Read berom Yɛzɛkyɛl 25 Bible Online

Yɛzɛkyɛl 25 - berom bible

Yɛzɛkyɛl 25

¹Dagwi Darwey a ha na me, a ye,

²“À mwasi, sɛt bayis mo e ra BeAmɔn na hwo zarap e ra yɛn.

³Yang ɛn: ‘Wok in hâ Darwey Dagwi Darwey, Darwey Dagwi Darwey a ye: Yin a ye, “Ey yàa!” e ra Gbɔng Duk Re Fongol hom jeng de ba ra jɔgɔ na wɛ, na e ra vwêl Israyɛl jeng de ha ga tɛ́ ɛ barin, tanga e ra BeYuda jeng de ba kyè na yɛn vɔk e de sesam.

⁴Yaga ano, ma sé nára hin e vɔ bemât rwa rak na yɛn a vɔk reto e ra yin. Yɛn ê tɛ̀ nekwɔn ye ngyɔk mɛn e ji min, ko yɛn ê tɛ̀ bǔk mɛn e tē min. Yɛn ê re pyɛ̂ hiri min, ko yɛn ê sɔ nevasal min.

⁵Mê tɛ̀ pomô Raba he tɛ́ ɛ dem sehwey bemaryat, ko vwêl Amɔn he tɛ́ ɛ kwɔn bang tyīmit. Ano de yin ê tɔk me wɛ à Dagwi Darwey.’ ”

⁶Darwey Dagwi Darwey a ye, “Yin á dak vɔ min, yin gyilsit na yey pyɛng, ko yin á shɛgɛsh na mwa yere neves de yin á vɔk e ra vwêl Israyɛl.

⁷Yaga ano, mê nára vwɔ̂ shom hom e ra yin, ko mê nára hin e vɔ bemat sede pyɛ jugu, bê wey na yin e gwong de yin ê to sè yere bemat jey kɛ yin vɔk vwel de ha sé min wɛt. Yin ê to sè pyɛ cak wɛt. Ano de yin ê tɔk, me wɛ à Dagwi Darwey.”

⁸Darwey Dagwi Darwey a ye, “Mowap na Seyir ba ye: BeYuda ba sé tyɛng na mwa yére bemat jey,

⁹yaga ano, mê wuma begwong yel e Mowap yi e bapomo de ba sé e yɛnɛ̂ vwel o — bapomo de ba vɔk gbɔng nerât vwel o, vɛ à Bet-Yɛshimɔt, na Baal-Meyɔn tanga Kiriyatayim.

¹⁰Mê nɔng bemât rwa rak vwel o mwa na vwêl Amɔn na be sè bemɛn. Ano de bê to bare na Amɔn e ji yére bemat jey wɛt.

¹¹Mê yɛrɛ a Mowap shɔt na me tabak hɛn ko yɛn ê tɔk, me wɛ à Dagwi Darwey.”

¹²Darwey Dagwi Darwey a ye, “A remo de BeƐdɔm ba ga talâ BeYuda pyɔ̌n mɛn na neves sizɔng, ko ra ano mo ha vey na neves vit à yere mo e ra Ɛdɔm.

¹³Yaga ano, Darwey Dagwi Darwey a ye, ‘Mê nára vwɔ̂ repugu hom e ra Ɛdɔm, ko mê wey na bemasi tanga yas yi e hwomo. Mê hala vwel o barin, yi e repomô Teman pere vɔk e rê Dedan, bê mɔbɔs bemat o na wal como.

¹⁴Mê tɛ̀ bemat hom BeIsrayɛl be talâ BeƐdɔm pyɔ̌n neves mɛn e to hom. Yɛn ê teshe na Ɛdɔm tyɛng na shom hom tanga lashe yey hom. Yi ano, yɛn ê di nevês pyɔ̌n hom e ra yɛn. Me Darwey Dagwi Darwey ma ha ano.’ ”

¹⁵Darwey Dagwi Darwey a ye, “A remo de BeFilisti ba ga talâ vê repugu mɛn pyɔ̌n pyɛ de ba ra a yɛn, yɛn a ra ano na yey vyes sizɔng, yaga na be wey na bemat o.

¹⁶Yaga ano, Darwey Dagwi Darwey a ye, ‘Mê nára vwɔ̂ repugu hom e ra BeFilisti mo, mê wey na BeKereti, ko me wey na mwa bwang bemat de ba sangal e kwogom gworep.

¹⁷Mê yɛrɛ a yɛn shɔt vyes sizɔng na me tala hɛn pyɔ̌n neves mɛn, na me tabak hɛn mɛ e ji shom hom. Ano yɛn ê tɔk, me wɛ à Dagwi Darwey, jeng de ma tala pyɔ̌n neves hom e ra yɛn.’ ”