Read berom Yɛzɛkyɛl 27 Bible Online

Yɛzɛkyɛl 27 - berom bible

Yɛzɛkyɛl 27

¹Dagwi Darwey a ha na me, a ye,

²“Di hwo à mwasi, ra lwɛlɛ̂ sin e ra Tur,

³ko hwo yang Tur o, de a sé sangal e nû gworep, de a sé kwɔn bejik bemat yi e bakwogom pyak, yang ɛn, Darwey Dagwi Darwey a ye: “À hwo Tur, hwà ga ye, ‘Ma sila na nerat.’

⁴Gworep gwa rɔnɔ mwa yɛnɛ mo, bemât lɔk mo ba tɔrɔ hwo yɔ̀kyɔk, sede dwa-nshi,

⁵Yɛn a yong mwa bebak cɔ́gɔt mo na cɔ́gɔt fir yi e Senir, yɛn a jut cɔgɔ̂t sida yi e Lɛbanɔn na be yong mɛ swesêk pɛ́sɛl gul mo.

⁶Yi na cɔ́gɔt ouk yi e Bashan, ba yong mɛ̀ begelê gangas mō, ba tɛ̀ ragyip mo na cɔ́gɔt sayprɛs yi e bakwogôm Kipirus, ko ba tɔrɔ yɛ na yìn gbin.

⁷Ba yong rugû pɛsɛ̂l gul mo na linen wo Misra de ba kyɔrɔk wɛ na wo sè pyɛ dura mo. Ba bang ragyip o na rugu twing, gwa sé wilwil na zwey yi e vwel Elisha.

⁸Bemat sangal e Sidɔn na Arvat vɛ à bemât gangas mo. Bemat sekwɛl mo vɛ à vê gangas dwa mó.

⁹Bemakûk Biblɔs na vê sekwɛl mɛn ba sé tanga hwo, be kyě manas nedem de ne tele. Mwa bemat gangas bedwa-nshi na bedwa mɛn ba sé tanga hwo, na be ragas byɛ.

¹⁰Bemât Pɛrsya, na Lut tanga Put ba sé e ji bemat como mo, begbɔng besuga mo. Yɛn á tikis beruga na bebong dyam mɛn e ji mo, bá nɔngɔs hwo gbɔng-nerat.

¹¹Bemat Arvat na bemat como mo, yɛn á rɔnɔ jwa-pomo mo mwa bemat Gamat yɛn á sè e ra tyɔ́n mo. Yɛn á tikis beruga mɛn e ra jwa-pomo mo be gwɔrɔ mɛ wɛ, bá tɛ̀ hwà sila na nerat.

¹²“Tarshish á sè sâ byɛ mo, ko yaga nepyak pyɛ̂ nedanerey mo, á seres pyɛ́ mo mó na dyam pyɛng, na dyam, na mbus tanga dyam shi.

¹³Bemât Yavan, na Tubal tanga Meshek bá ragas byɛ na hwo. Yɛn á seres pyɛ́ mo na bemasi tanga nedirî pyɛ̂ dyam pama.

¹⁴Bemât Bet-Togarma bá seres pyɛ́ mo na bedwâ fwom, na bedwâ como tanga bedwa-madung.

¹⁵Bemât Rodos bá ragas byɛ na hwo, bemât bavwel vwara gworep bá rɛsɛl á hwo yìn gbin, na cɔ́gɔt shi e tô pyɛ̂ byɛ mō.

¹⁶BeSirya bá seres nepyak pyɛ̂ rɛsɛl mo. Hwà seres pyɛ̂ dyéngere ryat, na berugu zwey, na vèmo de ba kyɔrɔk tolo mo, na berugû linen puruk, na bekwǒk pyɛ̂ gworep tanga pyɛ̂ beta berat e nû pyɛ́ de hwó rɛsɛl.

¹⁷BeYuda na vê sevwel Israyɛl bá ra byɛ̂ pyɛ́ mo na alkama yi e Minit, na nèy regwi, na shok, na něy pwat, tanga nezap shɔngɔ̂l nesang nerat.

