Read berom Yɛzɛkyɛl 36 Bible Online

Yɛzɛkyɛl 36 - berom bible

Yɛzɛkyɛl 36

¹Dagwi Darwey a ye, “À hwo mwasi, zarap e ra berakû Israyɛl na hwo ye: ‘Óoo, à berakû Israyɛl, wok in hâ Dagwi Darwey.’

²Darwey Dagwi Darwey a ye, ‘Yaga bemât repugu ba ye, “Ey-yàa, beraku beroso vere ba ga tɛ́ ɛn bemot.”

³Yaga ano, zarap na hwo ye: Darwey Dagwi Darwey a ye: “A remo de yɛn a ga tɛ̀ yin a tɛ́ in barin — mwin, ko ba ga sey ɛ hin e kahɛ hagat, yaga na yin a tɛ́ in pyɛ̂ bwang yére bemat jey, ko yin a tɛ́ in pyɛ ryɔgɔt, na dúsa e tê bemat.

⁴Yaga ano, à yin berakû Israyɛl, wok in hâ Darwey Dagwi Darwey de a yâng beraku na berahwol, na nerɔt, na benɛk, na barin tanga bapomo de ba hala vɛ hal, vemo de ba ga tɛ́ ɛn pyɛ jugu na pyɛ byɛs na bwang yére bemat jey de ya gwɔrɔ hin,

⁵Darwey Dagwi Darwey a yang in: Ma sé ha e ji nepêp repugu hom e ra bwang yére bemat jey, na mwa BeƐdɔm de bá jut vwel hom be tɛ́ mɛ mɛ́n na yey pyɛng sizɔng tanga byɛs ding-ding, na yɛn a jugu hɛ, yaga nekwɔn gyeng yas nerat de ha vɔk.” ’

⁶“Ano, zarap e ra vwêl Israyɛl na hwo yang beraku, na berahwol, na nerɔt tanga benɛk: ‘Darwey Dagwi Darwey a ye: Ma sé ha e ji nepêp repugu hom, yaga yin a ga di reyɔm na dúsa yére bemat jey.

⁷Me Darwey Dagwi Darwey ma sira, mê tɛ̀ yére bemat jey de ya gwɔrɔ hin o ye sè pyɛ dúsa.’

⁸“Ko di yin, à berakû Israyɛl, cɔ́gɔt min yê nára nelang, ko yê mara a yin bemat hom BeIsrayɛl nèy, yaga yɛn a vey bagat toyo vɛ hɛn.

⁹Di in a remo, ma sé mwin, mê doyo vey na yin, ko mê tɛ̀ be to how cāp min, be tus ɛ pyɛ́.

¹⁰Mê gwɛ̌ nepyak min, mwa yin BeIsrayɛl, yin ê to sangal e bapomo min, ko yin to lɔk barin min

¹¹Mê gwɛ̌ nepyak bemat min mwa na yas min. Yin ê gwɛ̌ hin ko yin ê tɔs nèy pyak arɔng, ko mê tɛ̀ yin sangal sede raane, na me ra a yin pyɛ́ ryat de ya dal yê raane. Ano yin ê tɔk, me wɛ a Dagwi Darwey.

¹²Mê to tɛ̀ bemat hom, BeIsrayɛl, be kyě kyè e ji min, bê sey in sede benap mɛn, ko yin ê sang to mɔbɔs nèy mɛn wɛt.

¹³“Me Darwey Dagwi Darwey ma ye: A remo de bemat o bá tang in, ‘Yin a ga re bemat, ko yin a ga mɔbɔs nèy bemat min’,

¹⁴ano, yin ê to re bemat, kɛ yin to mɔbɔs nèy bemat min wɛt. Me Darwey Dagwi Darwey ma ye ano,

¹⁵ko mê to tîk na yin a wokos dusâ bemat wɛt, yin ê to niri na byɛ̂s bemat wɛt, ko yin ê to tɛ̀ bemat min be ye bugurɛk wɛt. Me Darwey Dagwi Darwey ma ye ano.”

¹⁶Dagwi Darwey a ha na me, a ye,

¹⁷“À mwasi, jeng de BeIsrayɛl bá sangal e vwel mɛn, bá tɛ̀ hɛ ligis na begwong mɛn tanga tomong mɛn. Negwɔn mɛn e bayis hom ná sè sede nevês hwā e jeng berang mɛ.

¹⁸Yaga ano, ma shusha shom hom e ra yɛn yaga nemi de yɛn a ga lusha e ra vwel o, na yaga cī de yɛn a ga tɛ̀ mɛ hɛ ligis.

¹⁹Ma shara hɛn e ji yére bemat, ko yɛn a kyě bere hɛn e bavwel detidetu, tyɛng na negwɔn mɛn na tomong mɛn de ma ra a yɛn shɔt e ra nɛ.

