Read berom Yɛzɛkyɛl 26 Bible Online

Yɛzɛkyɛl 26 - berom bible

Yɛzɛkyɛl 26

¹E tuk hê mɛsɛng, hê pwɛl e shey hê kuru na hɛ hining hê sesam mot, Dagwi Darwey a ha na me, a ye,

²“À mwasi, sede remo de Tur á ha e ra Yɛrusalɛm á tē: ‘Ey yàa, ba ga gang ruhup yeles bemat jey, ba ga wunta a me gwong pyot. Bê to turu me, a remo de nedanerêy rɛ na ga wey.’

³Yaga ano, Darwey Dagwi Darwey a ye, Di, à hwo Tur, me ra repugu na hwo! Mê tɛ̀ yére bemat jey pyak ye hwo e ra hwo, sede remo de gworep gwo tɛ̀ bagun gwɛ̀.

⁴Yɛn ê wey na jwa-pomô Tur, ko be gangas tyɔ́n o. Mê kara fongol vwel o mwa, ko me hala hɛ gbondong.

⁵Hê tɛ́ ɛ e tê gworep, kwɔn tɛnɛ bagun. Darwey Dagwi Darwey a ga ha. Hê tɛ́ ɛ kwɔn jugû yére bemat jey,

⁶ko nebapomo mɛ e vwel o, be mɔbɔs nɛ na wal como. Ano yɛn ê tɔk, me wɛ à Dagwi Darwey.”

⁷Dagwi Darwey a to ye, “Mê vey na Gbɔng Gwɔ̀m Nɛbukadnɛzar yi e rwa bato na a hwo e ra Tur, yɛ de a sé gwɔ̀m begwɔ̀m, ko ê vey na bedwa, na bekyɛkyɛ-bedwa, na bemat comô bedwa de ba vɔk gap na reto sizɔng.

⁸“Nebapomo min e vwel o, ê wey na nɛ na wal como. Ê yong tyɔ̌n tút e jwâ-pomo, ê tula gwofongôl tút e hɛ, ko ê vey na yin na beruga e kawɛ bak.

⁹Ê tow jwa-pomo mo na pyɛ̂ gang wɛ, ko ê gangas tyɔ́n min na tyém.

¹⁰Bedwa mɛ bê se pyak tyɔng wɛt, ko bûm vɛ gwô bang in. Wûs bedwâ como, na hê bol bekyɛkyɛ-bedwa hê digis jwa-pomo mo, jeng de a sé yel e ruhup hɛ, e tê jwa mo de wa ga gabsa.

¹¹Ná bekwǒk bol bedwa mɛ, ê bɔrɔs mɛ mwa nehyok o. Ê mɔbɔs bemat o mwa na wal, ko bègbɔng besesek ruhup o bê gabsa e vwel.

¹²Yɛn ê jugu pyɛ̂ nedanerey min, ko be hashe pyɛ̂ nejik min, bê gangas jwa-pomo mo mwa, ko be wey na nelɔ nerat min. Beta min, na cɔ́gɔt tanga gwofongol pomo mo, bê hashe be wɔ̀ lusha e gworep.

¹³Mê tɛ̀ râ lɛlɛ min he wɛrɛ yuu, bê to wok râ yōm min wɛt.

¹⁴Mê tɛ̀ hwo sè gbondong swan, hwô tɛ́ o kwɔn tɛnsɛ̂ bagun. Bê sang to lɔk o wɛt, yaga me, Dagwi Darwey ma ga ha. Me Darwey Dagwi Darwey ma ha ano.”

¹⁵Darwey Dagwi Darwey a ye ngan e ra Tur, “Bapomo de ba sé e bakwogom bê digis na wûs gaba mō, na rûs vemo de ba mǎ hɛn, ko bē sè mɔbɔs vemo de ba sé e ji repomo mo.

¹⁶Mwa begwɔ̀m bapomô bakwogom bê gyiris yi e beta negwɔm mɛn. Yɛn ê paa yɔ̀m negwɔm mɛn na berugu mɛn de ba kyɔrɔk tolo mo. Yɛn a rɔda báng ɛn na vówa, ko bê sangal e vwel, bê sǎ e de vow na bengyip, ko ê yang ɛn yɔɔt na pyɛ de ya té na Tur.

¹⁷Yɛn ê ra a hwo lwɛlɛ sesin gwomo, ko be yang o, “ ‘Hwà ga vuru hwo e ji bèrep, à gbɔng repomô zá, raane hwá se gbɔng o e gworep, hwo na bemat mo, bengyip mo ba hwo e ra bwang vwel o mwa.

¹⁸Di, bakwogom be digis e tuk de hwà gaba, bakwogôm vwâ gworep, a yâng vɛ yɔɔt na gaba mo.’ ”

¹⁹Darwey Dagwi Darwey a ye, “Jeng de mê tɛ̀ hwo se barin sede bwang bapomo de ba ga hala vɛ hal, jeng de ma kyiri hwo na nshi gworep, ko tɛmɛ-nshi mo na bang o,

²⁰ano mê gyeng o tanga vemo de be gyiris vɔk e dem bevuvwel, vɔk e kwɔn bemât raane. Mê tɛ̀ hwo sangal e nɛ̂n vwel, e tê barin, tanga vemo de be gyiris vɔk e dem bevuvwel, yaga na bemat be to sangal e ji mo wɛt, kɛ hwo vɔk kwɔn sangal e vwel bemat beken wɛt.

²¹Mê tɛ̀ yɛnɛ mo he sè ves, hwô to hwo sè wɛt. Bê jama hwo, ko bê sang to sɛ o wɛt. Me Darwey Dagwi Darwey ma ha ano.”