Read berom Yɛzɛkyɛl 32 Bible Online

Yɛzɛkyɛl 32 - berom bible

Yɛzɛkyɛl 32

¹E tuk he mɛsɛng he pwɛl gwo kuru na vɛ ba, gwo shey he kuru na hɛ ba he sesam mot, Dagwi Darwey a ha na me, a ye,

²“À mwasi, ra lwɛlɛ̂ sesin na Farawo, gbɔng gwɔ̀m Misra, na hwo yang ɛ: “Hwà jut tó mo sede gukum e tê yére bemat jey, ko hwà sé sede gutsang e ji berep, hwó kyě tabas nshi e nerɔt, hwó kyě mwɛrɛk nshi mó na bol mō, hwà tɛ̀ nɛ gbiridik.”

³Darwey Dagwi Darwey a ye: “E tulâ bemat pyak, mê bomo segun hom e ra hwo, ko mê hwɔlɔ hwo e ji segun o.

⁴Mê bomo hwo e vwel, mê werek hwo e tê-dyɛng, mê tɛ̀ mwa benon be gyirik e ra hwo, ko mê tik ngyāma mwâ jey ye re banama mo.

⁵Mê shara banama mo e ra beraku, ko mê sila benɛk na revin mo.

⁶Mê sing vwel na nemi mo ko nê sila hɛ̄ vɔk e beraku, ko begwong nshi bê sila na bek mo.

⁷Jeng de ma ga wey na hwo, mê bang lagwi, ko mê tɛ̀ betangacɛn mwangalang. Mê bang gwi na rele, ko pwɛl gwô nɔng negbey wɛt.

⁸Mwa nekya de ne lolo e lagwi, mê tɛ̀ ne sè á hwo mwangalang, ko me tɛ̀ lwil e ra vwel mō. Me Darwey Dagwi Darwey ma ha ano.

⁹Mê bɔrɔk neyey bemat pyak, jeng de mê kyè na hwo vɔk e sesam e tê yére bemat jey, vɔk e bavwel de hwà tɔk vɛ wɛt.

¹⁰Mê tɛ̀ a yâng bemat pyak yɔɔt na hwo, begwɔ̀m mɛn bê vow yaga hwo. Jeng de ma tē bwerep à wal hom e nuyel mɛn, yɛn ê sǎ e de vow, yaga neken mɛn, kawɛ e ji mɛn, e tûk gaba mo.

¹¹Yaga Darwey Dagwi Darwey a ye: Wal comô gbɔng gwɔ̀m Babilɔn wô hwo e ra hwo.

¹²Mê tɛ̀ regyɛng como mo re wey na bewâl bemat gap, mwa hɛn ba sé pyɛ bengyip sizɔng na yére bemat jey. Yɛn ê wey na dâk kaa Misra, ko mwa bagyɛng como mɛn bê wey.

¹³Mê wey na yas mɛn pyɛt, yi e nekwɔn nshi polos, ko vit à bwol mwasi de gwô to hwosom hɛn, kɛ bekwǒk bol berɔndɔng de bê mwɛrɛk a yɛn nshi.

¹⁴Ano mê tɛ̀ nshi mo gwiiri, ko mê tɛ̀ nerɔt mɛn ne tele sede něy. Me Darwey Dagwi Darwey ma ha ano.

¹⁵Jeng de ma tɛ̀ vwêl Misra gbingiring, na jeng de ba paa pyɛ̂ mwa de ya sila hɛ, jeng de ma wey na mwa bemât hɛ, ano yɛn ê tɔk, me wɛ à Dagwi Darwey.

¹⁶Lwɛlɛ sesin à gwomo, bê ra gwɛ. Behwông yére bemat jey bê ra gwɛ. E ra vwêl Misra na mwa bagyɛng hɛ, yɛn ê ra gwɛ, Me Darwey Dagwi Darwey ma ha ano.”

¹⁷E tuk he kuru na hɛ tungun he pwɛl gwo mɛsɛng gwo shey he kuru na hɛ ba hê sesam mot, Dagwi Darwey a ha na me, a ye,

¹⁸“À mwasi, tosho e ra mwa bagyɛng Misra na hwo gang ɛn, yɛn tanga bwang yére bemat jey vê reto sizɔng vɔk e jey bevuvwel.

