Read berom Yɛzɛkyɛl 35 Bible Online

Yɛzɛkyɛl 35 - berom bible

Yɛzɛkyɛl 35

¹Dagwi Darwey a ha na me, a ye,

²“À mwasi, sɛt bayis mo e ra Raku Seyir e vwêl Ɛdɔm, na hwo zarap e ra bemat wɛ,

³hwo yang ɛn: Darwey Dagwi Darwey a ye: “À yin bemat Raku Seyir, me ra repugu na yin, mê nára vwɔ hom tabat e ra yin, na me tɛ̀ vwel o he sè gbingiring,

⁴Mê hala bapomo min e barin, bê tɛ́ ɛn gbingiring, ko yin ê tɔk, me wɛ à Dagwi Darwey.

⁵“Yin a kaba gak repugu hê raane e neyey, yi na nára BeIsrayɛl na be mɔbɔs hɛn na wal como e jeng negbang mɛn, e jeng de yá sila na be tabak hɛn yaga banɛn mɛn.

⁶Yaga ano, me Darwey Dagwi Darwey ma sé ha siitit, ma ga yong ɛ̀ na be shushu nemi min, ko mwât shushu nemi min ê ro in, a remo de yin á kana kyɛ́ in shushu nemi wɛt, bê ro in na be shushu nemi min arɔng.

⁷Mê tɛ̀ beraku min be tɛ́ ɛn gbingiring, vit à pyɛ e vɛ. Mê mɔrɔ kawɛ mwat de a yel kɛ a nusu yi e vwel o.

⁸Mê sila beraku mó na bavin bemat, ko vemo de bê mɔbɔs na wal o bê gabsa e ra berahwol, na benɛk tanga e begwong nshi min.

⁹Mê tɛ̀ vwel o he nàra gbingiring nesheneshey, ko bê to sangal e bapomo min wɛt. Ano de yin ê tɔk, me wɛ à Dagwi Darwey.

¹⁰“Yin a ye, ‘Yére bemat yemo bya, na bavwel baba vemo bê sè benang, ko wot ê sey ɛ̀ vɛ wot vɔk’, mwa ano de Dagwi Darwey á sè e ji vɛ.

¹¹Yaga ano, me Darwey Dagwi Darwey ma ye siitit, mê teshe na yin tyɛng na shom tanga repugu de yin a dura, yaga repugu de yin a vɔk e ra yɛn. Mê dura tó hom na yin jeng de ma hwo ra a yin shɔt.

¹²Yin ê tɔk, me Dagwi Darwey, ma ga wok mwa neha dúsa de yin á ha e ra beraku Israyɛl, yin á tē: ‘Ba ga hala vɛ barin, ba ga hala a wot vɛ na wot a re vɛ.’

¹³Ma ga wok rèves de yin a tabas a me na nenu min, ko yin a gwɛ̌ haras a me.

¹⁴“Me Darwey Dagwi Darwey ma ye: Mê tɛ̀ vwel min he sè gbingiring e gwong de gwô tɛ̀ bemat jey mwa be tē ngyâ-ngya e ra gaba min.

¹⁵Sede remo de yin á vɔk yey pyɛng e ra wêy benap BeIsrayɛl yaga ba ga tɛ́ ɛn gbingiring, ano de mê ra a yin, yin ê sè gbingiring arɔng, yin Raku Seyir, na mwa vwêl Ɛdɔm mwa kyuruk. Yi ano, kawɛ mwat ê tɔk, me wɛ a Dagwi Darwey.”