Read berom Yɛzɛkyɛl 24 Bible Online

Yɛzɛkyɛl 24 - berom bible

Yɛzɛkyɛl 24

¹E tuk hê kuru, hê pwɛl gwô kuru gwô shey hê shanetat hê sesam mot, Dagwi Darwey a ha na me, a ye,

²“À mwasi, jɛk pɔlɔ pwɛl hê yunung, ey, hê yunung, yaga a sé e yunung de Da vwel Babilɔn a hwo gwɔrɔ Yɛrusalɛm na como.

³Há a bemât sogô nehywɛ hom o gwɔrɔ-há hemo. Yang ɛn, Darwey Dagwi Darwey a ye: “ ‘Rɛdɛ̀ hin rwey e kya, rɛdɛ hin hɛ, sila hin hɛ na nshi.

⁴Tɛ̀ in cûng nama e ji mo, mwa cūng o ryat o, yê fwa na to vwɔ, sila hin hɛ na bekup berat arɔng.

⁵Jut in tyimit de ya dal na nerat tɛ̀ in bwang bekup berat e nɛn o, yē in puu à cûng nama mo, kyé in bekup o na banama mo mwa.’ ”

⁶Darwey Dagwi Darwey a ye: “Gawey e ra gbɔng repomô lusha nemi, sede rwey de ha ga ré ɛ́, ha senge, hemo de sénge mo ha ga nusu hɛ wɛt! Páa in cûng nama mo jijining, yin tɛt ɛ pyɛ cak wɛt.

⁷Yaga nemi de ra lusha na sé e ji rɛ, ra shushu nɛ e ra gbondong, ra shushu nɛ e vwel na be tɔk bang na fongol wɛt.

⁸Yaga na ne sogo shom hom, na me tala pyɔ̌n nɛ, ma tɛ̀ nemi de a lusha mo e ra gbondong, yaga na be tɔk bang nɛ wɛt.”

⁹Yaga ano, Darwey Dagwi Darwey a ye: “Gawey e ra gbɔng repomô nemi! Mê tula gwɔ̂t cɔ́gɔt o pyɛ hom.

¹⁰Tula hin babîm cɔ́gɔt o, pɛl in kya mo, kyé in banama mo naka, tɛ̀ in ɛ shɔngɔl, tik in bekup o be fus.

¹¹Tik in rwey o hal e ra cila kya, na he bin fes vɛ̌t, na dyam zwey ye senge, serwîk hɛ sē ye ywey na kya he re sénge hɛ.

¹²Ma bɔrɔk tó hom zɔng-reng, sénge hɛ de ha ga tɛ́ ɛ ting hê nuhɛ wɛt. Hê nàra e kya na senge mó!

¹³Mwa ano de ma ye ngyɛ̂k tɛ́ o haalal yi e neligîs gwot mo, hwà tɛ́ o haalal yi e nɛ̀ wɛt, bê to tɛ̀ o haalal wɛt, sɛ̌ ma kwɔshɔ shom hom e ra hwo.

¹⁴“Me Dagwi Darwey ma ye, jeng ye kyè vey, mê ra pyɛ de ma ye. Mê tik nà ra wɛt, mê hala wɛt, ko mê ye waa arɔng wɛt. Mê ra a yin shɔt tyɛng na begwong min, na pyɛ́ de yin e ragas. Me Darwey Dagwi Darwey ma ha ano.”

¹⁵Dagwi Darwey a to ha na me, a ye,

¹⁶“À mwasi, e jeng jining, ma sé kyè wɔ̀ jut hwâ yey mo. Ko mwa ano hwô ra sesin, kɛ hwo tosho, kɛ hwo bomo nemwishil wɛt.

¹⁷Hwo vos yey na gap wɛt, hwo ra sesîn womo de a ga ku wɛt. Bang rato mo na kpin, na hwo tɛ̀ bekpatak mo, hwo kwon bang bwang bayis mo, kɛ hwo re pyɛ́ de bemât sesin be re wɛt.”

¹⁸Nagasi ma ha na bemat sede jojot, ko nawiri hwā hom a wey. Ko nusu hwol o nagasi ma ra tyɛng na nu de Dagwi a nɔng me.

¹⁹Bemat ba yang me: “Hwô há a wot cap-hâ pyɛ́ yemo de hwà sé ra wɛt a?”

²⁰Ko ma yang ɛn: Dagwi Darwey a yang me,

²¹“Yang BeIsrayɛl: ‘Darwey Dagwi Darwey a ye: Mê tɛ̀ Gbɔng Duk Re Fongol hom ligis, wɛ̀ de yin e ra kaa na retô wɛ, wɛ de yin e vɔk yey pyɛng e de bɛrɛng wɛ, wɛ de yin e simo wɛ na neyey min mwa. Ko bê mɔbɔs na bewal como nèy min bewen na behwong de yin a hala e bama.

²²Ko yin ê ra pyɛ de ma ga ra. Yin ê bang bwang bayis min, kɛ yin re pyɛ́ de bemât sesin be re wɛt.

²³Yin ê bang berato min na kpin, ko yin tɛ̀ bekpatak e bol min. Yin ê ra sesin kɛ yin tosho wɛt, ko yin ê tɛ́ in vit à gap e ji banɛn min, ko yin ê kyě rús a bemin.

²⁴Ano de Yɛzɛkyɛl ê sè a yin pyɛ dura. Yin ê ra tyɛng na pyɛ de a ra. Jeng de pyɛ yemo yê té ano, yin ê de tɔk, me wɛ à Darwey Dagwi Darwey.’

²⁵“Ko di, à hwo mwasi, tuk de ma jut a yɛn pyɛ de yɛn mwa ba ye yɛndɛng e ra yɛ, na pyɛ yey mɛn, na gbɔng nerat mɛn, na pyɛ de yɛn e simo bɛrɛng, na seshɛgɛsh neyey mɛn, na nèy mɛn bewen na behwong,

²⁶e tuk o, mwat hwak de ê hywit ɛ, ê vey na hwo, na a vey há a hwo ha mó.

²⁷E tuk hining o, nu mo hê wunta hɛ na mwat de a hywit ɛ mo, hwô ha, ko hwô to ban-yuu wɛt. Ano de hwô sè a yɛn pyɛ dura, ko yɛn ê tɔk, me wɛ à Dagwi Darwey.”