Read berom Yɛzɛkyɛl 33 Bible Online

Yɛzɛkyɛl 33 - berom bible

Yɛzɛkyɛl 33

¹Dagwi Darwey a ha na me, a ye,

²“À mwasi, ha na bemat mo na hwo yang ɛn: Ka sede ma hwɔltɔ wal hom e ra vwel hak, ko bemât vwel o ba jut hwak e ji mɛn, ba tɛ̀ ɛ a sè mwât bɛrɛng nekanang,

³ko ka sede mwat bɛrɛng nekanang o a di ba sé kyè vey hwo vwel o na wal como, ko a pɛl durum na a tusa bemat o,

⁴ka sede mwat o hwak a wok durum o ko a tɛ̀ tong na wɛ wɛt, ko wal como mo wa vey wey na yɛ, ko nemi mɛ nê sè e rato mɛ pyɛ mɛ,

⁵yaga a wok durum, ko a tɛ̀ tong na wɛ wɛt, ko nemi mɛ nê sè e rato mɛ pyɛ mɛ. Ko ka sede a yang wok tusâ durum ko a yang sey neken to mɛ.

⁶Ko ka sede mwât bɛrɛng nekanang a di ba sé kyè vey na wâl como, ko a pɛl durum na a tusa bemat o wɛt, ko ba vey na wâl como, ko wà wey na hwak e ji mɛn, ko mwat o ê ku yaga buru mɛ, ko mê jama nemi mwat o e vwɔ̂ mwât bɛrɛng nekanang o.

⁷“Ko di, à hwo mwasi, ma sé tɛ̀ hwo sè mwât bɛrɛng nekanang wo BeIsrayɛl. Kayɛ jeng de hwà wok há yi e nu hom, ko a sé gbing-gbing hwo nɔng ɛn tusa yi na me.

⁸Ka sede ma yang mwat vwes, ‘Óoo à hwo mwat vwes, hwô ku mwin!’ Ko hwà ha na hwo tusa mwat o na a doyo yi e gwong vwes mɛ wɛt, yɛ mwat o ê ku yaga banɛn mɛ, ko mê jama nemi mɛ e vwɔ mo.

⁹Ko ka sede hwà tusa mwat vwes o mo na a doyo, ko a hala gwong vwes o mo wɛt, ko ê ku yaga banɛn mɛ, ko hwô dal na neken mo.”

¹⁰Dagwi Darwey a yang me, “À mwasi, yang BeIsrayɛl: Yin á tē, ‘Pyɛ́ vyes de wot á ra tanga banɛn mot ba sé a wot dirik, wot a sé gwɛ̌ lashe hot yaga yɛ. Yi e rɛ̌ de wot ê dal ɛ?’

¹¹Yang ɛn: Mwin, me Darwey Dagwi Darwey, me vɔk yey pyɛng na rekû mwat banɛn wɛt. Me dal na simo a tik râ banɛn na a sangal tyang. À BeIsrayɛl, doyo hin, doyo hin yi e begwong beves min. Yaga sɛ́ de yin ê kushu ɛ?

¹²“À hwo mwasi, yang yere mo mó ngan: Necik wò cik nê tɔk sey ɛ wɛt sede a ra pyɛ vyes, ko nevês mwat vwes nê tɛ̀ ɛ a wey wɛt ka sede a tik neves o. Necik wò cik nê sey ɛ wɛt sede a yel e de ragas banɛn.

¹³Ka sede ma yang wò cik, ê dal mwin, ko sede a tɛ̀ gap mɛ e ra necik mɛ, ko a yel e de ragas banɛn, bê bare na tomông necik mɛ ve raane wɛt, ko ê ku yaga banɛn de a ra.

¹⁴Ano arɔng, ka ma yang mwat ragas pyɛ́ vyes ê ku mwin, ko ka sede a doyo yi e banɛn mɛ, na a gas badu e tē na necik —

¹⁵sede a tala pyɛ de a ga kana hwɔp e lek, ko a toyo na pyɛ́ de a ga kana shigi, ko a hwo gyeng Badu de be nɔng neken, a to ragas pyɛ́ vyes wɛt, mwin, ê dal, ê ku wɛt.

¹⁶Bê to bare na banɛn de a kana ra raane wɛt, yaga a ga gas badu e tē na necik, na tsak o, ko mwin, ê dal.

