Read berom Yɛzɛkyɛl 29 Bible Online

Yɛzɛkyɛl 29 - berom bible

Yɛzɛkyɛl 29

¹E tuk hê kuru na hɛ ba, hê pwɛl gwo kuru gwo shey hê kuru, hê sesam mot, Dagwi Darwey a ha na me, a ye,

²“À mwasi, sɛt bayis mo e ra Farawo, gbɔng gwɔ̀m Misra, na hwo zarap e ra yɛ, na e ra mwa vwel Misra.

³Hanat na hwo ye: Darwey Dagwi Darwey a ye: “Di, ma sé ra repugu na hwo, à hwo Farawo, gbɔng gwɔ̀m Misra, hwo gutsang de wa dyɛng e tê gwɔrɔ̂t gwɛ, hwó tē, ‘Gwɔrɔ̂t Nil gwa sé gwonwang ma yong gwɛ yaga tó hom.’

⁴Mê tɛ̀ begúk e bèkarin mo, na me tɛ̀ betɔk o be tē pang e rebek mo. Mê hwɔtɔ hwo e jey yi e gwɔrɔt o, na mwa betɔk de ba tē pang e bek mo.

⁵Mê barak hwo e hey, hwo na mwa betɔk o, hwô gaba e tê-dyɛng ko bê jut o kɛ be lɛrɛ hwo wɛt. Mê tɛ̀ hwo sè pyɛ̂ re ngyāma, pyɛ̂ re benon lagwi.

⁶Ano, mwa bemât sangal e Misra bê tɔk, me wɛ à Dagwi Darwey, yaga hwà sé a BeIsrayɛl sede cwang sere.

⁷Jeng de yɛn a tē yìk e ra hwo, hwà kwɔrɔ hwo, ko cɛ́k mo ya sɔksɔl a yɛn vɔ. Jeng de yɛn a ye yɛndɛng e ra hwo, hwà kwɔrɔ hwo, ko yɛn a gaba, ba pere mǎ nèma mɛn.

⁸“Me Darwey Dagwi Darwey ma ye: Mê vey na wal como e ra hwo, ko yɛn ê mɔbɔs bemat mo mwa na yas mo.

⁹Vwêl Misra hê tɛ́ ɛ gbingiring, vit à pyɛ. Ano, yɛn ê tɔk, me wɛ à Dagwi Darwey. “Hwà ye, ‘Gwɔrɔt Nil gwa sé gwonwang, e me de ma yong gwɛ.’

¹⁰Yaga ano, me ra repugu na hwo na gwɔrɔt o mwa, ko mê tɛ̀ vwêl Misra he tɛ́ ɛ gbingiring, vit à pyɛ, yi e Migdɔl vɔk e Aswan pere vɔk e yɛnɛ vwêl Etiyopya.

¹¹Vit à mwasi kɛ ngyama de yê kwey e ji hɛ, hê nàra hal neshey kuru banaas.

¹²Mê tɛ̀ vwel o he dal bwang bavwel mwa na negbingiring, ko mwa bapomô hɛ bê sè barin neshey kuru banaas, bê dal bwang bapomô gbingiring na neves. Mê shara BeMisra mo e ji yére bemat jey ko mê kyě gasang hɛn e bavwel baduk.”

¹³Darwey Dagwi Darwey a to ye, “E bama neshey kuru banaas, mê to tula BeMisra yi e yére dyuk de ma kana shara hɛn ɛ.

¹⁴Mê to toyo na BeMisra mo, na me tɛ̀ yɛn a sangal e vwêl Patrɔs, vwel mɛn hê raane. E hwomo, yɛn ê to vɔk segwɔm sê gap wɛt,

¹⁵Yɛn sê dal bwang o mwa na nemɛrɛk, ko sê sang to re yére bemat jey cak wɛt. Mê tɛ̀ yɛn a sè hyehyet ko yɛn ê tɔk to vɔk reto e ra yére bemat jey cak wɛt.

¹⁶Yɛn ê sang to sè pyɛ de BeIsrayɛl bê tɛ̀ gap mɛn e ra yɛ wɛt. Gabâ Misra hê tɛ̀ BeIsrayɛl bê di buru mɛn jeng de yɛn á kana wɔ jama sɛlɛ mɛn. Yi ano, BeIsrayɛl bê tɔk, me wɛ à Darwey Dagwi Darwey.”

¹⁷E tuk hê mɛsɛng hê pwɛl gwo mɛsɛng, gwo shey hê kuru baba na hɛ taama (27) hê sesam mot, Dagwi Darwey a ha na me, a ye,

¹⁸“À mwasi, Gbɔng Gwɔ̀m Nɛbukadnɛzar wo Babilɔn a tɛ̀ bemat como mɛ be ra fwom na gap tyɔng wɛt e ra pomô Tur, yi ano, tô kawɛ mɛn ha rɛng ɛ́, ko basanat mɛn ba pere forok arɔng. Mwa ano, Nɛbukadnɛzar o na bemat como mɛ ba tɔk sɛ̀ pyɛ cak e Tur o de bê tɔk tala mɛ yɔ́m de ba sɔ e ra hɛ wɛt.

¹⁹Ko di, me Darwey Dagwi Darwey ma ye: Mê nɔ̂ng Gbɔng Gwɔ̀m Nɛbukadnɛzar wo Babilɔn vwêl Misra sede pyɔlɔ̂ bemat como mɛ, ko ê hashe yas hɛ, a wey na hɛ, ko a jugu hɛ.

²⁰Ma ga nɔng ɛ vwêl Misra na me tala hɛn mɛ̀ fwom de yɛn a ra a me. Me Darwey Dagwi Darwey ma ha ano.

²¹“E tuk o mê tɛ̀ hwak e ji yerê Davit wo Israyɛl a nusu na gap sede ngwɛngɛ, na a tɛ́ ɛ gwɔ̀m, ko hwo, a Yɛzɛkyɛl mê wunta nu mō e tē mɛn. Ano de yɛn ê tɔk me wɛ à Dagwi Darwey.”