¹⁹Yang ɛn ngan: “Yin a dal beva na nerât bayis ɛ? Kyè vɔk e vwel! Wɔ̀ dyɛng na bemandul!

²⁰“Yɛn ê gabsa bavin o e tê vemo de ba mɔbɔs na wal. Ba ga nára wal e ra Misra, ko wô wey na vwel o tanga bagyɛng hɛ.

²¹Besuga de ba ga kana kushu bê ha na yɛn tanga bemât sɛlɛ mɛn, yi e kwɔn bevuvwel, bê yang ɛn, ‘Bemandul de ba mɔbɔs na wal, ba ga gyiris vey na wot, á vane e dyɛngɛ yuu-yuu.’

²²“BeAsirya ba sé e hwomo na bagyɛng mɛn e tê besak mɛn, mwa hɛn ba mɔbɔs na wal.

²³Ba lɛsɛ hɛn e hwomo e yɛnɛ̂ kwɔn bevuvwel o. Bagyɛng bemat mɛn ba gwɔrɔ besak mɛn. Ba mɔbɔs hɛn mwa na wal. E yɛn vɛ de bá tɛ̀sɛ a bwang bemat vwêl vê neken bengyip.

²⁴“BeElam ba sé e hwomo na bagyɛng mɛn e tê besak mɛn, mwa hɛn ba mɔbɔs na wal. Yɛn a gyiris vɔk e kwɔn bevuvwel mwa hɛn bemandul. E yɛn vɛ de bá tɛ̀sɛ a bwang bemat vwêl vê neken bengyip. Ko a remo yɛn a sé sɔ rekyên gaba mɛn.

²⁵BeElam ba tɛ̀ gwat mɛn e hwomo na bagyɛng mɛn e tê besak mɛn, mwa hɛn bemandul, mwa hɛn ba mɔbɔs na wal. Ba tɛ̀sɛ a bwang bemat vwêl vê neken bengyip ko a remo yɛn a sé sɔ rekyên gaba mɛn. Bá wuna hɛn na vemo de ba ga mɔbɔs.

²⁶“Meshek na Tubal ba sé e hwomo, na bagyɛng mɛn, e tê besak mɛn, mwa hɛn bemandul, ko mwa hɛn ba mɔbɔs na wal. Bá tɛ̀sɛ a bwang bemat vwêl vê neken bengyip.

²⁷Bá lɛsɛ hɛn naka wɛt sede besugâ raane de bá lɛsɛ na bewal mɛn e nɛn bato mɛn, ko beruga mɛn e ra bekup mɛn. E yɛn vɛ à besuga de bá tɛ̀sɛ a bwang bemat vwêl vê neken bengyip.

²⁸A sé ano de bê ngwɔgɔt hin, ko bavin min bê dyɛngɛs tanga bemandul de ba mɔbɔs na wal.

²⁹“BeƐdɔm ba sé e hwomo, yɛn na begwɔ̀m mɛn, na bemat nuyel mɛn de ba vɔk reto sedesi. Yɛn a sé e dyɛngɛ bavin o tanga vemo de ba mɔbɔs na wal, tanga bemandul, de ba ga gyirik vɔk e gwovɔng sak.

³⁰“Mwa begwɔ̀m rwa bato ba sé e hwomo, na mwa BeSidɔn. Yɛn a ga kyè wɔ̀ gyirik e hwomo e ji rekyen, yɛn na vemo de ba ga mɔbɔs, mwa ano de yɛn a tɛ̀sɛ a bwang bemat bengyip sizɔng yaga reto de yɛn a vɔk. Yɛn a dyɛng e hwomo, bemandul, na mwa vemo de bá mɔbɔs na wal, ko yɛn a wok rekyen tanga mwa vemo de ba gyirik vɔk e gwovɔng sak.

³¹“Jeng de Farawo, gbɔng gwɔ̀m Misra ê di ɛn, ê wɔrɔk tó mɛ yaga mwa bagyɛng mɛ — yɛ na bemat como mɛ de ba mɔbɔs na wal. Me Darwey Dagwi Darwey ma ha ano.

³²Mwa ano de Farawo a tɛ̀ a mwa bemat jey bengyip, ko mê tɛ̀ be dyɛng tanga mwa bemandul de ba mɔbɔs na wal. Me Darwey Dagwi Darwey ma ha ano.”