Read berom Yɛzɛkyɛl 34 Bible Online

Yɛzɛkyɛl 34 - berom bible

Yɛzɛkyɛl 34

¹Dagwi Darwey a ha na me, a ye,

²“À mwasi, zarap e ra begwɔ̀m Israyɛl de ba sé sede belêk vyel hom BeIsrayɛl. Zarap na hwo yang ɛn: ‘Darwey Dagwi Darwey a ye: Gawey e ra yin, yin belek Israyɛl de yin e nɔngɔ̂s bato min pyɛ̂ re. A sé fwôm belek na be nɔ̂ng vyēl mɛn pyɛ̂ re wɛt a?

³Mwa ano, yin e sɔ nevasâl yɛ, ko yin e lɔk berugu min na wuulu mo. Yin e yɛt yemo de ya dal na nerat yaga pyɛ̂ re min, ko yin e nɔngɔs yɛ pyɛ̂ re wɛt.

⁴Yin e gyep yemo de vit à yɛ na gap, kɛ yin pege yemo de ye ro yɛ, kɛ yin rɔgɔs nedem yemo de ya mǎ hɛ wɛt. Yin e hala yɛ ye kyě kyè kpɛɛ, ko yin e jama yemo de ya vusa hɛ wɛt. Yin e teshe na yɛ na gap tanga neves.

⁵A remo de vyēl o ya vɔk lwek wɛt, ye kyě shara hɛ kpɛɛ, ye tɛ́ ɛ pyɛ̂ rê mwa ngyāma.

⁶Yi ano, vyēl hom ya ga kyě shara hɛ kpɛɛ, ye kyě gǎ e mwa beraku tanga berahwol de ba sé belis. Vyēl o ya ga shara hɛ e kahɛ kwɔn e jey, vit à mwat de a tɛ̀ nehywɛ mɛ e ra yɛ, ko vit à mwat de a kyě jama yɛ.’

⁷“Yaga ano, à yin belek, wok in hâ Dagwi Darwey.

⁸Me Darwey Dagwi Darwey ma ye, sede remo de vyēl hom ya ga tɛ́ ɛ pyɛ̂ jàma, ko ya ga tɛ́ ɛ pyɛ̂ rê mwa ngyāma a remo de vit à yɛ na lwek, ko yaga belek hom o ba ga wɔ̀ jama yɛ wɛt, ko belek o be jama a bato mɛn pyɛ̂ re, ko ba nɔng vyēl o pyɛ́ wɛt,

⁹yaga ano, à yin belek, wok in hâ Dagwi Darwey.

¹⁰Darwey Dagwi Darwey a ye, ‘Me ra repugu na belek o, ko mê jama vyēl hom e vɔ mɛn, ko mê ro ɛn nà gyeng vyēl o, ano, yɛn ê sɛ̀ pyɛ̂ re yi na yɛ wɛt, yaga mê sey ɛ vyēl hom o yi e nenu mɛn, ano yê to sè á yɛn pyɛ̂ re wɛt.’ ”

¹¹Darwey Dagwi Darwey a ye, “Me pyɛ hom mê jama vyēl hom, na me gyeng yɛ.

¹²Sede remo de lwek e jama vyēl de ya shara hɛ yi e kwara mo, ano de mê jama vyēl hom. Mê sey yɛ yi e kahɛ kwɔn de ba shara ɛ yɛ e tûk bale na hê mwangalang tíbit.

¹³Mê paa yɛ yi e yére bemat, ko mê tula yɛ yi e bavwel detidetu na me toyo na yɛ e vwêl yɛ, ko mê gyeng yɛ e ra berakû Israyɛl, na e benɛk nshi tanga e mwa bebak vwel o de bemat ba sé ɛ.

¹⁴Mê gyeng yɛ e nedem de na vɔk hwéy rat, ko e ra rak berakû Israyɛl de mê gyenges ɛ yɛ. E hwomo yê dyɛngɛs e nekwɔn hwêy gwim-gwim, ko yê re hwéy e beraku de ba vɔk hwéy polos.

