Read berom Yɛzɛkyɛl 28 Bible Online

Yɛzɛkyɛl 28 - berom bible

Yɛzɛkyɛl 28

¹Dagwi Darwey a ha na me, a ye,

²“À mwasi, há a gbɔng gwɔ̀m Tur wɔgɔ, Darwey Dagwi Darwey a ye: “Yey mo yé ra kaa, ko hwà ye, ‘Ma sé dagwi, me sangal e gwofwa bedagwi, e tê berep’, ko sɛ̌ wís, hwà sé mwasi, hwà sé dagwi wɛt, mwa ano de hwà jut tó mo wo netsitsɛng sede dagwi hwak.

³Ey, hwo bara hwà vɔk netsitsɛng sede Danyɛl, vit a pyɛ neyaang de ya sɛ́ e lɛrɛ na hwo.

⁴Yi na netsitsɛng mo na bare yey mo, hwà ga tula a tó mo pyɛ̂ nedanerey pyak, ko hwà ga tula dyam shinang na dyam pyɛng e begban mo.

⁵Yi na gbɔng netsitsɛng mo e byɛ, hwà ga gwɛ̌ nepyak yele mo, ko yey mo ye ra kaa na yɛ̀,”

⁶Ko di, Darwey Dagwi Darwey a ye: “Sede remo de hwà jut tó mo wo netsitsɛng, sede dagwi hwak,

⁷ano, mê vey na yére dyuk e ra hwo, yére de ya dal bwang o na neves, yɛn ê hwɔlɔ bewal como mɛn e ra nerât netsitsɛng mo, na be lashe mɛ gbɔng nerat mo.

⁸Yɛn ê bomo hwo e ji gwovɔng sak, ko hwô ku reku reves, e hwomo e nɛ̂n gworep.

⁹Hwô to ye, ‘Ma sé dagwi, e nuyêl vemo de ba mɔrɔ hwo, mwa ano de hwà sé mwasi, ko e dagwi wɛt, e vɔ vemo de ba mǎ hwo a?’

¹⁰Hwô ku rekû bemandul, e vwɔ̂ bemat yére dyuk. Me Darwey Dagwi Darwey ma ha ano.”

¹¹Ano arɔng, Dagwi Darwey a to ha na me, a ye,

¹²“À mwasi, ra lwɛlɛ̂ sesin e ra gbɔng gwɔ̀m Tur, ko hwo yang ɛ, Darwey Dagwi Darwey a ye: “Hwá sè pyɛ durâ síla gyat, hwá sila na netsitsɛng, ko hwá sè gyat e bɛrɛng.

¹³Hwá sè e Ɛdɛn, bwî Dagwi, hwá tɔrɔ hwo kyúruk na kayɛ dyéngere ryat, yɛ̄ à karnelyan, na kirisolit, na dɛ́mɔn, na beril, na onis, na yaspa, na safir, na ye wilwil, tanga ɛmɛral. Hwá tɔrɔ hwo na pyɛ̂ dyam shinang. Bá yong a hwo yɛ yimo tuk de bá yong o.

¹⁴Ma nɔng o pyɛ cen ye bɛ́rɛng nekanang, hwá sè e ra rakû jɛrɛ wo Dagwi, hwá kyě kyè e tê cilâ kyâ hwalang.

¹⁵Negwɔn mo ná sè gyat, yi e tuk de bá yong o, sɛ̌ jeng de ba sɛ̀ banɛn e ji mo.

¹⁶E ji nepyak byɛ mo, hwá sila na yol, ko hwá ra banɛn, yi ano, ma barak hwo sede pyɛ ligis, yi e rakû Dagwi, ko pyɛ cen yè bɛrɛng nekanang ya ro o, yi e tê cilâ kyâ hwalang.

¹⁷Yey mo ya ra kaa yaga nerat mo, hwà lashe netsitsɛng mo yi na durâ gbɔng nerat mo. Ma barak hwo vɔk e vwel, ma wunta pyɛ̂ neyaang mo e nuyel begwɔ̀m na yɛn a bɛrɛng nejɛng mo wɛshɛrɛk.

¹⁸Yaga nepyak banɛn mo, na nevît necik mo e byɛ, hwà ra jɔgɔ na nekwɔn jɛrɛ mo. Ano, ma tɛ̀ kya he nusu yi e ji mo, ko ha re o, ko ma tɛ̀ hwo sè fongol pwɛng e jey, e bayîs mwa vemo de ba bɛrɛng hwo.

¹⁹Mwa vemo de ba tɔk o e ji bemat o, a yang ɛn yɔɔt na hwo, hwà ga vey e ra yɛnɛ ves, ko hwô to sè wɛt nesheneshey.”

²⁰Dagwi Darwey a yang me:

²¹“À mwasi, sɛt bayis mo vɔk e Sidɔn, na hwo zarap e ra pomo mo,

²²na hwo ye, Darwey Dagwi Darwey a ye: “Me ra repugu na hwo, à Sidɔn, ko mê sɛ̀ gbɔng nerat e tē mo. Yɛn ê tɔk, me wɛ à Dagwi Darwey, jeng de ma yɛrɛ a hɛ shɔ̄t, na me dura nejɛrɛ hom e ji hɛ.

²³Mê tomo na tumbang e ra hɛ, na lushâ nemi e nehyok hɛ. Bê kushu be gabsa bavin o e tê hɛ, wâl como wô sè e ra hɛ e kawɛ bak. Ko yɛn ê tɔk, me wɛ à Dagwi Darwey.”

²⁴Dagwi Darwey a ye, “E jeng o, vit à yerê bemat jey cak de ya gwɔrɔ yin BeIsrayɛl, ko ya byɛs hin, de yê sang to mǎ hin sede rɔgɔ kɛ shik. Ko yɛn ê tɔk, me wɛ à Darwey Dagwi Darwey.”

²⁵Darwey Dagwi Darwey a ye, “Jeng de mê tula BeIsrayɛl yi e bemat de ba kana shara hɛn vɔk na yɛn, na me dura nejɛrɛ hom e ji mɛn, e bɛ́rɛng yére bemat jey, ano yɛn ê sangal e vwel mɛn de má kana nɔng mwat fwom hom Yakɔp.

²⁶Yɛn ê sangal tyang e ji hɛ, yɛn ê lɔk nelɔ na be tus bě anap. Yɛn ê sangal tyang, jeng de mê hwo tabak mwa bemat vwara mɛn de ba kana kyě byɛs ɛn. Ko yɛn ê tɔk, me wɛ à Dagwi Darwey, Dagwi mɛn.”