Read berom Yɛzɛkyɛl 3 Bible Online

Yɛzɛkyɛl 3 - berom bible

Yɛzɛkyɛl 3

¹Ko a yang me, “À mwasi, re bwok-basa gwomo, na hwo kyè wɔ ha na BeIsrayɛl.”

²Ano ma wunta nu hom, ko a nɔng me gwɛ na me re.

³A yang me, “À mwasi, re bwok-basa mo na hwo sila jim na gwɛ.” Ano ma hwo re gwɛ, ko e nu hom gwa ta rɔkrɔk sede shok.

⁴A to yang me, “À mwasi, wɔ na BeIsrayɛl na hwo ha a yɛn tsak neha hom.

⁵Ma sé tomo hwo vɔk na yere bemat jey de ye ha lem detu, ko ha sé gbang wɛt, ma sé tomo hwo vɔk na BeIsrayɛl.

⁶A sé vɔk na bemat behak beduk de ba vɔk lem de ha sé gbang na hwo tɔk wɛt. Ka ma yang tomo hwo na yere bemat beduk, ka yɛn a yang wet betong na hwo.

⁷Ko BeIsrayɛl bê wet betong na hwo wɛt, yaga yɛn e simo be wet betong na me wɛt. Mwa BeIsrayɛl, bato mɛn ba sé gbarak, ko neyey mɛn na sé kashalang arɔng.

⁸Ko di, ma ga tɛ̀ hwo sè gbarak, na hwo sè kashalang sede yɛn.

⁹Sede remo de dyéngere ryat ya dal sulup na negbarak, ano de mê tɛ̀ hwo se e nuyel mɛn. Hwo kwon wok bengyip mɛn, kɛ hwo sap ɛn yaga yɛn e bɛrɛng hwo ves wɛt, yaga yɛn a sé yerê sogo nehywɛ.”

¹⁰Ko a to yang me, “À mwasi, sey neha de mê ha a hwo e yey mo, ko hwo wok nɛ̀ na betong mo.

¹¹Ano, wɔ na vê sesam, vɔk na bemat mo, ko hwo ha na yɛn. Yang ɛn, ‘Wok in hâ Darwey Dagwi Darwey’, kɛ yɛn a wet betong, kɛ yɛn a kyɛ́ ɛn nà wok ayi.”

¹²Gabîk Dagwi ha yang me cik, ko e bama hom ma wok gbɔng digîs jey, ha sé gbɔng nerat Dagwi Darwey de na sogo yi e kwɔn sangal mɛ.

¹³Ma to wok rewɔng bafabak pyɛ́ cen de be ragas bemɛn, na rewɔng bahara de ba sé e bahagat pyɛ́ cen o, pyɛ mo ya lumla sizɔng.

¹⁴Gabik Dagwi ha yang me cik, ko ha jut me, ha kyè na me, ma kyè na lashê yey, gabik hom ha beseng, yaga gâp vwɔ Dagwi Darwey de gwa hwo e ra me.

¹⁵Ano, ma vey e Tel-Avif, e hagat Rɔt Kebar, kwɔn de bemat sesam o ba sangal ɛ. Ma sangal na yɛn pɔlɔ taama, á sè a me yɔɔt.

¹⁶E bama nepɔlɔ netaama mo, ko a yang me,

¹⁷“À mwasi, ma ga tɛ̀ hwo se mwat gyeng BeIsrayɛl. Jeng de hwà wok ha e nu hom, ko hwo wɔ tusa hɛn e to hom.

¹⁸Ka sede ma yang bemat beves, ‘Yin ê kushu mwin’, ko hwà tusa hɛn wɛt, kɛ hwo ha na hwo tusa bemat beves yi e gwòng mɛn, na hwo sey neken mɛn wɛt, bemat beves o bê kushu e ji banɛn mɛn, ko mê jama nemi mɛn e vɔ mo.

¹⁹Ko ka sede hwà tusa bemat beves, ko yɛn a doyo yi e neves mɛn kɛ yi e begwong mɛn wɛt, yɛn ê kushu yaga banɛn mɛn, ko hwà ga sey neken mo à hwo.

²⁰“Ano arɔng, ka sede vê cik ba doyo yi e necik mɛn ko ba ra banɛn, ko ma tɛ̀ pyɛ tiris bol e nuyel mɛn, yɛn ê kushu, yaga banɛn mɛn, ko tomông necik de yɛn a ga kana ra bê bare na vɛ wɛt, ko yaga hwà ga tusa hɛn wɛt, mê jama nemi mɛn e vɔ mo.

²¹Ko ka sede hwà tusa vê cik, na be kwon ra banɛn wɛt, ko yɛn a ra banɛn wɛt, ko yɛn ê nàra beken mwin, yaga yɛn a sey túsa mo, ko hwô sey neken mo arɔng.”

²²Reto Dagwi Darwey ra sé e ra me e hwomo, ko ra yang me, “Sogo, kyè vɔk e nɛk, ko mê ha na hwo e hwomo.”

²³Ano kwong, ma sogo, ma kyè wɔ e nɛk o. Ko ma di gbɔng nerat Dagwi e tumal e hwomo sede gbɔng nerat de má kana di e hagat Rɔt Kebar. Ko ma gaba gup.

²⁴Gabik o ha hwo e ra me, ha yang me cik e ra bol hom, ko ha ha na me, ha ye, “Kyè na hwo wɔ man to mō e lɔ mo.

²⁵Ko hwo, à mwasi, bê rɔgɔs hwo na bezining, yaga na hwo tɔk kyě kyè na bemat wɛt.

²⁶Mê tɛ̀ lem mo he man ɛ e nu mo, yaga na hwo tɔk ha kɛ gyong ɛn arɔng wɛt, yaga yɛn a sé yerê sogo nehywɛ.

²⁷Ko jeng de mê ha na hwo, mê wunta nu mo, ko hwô yang ɛn, ‘Darwey Dagwi Darwey a ye.’ Tik vemo de bê wok, be wok, ko tik vemo de bê kyɛ́ ɛn nà wok, be kyɛ́ ɛn, yaga yɛn a sé yerê sogo nehywɛ.”