²⁰Ko jeng de yɛn a vey e ji yére bemat o, kahɛ kwɔn de yɛn a wɔ́ ɛ, ko yɛn a tɛ̀ reza hom rê jɛrɛ ligis. Yaga ano, bá tang ɛn, ‘Bemat Dagwi Darwey à vemo, ko mwa ano, á sè gbing-gbing na yɛn a nusu hɛn yi e vwel mɛ.’

²¹Ko pyɛ mo yá bɔrɔk me, yɛ à, reza hom rê jɛrɛ de BeIsrayɛl ba ra jɔgɔ na rɛ e tê yére bemat jey de yɛn á wɔ̀ sangal ɛ.

²²“Yang BeIsrayɛl, Darwey Dagwi Darwey a ye, ‘A sé yaga yin wɛt, à BeIsrayɛl de ma sé kyè wɔ̀ ra pyɛ cak, ko yaga reza hom rê jɛrɛ de yin a ra jɔgɔ na rɛ e tê yére bemat jey de yin a wɔ̀ sangal na yɛn.

²³Mê tɛ̀ gbɔng reza hom jɛrɛ, de ha ga kana tɛ́ ɛ ligis e tê yére bemat jey, reza de yin a ra jɔgɔ na rɛ e tē mɛn, ano de yê tɔk, me wɛ a Dagwi Darwey. Me Darwey Dagwi Darwey ma ha ano, jeng de ma dura nejɛrɛ hom e bayis mɛn yi na yin.

²⁴Mê paa in yi e yére bemat jey o, na me tula hin yi e bavwel mwa, na me vey na yin e vwel min.

²⁵Mê zagat nshi nerat e ra yin, ko yin ê sè haalal yi e mwa negbiridik min, na me kus in haalal yi e mwa pyɛ̂ sekwit min.

²⁶Mê nɔng in yey pyas, ko mê tɛ̀ gabik pas e ji min, mê pat yi e rebek min yey de ya sé kashalang sede gwofwa, ko me nɔng in yê norok sede nama.

²⁷Mê tɛ̀ gabik hom e ji min, na me tɛ̀ yin raa Badu hom, na yin tē naka e de gyêng mwa nu hom.

²⁸Ano, yin ê sangal e vwel de mà nɔng bedabeda min, yin ê sè bemat hom ko mê sè Dagwi min.

²⁹Mê sey in yi e mwa negbiridik, ko mê nɔng in pyɛ̂ yéneng na ye sè á yin polos, mê to tɛ̀ vyong ye hwo e ra yin wɛt.

³⁰Mê tɛ̀ nèy cɔ́gɔt na pyɛ̂ hiri min ye sè shɛrɛk, yaga na yin sang to sɔ rekyên vyong e tê yére bemat jey wɛt.

³¹Ano yin ê bare na begwong beves na negwɔn min de ná sè kís. Ano arɔng yin ê di neves banɛn min na tomong min de ba sé byɛm-byɛm.

³²Darwey Dagwi Darwey a ye, tik na yin a tɔk, a sé yaga yin de mê ra pyɛ́ yemo wɛt. Me simo yin vo rekyen na a yang in yɔɔt na begwong min, à yin BeIsrayɛl!’ ”

³³Darwey Dagwi Darwey a ye, “Jeng de mê tɛ̀ o haalal yi e mwa banɛn mo, mê tik o hwo to sangal e bapomo mo, ko me tɛ̀ be to lɔk barin mo.

³⁴Vwel de há sè gbingiring bê to how hɛ e tô hemo de ha sé hal de bemât kweres e gwong bá bɛrɛng hɛ.

³⁵Bemat o bê ye, ‘Vwel hemo de há sè gbingiring ha ga tɛ́ ɛ sede bwî Ɛdɛn, ko bapomo de ba ga kana tɛ́ ɛn barin, ba ga gabsa, ba ga to lɔk vɛ, bemat ba to sé sangal e ji vɛ, ko ba ga gwɔrɔ vɛ na jwa arɔng.’

³⁶Ano, yére bemat jey de ba tɛt ɛ̀ e bapomo de ba gwɔrɔ hin bê tɔk, e me Dagwi Darwey de ma ga to lɔk nekwɔn de na ga kana gabsa, ko ma to tus pyɛ́ e nekwɔn de ná kana sè hal. Me Dagwi Darwey ma ha ano, ko mê ra ano.”

³⁷Darwey Dagwi Darwey a ye, “Mê tik BeIsrayɛl be rangal me na me ra a yɛn pyɛ yemo: Mê tɛ̀ nepyak mɛn ne gwɛ̌ hɛn sede kwarâ vyēl.

³⁸Sede kwarâ vyēl de be nása nɔrɔ̂ yɛ̄ vɔk na Dagwi, bê to sè sede kwarâ vyēl e Yɛrusalɛm e jeng yére nzem de yɛn a vɔk, ano de bapomo de bá kana sè barin bê sila na bemat. Ano, yɛn ê tɔk, me wɛ à Dagwi Darwey.”