Read berom Yɛzɛkyɛl 31 Bible Online

Yɛzɛkyɛl 31 - berom bible

Yɛzɛkyɛl 31

¹E tuk hê mɛsɛng he pwɛl gwo netat, gwo shey he kuru na hɛ hining hê sesam mot, Dagwi Darwey a ha na me, a ye:

²“À mwasi, ha a Farawo, gbɔng gwɔ̀m Misra na regyɛng bemat mɛ ngan: “Be tɔk tyɛngrɛ wà na nerey mo ɛ?

³Hwà sé sede Asirya, sede cɔgɔ̂t sida e Lɛbanɔn, na nelang nerat, na necam naka, cɔgɔt lyis sizɔng, ya wɔ̀ wul bale e lagwi.

⁴Nshi na tɛ̀ ya rás nshî ji vwel na tɛ̀ ya sé lyis, nerɔt nà tele na rɔnɔ kwɔn de ba tus ɛ̀ yɛ, nerɔt nè bagat na kwɔn o né nɔngɔ̂s mwa cɔ́gɔt rehwot nshi arɔng.

⁵Ano ya ras e rak o, ya dal bwang cɔ́gɔt rehwot o, nelang yɛ na sé neting, ko na ras nelis o, yi na nepyak nshi e ji nɛ.

⁶Mwa benon lagwi ba lɔkɔs barɛngɛ mɛn e nelang o, e nɛ̂n nelang o mwa ngyāma ya tɔs ɛ̀ nèy yɛ̄, ko e necam yɛ mwa yere bemat jey ryey o ya sangal ɛ.

⁷Yà sé ryat e bɛrɛng nerêy yɛ, na e nelis nelang yɛ, yaga berinis o ba sé tsík e nshi polos e nɛ̂n vwel.

⁸Cɔgɔ̂t sida bwî Dagwi ya wul yɛ na nerat wɛt, kɛ nelang cɔ́gɔt fir na wul ne yɛ wɛt, cɔ́gɔt plen ya sé pyɛ cak de bê tyɛngrɛ na nelang yɛ wɛt. Vit à cɔgɔt e bwî Dagwi de ya sé ryat e bɛrɛng sede yɛ.

⁹Ma tɛ̀ yɛ ye sè ryat e bɛrɛng, na nepyak nelang yɛ, pyɛ marâ yîs mwa cɔ́gɔt Ɛdɛn de yá sè e bwî Dagwi.

¹⁰“Yaga ano, Darwey Dagwi Darwey a ye, A remo de yà ga ras, ko rà rak yɛ wa wɔ̀ wul bale, ko yêy yɛ ye ra kaa na nelis o,

¹¹ma nɔng yɛ e vwɔ̂ gbɔng gwɔ̀m wo yére bemat jey. Yɛ á teshe na yɛ tyɛng na nevês yɛ. Ma ga gang yɛ e jey.

¹²Yére dyuk yi e yére bemat jey de ya dal na neves ba ga tow yɛ, ba hala yɛ. Nelang yɛ na ga gaba e ra beraku na benɛk, ko bagâp yɛ ba dyɛng e mwa begwong nshî vwel o, ko mwa bemat jey ba shara hɛn yi e necam yɛ, ko yɛn a hala yɛ.

¹³“E ra bîm yɛ de ya gaba, mwa benon lagwi ba sangal ɛ, na e ra mwa nelang yɛ, mwa ngyāma ya dyɛng ɛ.

¹⁴“Ba ra ano yaga na mwa cɔ́gɔt de ya sé e nû nshi ye kwon to ras ano wɛt, kɛ ye sè lyis wɔ̀ wul bale wɛt, yaga na cɔ́gɔt de ye sɔ nshi polos ye ras sede yere mo wɛt. “Ba ga nára yɛ mwa e vwɔ̂ reku, vɔk e jêy nɛ̂n vwel, mwa na bemasi, vemo mwa de be kyè vɔk e gwovɔng sak.”

¹⁵Darwey Dagwi Darwey a ye: “E tuk de ya wɛrɛ e kwɔn bevuvwel, ma tɛ̀ neciwil ne bang yɛ, na ye ra sesîn yɛ. Ma dul nerɔt o, ko nshi de né dɔng na ye jɔng. Ma tɛ̀ lwil gwo bang Lɛbanɔn yaga yɛ, ko mwa batin cɔ́gɔt rehwot o ba hworos yaga yɛ.

¹⁶Ma tɛ̀ yére bemat jey ye vow na wûs gabâ yɛ, jeng de ma gang yɛ e kwɔn bevuvwel. Ko mwa cɔ́gɔt Ɛdɛn, na yemo de ba kasa yaga nerât yɛ e Lɛbanɔn, na mwa yemo de nshi na vey a yɛ, ya wok netâ gabâ yɛ.

¹⁷Yɛn arɔng ba raa yɛ̀ vɔk e kwɔn bevuvwel, na vemo de ba mɔbɔs na wal como, mwa na bemât gafiri mɛn, yɛn vemo de bá sangal e nɛ̂n necam yɛ e ji yére bemat jey.

¹⁸“Bê tɔk tyɛngrɛ yɛ e ji cɔ́gɔt Ɛdɛn na gbɔng nerat mo na nerey mo ɛ? Mwa ano, bê gang o na cɔ́gɔt Ɛdɛn vɔk e jey nɛn vwel, hwô sangal tanga bemandul, na vemo de ba ga mɔbɔs na wal arɔng. Ha hemo mwa ha sé e ra Farawo, gbɔng gwɔ̀m Misra na regyɛng bemat mɛ. Me Darwey Dagwi Darwey ma ha ano.”