¹⁵Me pyɛ hom mê sè lwek vyēl hom, ko mê tɛ̀ yɛ ye dyɛngɛs tyang. Me Darwey Dagwi Darwey ma ha ano.

¹⁶“Mê jama yēmo de ya vuru hɛ, mê toyo na yê kyé kpɛɛ, ko me rɔgɔs barâm yê má hɛ, me gwɛ̌ a yê mɛrɛk gap, ko mê wey na yê mɔsɔ ding-ding, ko ya vɔk gap sizɔng. Mê gas a yɛ shɔt e tē.

¹⁷“Ko di, à yin kwara hom, me Darwey Dagwi Darwey ma ye: Mê ra a yin shɔt e tê vyel na vyel tanga e tê turuk na gam.

¹⁸E di min a sé pyɛ ryat na e bama de yin a ga re hwéy rat, ko yin pigis bwang o na bol a? E bama de yin a ga sɔ nshi de na sé gwiiri, ko yin mwɛrɛk bwang o na bol a?

¹⁹A sé gbing-gbing na vyēl hom ye re hwéy de yin a ga pigis, na ye sɔ nshi de yin a ga mwɛrɛk a?

²⁰Yaga ano, me Darwey Dagwi Darwey ma ye: Me pyɛ hom mê ra shɔt e tê vyēl de ya mɔsɔ na yemo de ya sé gyɔ́njɔng.

²¹Yaga yin e kyě gangas yemo de ya sé mɛrɛk e jey na batô vɔ min ko yin e tɛs cak vɔk e jey na ngɛngɛ min, sɛ̌ yin a shara yɛ e jey yikyik.

²²Ko mê sey ɛ̀ kwarâ vyel hom, yê to sè pyɛ de bê tak a yɛ wɛt. Ano mê ra shɔt e tê vyel na vyel.

²³“E bama mo mê nɔng in lwek gwining, yɛ̀ à mwat fwom hom Davit. Yɛ̀ ê gyeng ɛn, na a kyese na yɛn e kwɔn hwéy.

²⁴Ko me Dagwi Darwey, mê sɛ̀ Dagwi mɛn, ko mwat fwom hom Davit ê sè gwɔ̀m e tē mɛn. Me Dagwi Darwey ma ha ano.”

²⁵“Mê wuna me na sira na BeIsrayɛl, vyēl hom na yɛn a sangal tyang, ko mê ro ngyāma e vwel o, yaga na vyēl hom ye tɔk sangal tyang e hey, ko ye pɔlɔs e bahwot.

²⁶Mê tɛ̀ yɛ, na nekwɔn de na gwɔrɔ rahwol hom, ye sangal e ji nerat. Ko mê tomo na rwak e jeng wɛ, ko wô sè rwak wo nerat e ra yɛn.

²⁷Batin cɔ́gɔt hey bê tɔs nèy naka, ko vwel hê nɔng nerât hɛ arɔng. Yɛn ê sangal tyang e vwel mɛn, ko yɛn ê tɔk, me wɛ à Dagwi Darwey, jeng de ma kwɔrɔ swesêk vɔk berɔndɔng e rafwɔ mɛn, na me séy ɛn yi e vɔ vemo de ba tɛ̀ ɛn e sesam.

²⁸Yɛn ê to sè pyɛ̂ jugû yére bemat jey wɛt, ko ngyāma vwel o yê to re ɛn wɛt. Yɛn ê sangal tyang, ko vit à mwat de ê to tɛ̀sɛ a yɛn bengyip.

²⁹Mê nɔng ɛn hiri de ba siri naka, ko vyong yê to hwo e ra yɛn e vwel o wɛt. Bwang yére bemat jey bê to dùsa hɛn wɛt.

³⁰Yi ano, kawɛ mwat ê tɔk, me Dagwi Darwey, Dagwi mɛn ma sé tanga yɛn, ko yɛn BeIsrayɛl ba sé bemat hom. Me Darwey Dagwi Darwey ma ha ano.

³¹“Yin BeIsrayɛl yin a sé vyēl hom, kwara e kwɔn sehwey hom, ko me wɛ à Dagwi min. Me Darwey Dagwi Darwey ma ha ano.”