛt.

¹⁴Ko Oholiba a shɛsh gwa mɛ e nedeneves o. A di bazinâ beras de ba wɔrɔ e vwara duk, ba sé vê BeBabilɔn de ba mɔmɔ na būm swinang de gwa nɛp.

¹⁵Bemat o ba tɔrɔ hɛn na gyindi e rawit, na betoro berat de gul gwo pɛsɛl nenu mo e bato mɛn. Mwa hɛn ba sé sede besuga, bazina mo ba sé vê BeBabilɔn vê sevwêl Babilɔn.

¹⁶Ras de a di ɛn, a wok cwey mɛn, ko a tomo betom vɔk na yɛn e vwel Babilɔn.

¹⁷Ko BeBabilɔn o ba vey sɛ̀ ɛ e gwât yey mɛ, yɛn a tɛ̀ ɛ ligis na gwot mɛn, ko e bama de a ga tɛ̀ tó mɛ ligis na yɛn, a yang ɛ byɛm-byɛm na yɛn, ko a ye zak à hɛn.

¹⁸A re nuyel na nedeneves mɛ kyɛrɛng, a dura a mwa bemat nekpimit mɛ, ko ma doyo ma ye zak à hɛ, sede remo de ma kana doyo me hala gwa mɛ.

¹⁹Mwa ano, á gwɛ re nuyel na nedeneves mɛ, e bare na jeng nehwong mɛ, de á ra nedeneves e Misra.

²⁰Á vɔk cwey bemat gwot tyɔng wɛt, ko bemat o bá vɔk gwot yerê hê bemadung, ko bá vɔk nshî jwat gàlum sede berâs dwa.

²¹Ano de á vɔk cwey nedeneves ne nehwong mɛ jeng de BeMisra ba kyě wusum ragey mɛ, ko ba kyě mɔgɔm bavasal mɛ de ba ga tɛ̀ gbuk.”

²²“Ko hwo, à Oholiba, Darwey Dagwi Darwey a ye, ‘Mê tɔgɔs mwa bemât yey mo mó e ra hwo, mwa ano de hwà ga byɛs ɛn, ko mê tɛ̀ yɛn a hwo e ra hwo yi e kawɛ bak,

²³yɛn BeBabilɔn, na mwa vê vwêl Babilɔn, vê Pekot, na vê Showa, na vê Kowa tanga mwa vê Asirya. Mê tula mwa bewen berat e bɛrɛng de ba sé bemât badu gwɔ̀m, na vê nuyel bemat como mwa hɛn, na mwa begbɔng bemat fwom gwɔ̀m, ko mwa hɛn e ra bedwa.

²⁴Yɛn ê vey hwo e ra hwo yi e rwa bato na bekyɛkyɛ bedwa, na bekyɛkyɛ̂ hashê pyɛ́, tanga gbɔng regyɛng bemat. Yɛn ê tɛ̀ a hwo dúra como e kawɛ bak, na be tó como na hwo, ko yɛn ê tɛ̀ rugû dyam bâng ragey, na rùga tanga bong dyam. Mê nɔng ɛn nu be ra a hwo shɔt, ko yɛn ê sila hâ shɔt o tyɛng na badu mɛn.

²⁵Mê tɛ̀ shom hom ye hwo e ra hwo, ko yɛn ê teshe na hwo na yol. Yɛn ê yɛrɛ wol na betong mo, ko bwang vemo de ba pɔl à hwo bê mɔbɔs hɛn na bewal. Yɛn ê vos nèy mo bewen na behwong, ko bwang vemo de ba pɔl a hwo bê dak kya e ra yɛn.

²⁶Yɛn ê hywɛrɛm hwo, ko bê hashe berugu na yɔ̀m dyéngere ryat mo.

²⁷Mê tɛ̀ kwɔk gwot mo na nedeneves mo de hwà yi mɛ e vwel Misra, hwô to wok cwey yɛ, kɛ hwo to bare na Misra ko tyɔng wɛt.’ ”

²⁸“Yaga me Darwey Dagwi Darwey ma ye: Mê nára hwo e vɔ bemat de hwà kyɛ́ o hɛn zakzak, e vɔ vemo de hwà to vɔk simo hak na yɛn wɛt.

²⁹Yɛn ê teshe na hwo na repugu, yɛn ê hashe mwa pyɛ̂ nedanerey de hwà ga yɔ́m o e ra yɛ, be hywɛrɛm hwo kpimit. Ano de bê wunta wɛshɛrɛk gwot mo sana rekyen, na negwɔn banɛn mo tanga nedeneves mo.

³⁰Pyɛ yemo yê té na hwo ano yaga hwà ga ra nedeneves na yére bemat jey, ko hwà ga tɛ̀ to mo ligis na cī mɛn de ya sé vyes.