¹⁸Bemât Damaskus bá ra byɛ na hwo yaga nezap pyɛ́ mō tanga ne pyɛ̂ yele mo. Yɛn á seres yɛ na nshi anap ne Hɛlbɔn na wuulu pwɛng.

¹⁹Bemât Vedan na Yavan bá ra byɛ na hwo na dyam de ba rugut, tanga mapak-rɔɔtɔt na nezap shɔngɔl.

²⁰Bemât Dedan bá seres pyɛ́ mo na bewap bedwa.

²¹BeArap na begwɔ̀m Kedar bá seres pyɛ́ mo — byôt tyimit, na beturuk tanga begam.

²²Bejik Sheba na Raama bá ra byɛ na hwo, bá seres nezap pyɛ́ mo na pyɛ̂ shɔngɔl de ya dal na nerat, na nedôk pyɛ̂ beta berat tanga dyam shinang.

²³Bemat bapomô Haran, na Kane tanga Ɛdɛn, na bejik Sheba, na vê Ashur tanga Kilmat mwa hɛn bá ra byɛ na hwo.

²⁴Yɛn á rɛsɛl a hwo berugû kaa, na vemo de ba sé zwey, na vemo de ba kyɔrɔk tolo mo, na beput vwel vè bùm rat, na rik tanga bezining de ba tak vɛ jiritit.

²⁵E bedwa-nshi vê Tarshish de bá kyě hashe a hwo pyɛ́ mo. “Ano hwá sila, ko hwá sè dirik e hwomo e tê gworep.

²⁶Bemât gangas mo bá vey na hwo, e gworep de gwà tɛnɛ hɛ. Gûl rak gwa kwɔrɔs hwo e hwomo yikyik e gworep.

²⁷Pyɛ̂ yele mo, na nedok nekyɔrɔk mo na pyɛ̂ nejik mo, na bemât fwom mo, na vê gangas mo, bemât manas nedem de ne tele na bejik byɛ mo, na mwa bemât como e ji mo, na mwa nezap bemat de ba sé e ji mo, ba ye pyɔp e yey gworep e tûk gawey mo.

²⁸Jeng de yɛn ê wok sesîn bemat gangas mo, bakwogom bê digis,

²⁹ko mwa bemât gangas bedwa, bê nunus yi e bedwa mɛn. Bemât gangas o na vê kyé na vɛ, bê tumsal e bakwogom,

³⁰ko bê dak bèkun e ra yin, bê tosho tyɔng wɛt. Bê lusha fongol e bato mɛn, ko bê biring e fongol.

³¹Yɛn ê wula bato mɛn, ko bê tɛ̀sɛ berugu sesin, yɛn ê tosho sizɔng yaga yin, ko yɛn ê ra sesin min sizɔng.

³²E ji dâk sekun mɛn, yɛn a sogo na sesin e ra hwo ba tē: Ba ga sang wey na wà sede Tur e tê gworep ɛ?

³³Jeng de ba kyě kyè na pyɛ̂ nejik mo e bapomô bakwogom, bemât bavwel bá sɛ̀ pyɛ́ de bá simo, yi na nepyak pyɛ̂ nedanerey mo na yê nejik mo, hwá tɛ̀ begwɔ̀m jey be vɔk yele.

³⁴Ko di, hwà ga kwɔrɔs hwo e ji gworep, e hwomo e nɛ̂n nshi ciwil, pyɛ̂ nejik mo mwa na mwa bemât fwom mo, ba ga ye pyɔp tanga hwo.

³⁵Mwa bemat sangal e bakwogom, a ga yang ɛn yɔɔt na hwo, ko begwɔ̀m mɛn ba vo bengyip sizɔng, bayis mɛn ba lashe hɛn.

³⁶Bejik yére bemat jey be tē ‘Ànyeyêy’ na hwo. Yɛnɛ mō ha sé ves tyɔng wɛt, hwô to sè wɛt nesheneshey.”