Read berom Yɛzɛkyɛl 37 Bible Online

Yɛzɛkyɛl 37 - berom bible

Yɛzɛkyɛl 37

¹Retô Dagwi Darwey ra hwo e ra me, ko Gabik mɛ ha jut me, ha wɔ̀ tik me e tê nɛk de wa sila na bekup.

²A kyě gwɔsɔ na me e ji vɛ, bá sè pyak vit à yere mo e nɛk o, ko bà ga hworok hwɔ́k-hwɔk.

³A yang me, “À mwasi, bekup vemo bê kyɛm be to vɔk neken bɛ?” Ma toyo a yɛ, “À Darwey Dagwi Darwey, e hwo zɔng de hwà tɔk.”

⁴A yang me, “Zarap á bekup vemo mo, na hwo yâng vɛ: ‘Óoo à bekup behwogot, wok in hâ Dagwi Darwey.

⁵Darwey Dagwi Darwey a yâng bekup vemo: Mê tɛ̀ nesong ne yel e ji min, ko yin ê to vɔk neken.

⁶Mê tɛ̀ berinis e ra yin, na mê tɛ̀ banama be ras e ra yin, ko mê bang in na rehwo. Mê tɛ̀ nesong e ji min na yin to vɔk neken. Ano, yin ê tɔk, me wɛ à Dagwi Darwey.’ ”

⁷Ano kwong, ma hwo zarap tyɛng na nu de a nɔng me. Jeng de ma sé zarap, ko gobok ba hwo wok rewɔng, na digis, ko bekup o ba hwo manas, kup na gwà mɛ kup.

⁸Má sè bɛrɛng, ko ba hwo manas bekup o na berinis, ko banama ba hwo e ra vɛ, ko rehwo ra bang vɛ, ko vit a nesong e ji mɛn.

⁹Ko Dagwi Darwey a yang me, “À mwasi, zarap e ra nesong, na hwo yang nɛ, ‘Darwey Dagwi Darwey a ye: Vey yi e rǎ gul naas, à nesong, na hwo hwo e ra bavin vemo, na be bin vɔk neken.’ ”

¹⁰Ano ma zarap tyɛng na nu de a nɔng me, ko nesong o na vey yel e ji mɛn, ko yɛn a tɛ́ ɛn beken, yɛn a tumal e ra bol mɛn. Yɛn a tɛ́ ɛn gbɔng regyɛng sizɔng.

¹¹Dagwi Darwey a yang me, “À mwasi, bekup vemo ba sé mwa BeIsrayɛl. Di, yɛn a sé tē: Bekup mot ba ga hworok, ko sɛ̂t yey mot ha ga vuru hɛ, ba ga wey na hɛ hywiri.

¹²“Zarap, na hwo yang ɛn, ‘Darwey Dagwi Darwey a ye: Mê wuma besak min, na me paa in e jey yi e besak o, à yin bemat hom, ko mê toyo na yin vey e sevwel Israyɛl.

¹³Ano, yin ê tɔk, me wɛ à Dagwi Darwey, jeng de ma wuma besak min, na me nusu na yin e jey yi e besak o, à yin bemat hom.

¹⁴Mê tɛ̀ gabik hom e ji min, yin ê sè beken, ko mê wɔ tik in e vwel min. Ano de yin ê tɔk, me wɛ̀ à Dagwi Darwey. Ma ga ha ano, ko mê ra tyɛng ano. Me Dagwi Darwey ma ha ano.’ ”

¹⁵Dagwi Darwey a to ha na me, a ye,

¹⁶“À mwasi, jut gwele ko hwo jɛk e ra gwɛ neha nemo. ‘Yerê Yuda na BeIsrayɛl de ba wuna hɛn na yɛ́.’ Ko hwo jut hwak, hwo jɛk ɛ, ‘Yerê Yɔsɛf, gwelê Ɛfrayim, na mwa BeIsrayɛl de ba wuna hɛn na yɛ́.’

¹⁷Hwo wuna begele mo na be sè gwele gwining e vwɔ mo.

¹⁸Sede bemat mo ba rangal hwo ba ye, ‘Hwô ha a wot cap-hâ pyɛ de hwà ra wɛt a?’

¹⁹Ko hwo yang ɛn, ‘Darwey Dagwi Darwey a ye: Mê jut gwelê Yɔsɛf de gwà sé e vwɔ̂ Ɛfrayim na mwa BeIsrayɛl de ba wuna hɛn na yɛ, na me wuna yɛ na gwelê Yuda, na me tɛ̀ ɛn be sè gwele gwining, yaga na yɛn a sè pyɛ jining e vwɔ hom.’

²⁰“Jeng de begele de hwà jɛk e ra vɛ mo ba sé e vwɔ mo, e bayis mɛn,

²¹ko hwo yang ɛn, ‘Darwey Dagwi Darwey a ye: Mê paa BeIsrayɛl yi e yére bemat jey de yɛn a wɔ sangal e ji mɛn, ko mê tula hɛn yi e kawɛ bak, na me vey na yɛn e vwel mɛn.

²²Mê tɛ̀ yɛn a sè yere jining e vwel o, e ra berakû Israyɛl, ko gwɔ̀m gwining ê sè gbɔng gwɔ̀m e ra yɛn mwa. Yɛn ê sang to sè yére bemat jey bya wɛt, ko bê sang to gas ɛn e segwɔm ba wɛt.

²³Yɛn ê sang to tɛ̀ bato mɛn ligis na cī mɛn vyes o, kɛ pyɛ̂ byɛm-byɛm mɛn, kɛ na neburu mɛn wɛt. Mê séy ɛn yi e mwa begwong beves de ba ragas na be row me mɛ. Mê fung ɛn haalal. Ano yɛn ê tɛ́ ɛn bemat hom, ko mê tɛ́ mɛ Dagwi Darwey mɛn.’

²⁴“Mwat fwom hom Davit ê se gbɔng gwɔ̀m mɛn, ko mwa hɛn bê vɔk lwek gwining. Yɛn ê raa nu hom, ko yɛn ê tē naka na be gyeng Badu hom.

²⁵Yɛn ê sangal e vwel de mà nɔ̂ng mwat fwom hom Yakɔp de bedabeda min bá sangal ɛ, yɛn na nèy mɛn, tanga nèy nèy mɛn, yɛn ê sangal e hɛ nesheneshey, ko mwat fwom hom Davit ê re negwɔm e ra yɛn neshey gbak-gbak.

²⁶Mê wuna me na sirâ sangal tyang tanga yɛn, hê sè wuna-na-sira hê nesheneshey. Mê tɛ̀ nerat e ra yɛn, ko me gwɛ̌ nepyak mɛn, ko mê tɛ̀ Gbɔng Duk Re Fongol hom e ji mɛn neshey gbak-gbak.

²⁷Kwɔ̂n sangal hom hê sè na yɛn. Mê sè Dagwi mɛn, ko yɛn ê sè bemat hom.

²⁸Ano yére bemat jey yê tɔk, e me Dagwi Darwey de mê tɛ̀ BeIsrayɛl jɛrɛ, e jeng yemo de Gbɔng Duk Re Fongol hom wô sè na yɛn nesheneshey.”