³¹A remo de hwà raa nekyɔ̌n bol gwa mo, yaga ano, mê nɔng o keshi tabak yerê kemɛ na hwo sɔ.”

³²Darwey Dagwi Darwey a ye: “Hwô sɔ shǐ tabâk gwà mo, ha sé rey ko ka sé ciwil, bê shɛgɛsh hwo ko bê dùsa hwo, shi mo ha sila na shom hom.

³³Hwô sila hwo na sefeng na lashe yey, shi bengyip, na he gawey, hɛ̀ à hê gwa mo hwong, Samariya.

³⁴Hwô sɔ hɛ, hwo ye fip, hwô mɔrɔ hɛ cɛk o cɛk o, hwô kyě yɛt bavasal mo na yɛ̄. Me Darwey Dagwi Darwey ma ha ano.”

³⁵Ko di, Darwey Dagwi Darwey a ye: “À remo de hwà ga ye bam à me, hwà ga doyo a me ma, hwô sɔ rezôt gwot mo na hê nedeneves mo.”

³⁶Dagwi Darwey a yang me, “À mwasi, hwà ga yong o na hwo ra a Ohola na Oholiba shɔt a? Tɛ̀ kun mɛn e ra pyɛ̂ byɛm-byɛm de ba ga ra.

³⁷Yɛn a ga ra nejwang, ko nemi bemat de yɛn a ga mɔbɔs na sé riishish e vɔ mɛn. Yɛn a ga ra nejwang tanga sekwit, ko ba ga mɔbɔs nèy de yɛn a tɔs a mɛ, yɛn a ga nára nèy bewen o sede nɔrɔ̂ yas vɔk na cī.

³⁸Ko yɛnɛ ma hemo wɛt, yɛn a ga tɛ̀ Gbɔng Duk Re Fongol hom ligis, ko yɛn a ra jɔgɔ na Negasi Shábat hom.

³⁹Tuk de yɛn a mɔbɔs nèy hom sede nɔrɔ̂ yas vɔk na cī, yɛn a vey e Gbɔng Duk Re Fongol hom ko ba tɛ̀ wɛ ligis!

⁴⁰“Yɛn a sǎ e de tomsal betom na be wɔ̀ rini a yɛn bemat vey na yɛn yi e bavwel yikyik, ko bemat o ba vɛ̀sɛ. Behwong beba mo ba kús ɛn, ba mɔmɔ hɛn na tyǐ e bayis, ko ba tɔrɔ hɛn na yɔ̀m dyéngere ryat yaga bemat mo.

⁴¹Yɛn a wɔ̀ sangal e ra pyɛ̂ sangal ryat, ko ba tik tebut e tē na nedirî pyɛ́ ryat, mwa na pyɛ̂ nesang hyɔɔlɔl tanga něy pwat de ma kana nɔng ɛn.

⁴²Duk mɛn o wà sila na regyɛng bemat nzem tanga jɔngɔl bemât sefeng de ba yi e bak hey. Bemat o ba tɛ̀sɛ á beha mo nerwěy e vɔ, na bekpin negwɔm berat sizɔng e bato mɛn.

⁴³Ma bare, ‘Hwā mó a ga tɛ́ ɛ gbɛrɛk na nejwang! Yɛn ê to ra nejwang na yɛ̀ gbak a?’

⁴⁴Ko yɛn a wɔ̀ yel na yɛ sede remo de be yel na kawɛ devwes. Ano arɔng, yɛn a yel na Ohola na Oholiba na yɛn a ra nejwang na yɛn.

⁴⁵Mwa ano, bemat de ba sé cik bê ra a yɛn shɔt sede remo de be ra a behâ nejwang, na behâ mɔbɔs bemat, a remo de yɛn a sé bedebeves ko vɔ mɛn ba sé riishish na nemi.

⁴⁶“Yaga ano, Darwey Dagwi Darwey a ye, ‘Vey in na regyɛng bemat como na be hwo e ra yɛn, na be nɔng ɛn bengyip, na be jugu hɛn arɔng.

⁴⁷Tik na regyɛng o re tó ɛn na beta, na be hwo ɛn na bewal, be mɔbɔs nèy mɛn, na be dak kya e nelɔ mɛn.

⁴⁸Ano de mê tɛ̀ kwɔ̂k ragas neves e vwel o, yaga na a sè a mwa beha pyɛ túsa, na yɛn a kwon ragas nejwang sede remo de yin á ragas wɛt.

⁴⁹Yɛn ê tala hin byɛ̂ ragas nejwang min, ko yin ê sey pyɔlɔ̂ banɛ̂n re a cī fongol. Ano de yin ê tɔk, me wɛ̀ a Darwey Dagwi Darwey.’ ”