Read berom Yɛzɛkyɛl 38 Bible Online

Yɛzɛkyɛl 38 - berom bible

Yɛzɛkyɛl 38

¹Dagwi Darwey a ha na me, a ye,

²“À mwasi, sɛt bayis mo vɔk e Gɔk, wo vwêl Magɔk, gbɔng gwɔ̀m Meshek na Tubal. Zarap e ra yɛ,

³na hwo ye: ‘Darwey Dagwi Darwey a ye: Me ra repugu na hwo, à hwo Gɔk, gbɔng gwɔ̀m Meshek na Tubal.

⁴Mê doyo hwo, ko me tɛ̀ begúk e bèkarin mo, na me hwɔlɔ hwo mɛ, na mwa bemât como mo — bedwa, na bemat bedwa mo, mwa hɛn de ba tɔrɔ hɛn na yɔ̀m como, yɛn a sé gbɔng regyɛng, mwa hɛn na beruga berey na besɛl o, ko mwa hɛn na bewal como mɛn e vɔ.

⁵Bemat comô Pɛrsya, na Etiyopya tanga Put ba sé tanga yɛn, mwa hɛn ba vɔkɔs beruga tanga bebong dyam.

⁶Gɔmɛr arɔng na mwa bemat como mɛ, tanga Bet-Togarma yi e rwa bato yikyik na bemat como mɛn, mwâ hɛn vê yére bemat pyak ba rɔda sè na hwo.

⁷Yong o, yong o naka, hwo na mwa bemat como mo, na mwa vemo de ba dyɛng-ɛ̀-ma e hwo, ko hwo tumal ting hwo gyeng ɛn.

⁸E bamâ nepɔlɔ pyak, mê tula hin na me vey na yin e jeng de neshey o na sila, hwô kyè wɔ̀ hwo e ra vwel bemat de ba ga toyo yi e yére bemat jey pyak, ko yɛn a sé sangal tyang e berakû Israyɛl de bá kana sè barin raane.

⁹Hwô re nuyel, hwô kyè vey sede gwogul rwak, hwô bang vwel o sede bale, hwo na bemat como mo, na regyɛng yére bemat pyak tanga hwo.’ ”

¹⁰Darwey Dagwi Darwey a to yang me, “E jeng o, báre hak hê sè e yey mo, ko hwô yong gwong vwes hwak.

¹¹Hwô ye, ‘Mê tut, na me kyè vɔk e vwel de ba gwɔrɔ bapomo mo na jwa wɛt, na me hwo bemat o de ba sé sangal na yêy dyɛngɛ, mwâ hɛn ba sé sangal tyang, bapomo mo ba gwɔrɔ vɛ na jwa wɛt, ko ba vɔk ri ruhup de ba manas vɛ̀ na bewɔ́rɔ dyam wɛt.’

¹²Hwo wɔ hwo e ra yɛn, hwo bugut hɛn, hwo hashe pyɛ̂ jugu, na hwo hwo e ra barin de ba to lɔk, ko ba sé sangal e ji mo a remo. Ano arɔng, hwô hwo e ra bemat de bá kana tula hɛn yi e yére bemat jey pyak, ko a remo yɛn a vɔk berɔndɔng tanga yas pyak na nedok nekyɔrɔk pyak, ko yɛn a sé sangal mɛ e cǒp jey.

¹³Bemât Sheba, na Dedan tanga bejik Tarshish na mwa bewên como mɛn bê rangal hin be ye, ‘Hwà ga vey na hwo jugu bemat o a? Hwà ga tula mwa bagyɛng bemat como mo na hwo vey hashe mɛ pyɛ̂ jugu, na hwo hashe dyam pyɛng na shinang o, na hwo to kyè na berɔndɔng tanga yas, na gwakû nedok nekyɔrɔk detidetu a?’

¹⁴“Yaga ano, à mwasi, zarap na hwo yang Gɔk, ‘Darwey Dagwi Darwey a ye: E jeng o, jeng de bemat hom BeIsrayɛl ba sé sangal tyang, hwô tɔk yɛ̀ wɛt a?

¹⁵Hwô yi e kwɔn mo yikyik e rwa bato, hwo na bemat pyak tanga hwo, mwa hɛn e ra bedwa, yɛn ê sè gbɔng regyɛng bemât como vê gap tyɔng wɛt.

¹⁶Yin ê vey hwo e ra bemat hom BeIsrayɛl, sede rele de ra kyiri jey. E nepɔlɔ ne yɛnɛ, mê vey na hwo na hwo tó como na vwel hom, yaga na yére bemat jey ye tɔk me, jeng de ma dura nejɛrɛ hom e nuyel mɛn yi na fwom de ma ra na hwo, à Gɔk.’ ”

¹⁷Darwey Dagwi Darwey a ye, “À Gɔk, e hwo de má ha e ra hwo raane a? Neshey pyak, ma ha yi na bemat fwom hom bezarap Israyɛl, wɔgɔ, e jeng de ye kyè vey mê vey na hwo na hwo hwo e ra yɛn.

¹⁸Darwey Dagwi Darwey a to ye: E jeng o, jeng de Gɔk ê hwo e ra vwêl Israyɛl, shom hom yê sogo.

¹⁹E ji repugu hom na nepêp shom hom ma ye: E jeng o, jey yê digis tyɔng wɛt e vwêl Israyɛl.

²⁰Betɔk e gworep, na benon e lagwi, na ngyāma e hey, na pyɛ̂ gabaga, na mwa bemasi de ba sé e jey bê vow na bengyip hom. Beraku bê gabsa, bê bugut beta, ko varâ beduk bê gabsa arɔng.

²¹Mê tɛ̀ a Gɔk bengyip sizɔng na wal como, tanga pyɛ́ vyes detidetu. Me Darwey Dagwi Darwey ma ha ano. Bemât Gɔk o bê doyo bewal mɛn e ra bemɛn.

²²Mê tabak hɛ na tumbang tanga lushâ nemi. Tɛmɛ-nshi rwak, na fwala, mwa na kya tanga kyâ negang yê lusha hɛ e ra yɛ na bemat como mɛ tanga mwa yére bemat gafiri mɛ.

²³Yi ano, mê dura a yére bemat jey mwa, ma sé rwey o, ko ma sé jɛrɛ arɔng. Ano de yɛn ê tɔk, me wɛ à Dagwi Darwey.”