¹⁷“Ko bemat mo bé tē: ‘Gwông Dagwi gwa sé tyɛng wɛt’, ko e mwɛn de gwa sé tyɛng wɛt e negya.

¹⁸Jeng de wo cik a doyo yi e necik mɛ, ko a yel e de ragas neves, ê ku yaga neves mɛ.

¹⁹Jeng de mwat vwes a doyo yi e neves mɛ, a hwo gas badu e tē na necik, ko ê dal.

²⁰Ko mwa ano yin e tē, ‘Gwông Dagwi gwa sé tyɛng wɛt.’ À yin BeIsrayɛl, mê ra a kawɛ e ji min shɔt tyɛng na tomong mɛ.”

²¹E tuk he tungun he pwɛl gwo kuru gwo shey he kuru na hɛ ba he sesam mot, mwat hwak de a hywit ɛ yi e Yɛrusalɛm a vey na me, ko a ye, “Gbɔng repomo ra ga gaba!”

²²Nawiri nayos gyam na mwât tele yi e vwel mɛ mo a vey, Dagwi Darwey a ga kana sɛ̀ reto e ra me, ko ma tɛ́ me kpey. Ko jeng de mwat o a pom nagasi, nu hom ha ga kana wunta hɛ.

²³Dagwi Darwey a ha na me, a ye,

²⁴“À mwasi, bemat de ba sé sangal e barîn bapomo Israyɛl be sǎ e de té, ‘Abraham á sè mwat gwining zɔng nju mɛ, ko bá nɔng ɛ vwel o mwa, tàga wot de wot a sé pyak à, mwin vwel o ha sé mot mwa.’

²⁵“Yaga ano há a yɛn, ‘Darwey Dagwi Darwey a ye, Yin e re banama na nemi e ji vɛ, yin e ré a cī fongol, yin e lusha nemi, ko yin e bare mê nɔng in nedanelɔ vwel o a?

²⁶Yin e tɛ̀ gap min e ra wal como, yin e rá pyɛ́ de ya sé byɛm-byɛm, kawɛ e ji min e ra nejwang na hwâ mwat vwara mɛ, ko yin e bare yi na ra ano yin ê tɔk re nedanelɔ vwel o a?’

²⁷“Yang ɛn, ‘Darwey Dagwi Darwey a ye: Mwin, mwa vemo de be sangal e barin bê gaba na wal como, ko vemo de bé sangal e hey, mê tɛ̀ ngyāma ye re ɛn, ko vemo de bé sangal e nekwɔn dal na e tara e beraku, tumbang wô mɔbɔs hɛn.

²⁸Mê tɛ̀ vwel o he sè gbingiring, ko dak kaà nerey hɛ̄ nê tala hɛn. Berakû Israyɛl bê tɛ́ ɛn gbingiring ko vit a mwat de ê kwey e ji vɛ.

²⁹Ano, yɛn ê tɔk, me wɛ à Dagwi Darwey, jeng de ma tɛ̀ vwel o he tɛ́ ɛ gbingiring, yaga mwa pyɛ̂ byɛm-byɛm de yɛn a ga ra.’ ”

³⁰Dagwi Darwey a ye, “À mwasi, bemat mo be ha há mo jeng de yɛn e man e jwa-pomo, kɛ e ri nelɔ mɛn. Yɛn e tâng bemɛn, ‘Vey in na wot wɔ̀ wok ha de ha yi na Dagwi Darwey.’

³¹Yɛn e gushung hɛn vey na hwo, ko yɛn e sangal e nuyel mo sede bemat hom, yɛn e wok neha mo, ko yɛn e gyeng nɛ wɛt, yaga yɛn e dura tɛ̂ yey mɛn na nu zɔng, ko yɛn e tɛ̀ neyey mɛn gbarak e ra mɔ̂t bemat e ra pyɛ́ mɛn.

³²Yɛn e jut o sede hwà sé mwât râ lɛlɛ̂ tɛ̂ yey de bà tá, de be ra vɛ̀ na pyɛ̂ lwɛlɛ de ya sé ryat. Yɛn e wet betong na mwa neha de hwó ha, ko yɛn e gyeng hining e ji mo wɛt.

³³Ko mwa ano, jeng de pyɛ́ de hwó ha yê sila — vit à tô yey yê sila mwin — ko yɛn ê de tɔk zarap Dagwi à kana sè e tē mɛn.”