Read berom Yɛzɛkyɛl 30 Bible Online

Yɛzɛkyɛl 30 - berom bible

Yɛzɛkyɛl 30

¹Dagwi Darwey a ha na me, a ye,

²“À mwasi, zarap na hwo ye: Darwey Dagwi Darwey a ye: “Dak sekun: Gawey e ra tuk o!

³Jeng o ya ga vey bagat. Jeng Dagwi Darwey ya ga vey bagat. Jeng o yê sè mwangalang na bale, jeng reyɔ̂m yére bemat jey!

⁴Wal como wô nusu e ra Misra ko rezot rê hwo e ra Etiyopya. Bê kushu be gabsa bavin o e Misra, bê jugu pyɛ̂ nedanerêy hɛ, bê gangas batîs hɛ.

⁵“Etiyopya, na Put, na Lut, na mwa Arabya tanga Libya bê gabsa e de como tanga mwa bemat de ba wuna hɛn na yɛn e de como mó.”

⁶Dagwi Darwey a ye: “Vemo de ba dyɛng ɛ̀ mā e Misra bê gaba, gap de he ra kaa na hɛ, hê tala hɛ. Bê mɔbɔs hɛn na wal yi e Migdɔl vɔk e Aswan. Darwey Dagwi Darwey a ye ano.

⁷Yɛn ê dal bwang bavwel mwa na negbingiring, ko mwa bapomo bê dal bwang bapomô gbingiring na neves.

⁸Ano, yɛn ê tɔk, me wɛ à Dagwi Darwey, jeng de ma dak kya e ra Misra, ko ma ga kwɔrɔs mwa vê sɛlɛ hɛ.

⁹“E jeng o, betom bê nusu yi na me e dwa-nshi na be shìsa BeEtiyopya e sangal bɛs mɛn, ko rezot rê hwo e ra yɛn e jeng gwazɛrɛ̂k Misra, yaga jeng o ye kyè vey!”

¹⁰Darwey Dagwi Darwey a ye: “Mê tɛ̀ bagyɛng Misra be tala hɛn, mê ra ano na vwɔ̂ Gbɔng Gwɔ̀m Nɛbukadnɛzar wo Babilɔn.

¹¹Yɛ̀ na bemat como mɛ de ba dal vê bwang yére bemat jey na neves, bê wey na yɛn na be wey na vwel o. Yɛn ê hwɔlɔ bewal mɛn e ra Misra, na be sila vwel o na bavin bemat.

¹²Mê tɛ̀ Gwɔrɔt Nil gwo hworok, mê rów a bemat beves vwel o. Mê tɛ̀ vwel o na kayɛ pyɛ e ji hɛ ye lashe hɛ, mê ra ano na vɔ bemat yére dyuk. Me Dagwi Darwey ma ha ano.”

¹³Darwey Dagwi Darwey a ye: “Mê wey na cī, na me tɛ̀ kwɔk cī e Mɛmfis. Bê to sɛ̀ gwɔ̀m e vwel Misra wɛt, ano mê tɛ̀ bengyip be hwo e ra mwa vwel o.

¹⁴Mê tɛ̀ pomô Patros he tɛ́ ɛ barin, ko mê dak kya e Zowan. Mê yɛrɛ shɔt e ra Tebes.

¹⁵Mê shusha shom hom e ra Pelusiyum, pomô gap hê Misra, mê wey na regyɛng bemât Tebes.

¹⁶Mê dak kya e ra Misra, pomô Pelusiyum hê wok rezot sizɔng. Bê gangas jwa-pomô Tebes, ko hê Mɛmfis hê wosho na vê repugu.

¹⁷Bewên On na Pi-Beset bê wey na bewal, ko bê hashe bwang mɛn vɔk e de sesam.

¹⁸E pomô Tehaf-nehes jeng o yê sè gyibilik, jeng de ma kwɔrɔ retô vwêl Misra. Ko kaà gâp hɛ hê yɛnɛ hɛ, rele rê bang repomo mo, ko bê hashe nebapomo mo vɔk e de sesam.

¹⁹Ano de mê yɛt shɔ̄t e ra Misra. Yi ano de yɛn ê tɔk, me wɛ à Dagwi Darwey.”

²⁰E tuk he taama he pwɛl gwo mɛsɛng gwo shey he kuru na hɛ hining he sesam mot, Dagwi Darwey a ha na me, a ye,

²¹“À mwasi, ma ga kwɔrɔ vwɔ̂ Farawo gbɔng gwɔ̀m Misra. Vit à mwat de a ga rɔgɔs a yɛ gwɛ, kɛ a bang gwɛ na kɛbàk rugu, yaga na gwo bin vel, gwo to tɛ̀ gâp vɔ̂k wal.

²²“Ko di, pyɛ de me Darwey Dagwi Darwey ma sé ha à yemo: Me ra repugu na Farawo, gbɔng gwɔ̀m Misra. Mê kwɔrɔs vɔ mɛ — rwat o gwô gap na gwomo de gwa ga kana kwɔrɔ hɛ. Mê tɛ̀ wal mɛ wo gaba yi e vwɔ mɛ.

²³Mê shara BeMisra e ji yére bemat jey ko mê gasang hɛn e bavwel mwa.

²⁴Mê gwɛ̌ a vɔ gbɔng gwɔ̀m Babilɔn gap, ko me nɔng ɛ wal hom e vwɔ mɛ. Ko mê kwɔrɔ vɔ Farawo, ko ê rus e nuyel mɛ, na yerê rûs mwat de ba ga mǎ hɛ ko ê dal wɛt.

²⁵Mê gwɛ̌ a vɔ gbɔng gwɔ̀m Babilɔn gap, ko vɔ Farawo bê gaba gbɛrɛk. Ano de yɛn ê tɔk, me wɛ à Dagwi Darwey, jeng de ma tɛ̀ wal hom e vwɔ̂ gbɔng gwɔ̀m Babilɔn. Yɛ ê nára gwɛ tabat e ra vwel Misra.

²⁶Mê shara BeMisra e ji yére bemat jey ko me gasang hɛn e bavwel mwa. Yi ano, yɛn ê tɔk, me wɛ à Dagwi Darwey.”