Read berom Yɛzɛkyɛl 39 Bible Online

Yɛzɛkyɛl 39 - berom bible

Yɛzɛkyɛl 39

¹“À hwo mwasi, zarap e ra Gɔk. Hwo yang ɛ, Di, me ra repugu na hwo, à Gɔk, gbɔng gwɔ̀m Meshek na Tubal.

²Mê doyo hwō, ko mê kyè na hwo na me vey na hwo yi e rwa bato yikyik na hwo hwo e ra berakû Israyɛl.

³Ano, mê tara gbang mo yi e vwɔ mwɛlɛng mo, ko me tɛ̀ ket o be gabsa yi e vwɔ yege mo.

⁴Hwô gaba revin o e ra berakû Israyɛl, hwo na mwa regyɛng mo, na bemat gafiri mo. Mê nɔng benon na ngyāma bavin min na be re.

⁵Yin ê gabsa e tê hey, yaga me Darwey Dagwi Darwey ma ha ano.

⁶Mê tomo na kya e ra vwêl Magɔk, na e ra bemât sangal tyang e mwa bakwogom gworep. Ko yɛn ê tɔk, me wɛ à Dagwi Darwey.

⁷Mê ra na bemat hom BeIsrayɛl be tɔk reza hom rê jɛrɛ, ko mê tik na be ra jɔgɔ na reza hom rê jɛrɛ e ngamo nuyel wɛt. Yi ano, yére bemat jey yê tɔk, me wɛ à Dagwi Darwey, Wo Jɛrɛ e ji Israyɛl.

⁸“Di, jeng de má ha ye kyè vey, ya ga vey a remo mwin. Darwey Dagwi Darwey a ye ano.

⁹Ano bemat de ba sangal e bapomô Israyɛl bê nusu, bê wɔ̀ tula pyɛ̂ como ko bê dak kya e yɛ, yɛ à beruga, na begbang, na ket, na bèkpurung begele tanga bebara, yɛn ê pɛsɛl kya na yɛ neshey netaama.

¹⁰Yɛn ê to kyese jama cɔ́gɔt kya e hey kɛ be tow batin cɔ́gɔt e rehwot wɛt, yaga yɛn ê kyě lolo kya na pyɛ̂ como de ba hala mo. Yɛn ê jugu bemat de bá kana jugu hɛn ko be hashe pyɛ̂ bemat de bá kana hashe pyɛ́ mɛn. E Darwey Dagwi Darwey de a ha ano.”

¹¹Dagwi Darwey a ye, “E jeng o, mê nɔng kwɔn hak na be lɛrɛ ɛ̀ Gɔk na bemat mɛ e ji Israyɛl, e nɛk bemat de be kyě kyè, e rwa rak Gworep Nevwashe. Besak bê dul gwong bemât kwɛngɛl o, yaga bê lɛrɛ Gɔk na mwa bagyɛng bemat mɛ e hwomo. Yi ano, bê tâng kwɔn o à Nɛk Bagyɛng Gɔk.

¹²BeIsrayɛl bê ra pɛl taama e de lɛsɛ mwa bavin bemat o na be tik vwel o haalal.

¹³Kawɛ mwat e vwel o ê sɛlɛ na lɛsɛ mɛn, yi ano, bê ba nɔng ɛn nerey jeng de mê ba dura gbɔng nerat hom. Me Darwey Dagwi Darwey ma ha ano.

¹⁴Bê kasa bemat na be kyě kyè e vwel o pɛl taama, na be kyě jama bwang bavin bemat o na be kyě lɛsɛ vɛ, yaga na be tɛ̀ vwel o haalal.

¹⁵Sede yɛn a sé kyě kyè e vwel o, kahɛ kwɔn de yɛn a sɛ̀ kup mwasi, yɛn ê tɛ̀ pyɛ dura e hagat o, yaga na bemât cîng besak be bin vey na be lɛrɛ gwɛ e Nɛk Bagyɛng Gɔk.

¹⁶Ano arɔng, ba rɔda lɔk repomo de bê tang rɛ à Regyɛng e hwomo. Yi ano bê to tɛ̀ vwel o haalal.”

¹⁷Darwey Dagwi Darwey a to yang me, “À hwo mwasi, rini nezap benon na ngyāma yi e kagwa, ye tula hɛ na yɛ re nzem nɔrɔ̂ yas de ma yong a yɛ̄. Nzem o nê sè nerey o tyɔng wɛt e ra berakû Israyɛl. Yin ê re banama ko yin ê sɔ nemi.

¹⁸Yin ê re banamâ besuga, ko yin ê sɔ nemî begwɔ̀m jey de ba yɛt sede ba yɛt beturuk, na byôt tyimit, na vyēl shi, tanga bemus, mwa yɛ yê Bashan de ya mɔsɔ.

¹⁹Yin ê re namâ bwep sɛ̌ ha vey á yin, ko yin sɔ nemi sɛ̌ nà vo in, e de nzem nɔrɔ̂ yas de ma sé yóng a yin.

²⁰E ra tebut rê pyɛ́ hom yin ê tɔk re banamâ bedwa na vê bemat lagsa vɛ, mwa na hê besuga tanga hê bemât como vê kayɛ yere. Me Darwey Dagwi Darwey ma ha ano.”

²¹Dagwi Darwey a ye, mê tik yére bemat jey ye di gbɔng nerat hom, ko ya rɔda di tabak de ma ra a yɛn tanga nedirik vwɔ hom e ra yɛn.

²²Yi e jeng o vɔk e nuyel, BeIsrayɛl bê tɔk, me wɛ à Dagwi Darwey, Dagwi mɛn.

²³Ko yére bemat jey yê tɔk, BeIsrayɛl bá wɔ́ e de sesam yaga banɛn mɛn, yaga yɛn á row me. Yi ano, ma lɛrɛ bayis hom yi na yɛn, ko ma nára hɛn e vɔ vê repugu mɛn, ko ba re ɛn na como.

²⁴Ma teshe na yɛn tyɛng na pyɛ̂ byɛm-byɛm de yɛn a ragas tanga yaga neburu mɛn, ko ma lɛrɛ bayis hom yi na yɛn.

²⁵“Me Darwey Dagwi Darwey ma ye: A remo mê toyo na yerê Yakɔp, ko mê tosho reyɔ̂m BeIsrayɛl mwa, ko mê pugu reza hom rê jɛrɛ.

²⁶Jeng de yɛn a ga toyo, ko yɛn a sé sangal tyang e vwel mɛn, yɛn ê ye bam à rekyen de yɛn a wok, na begwong beves de yɛn a teshe na me. Vit à mwat de ê to shìra hɛn, ko vit à womo de ê to nɔng ɛn bengyip.

²⁷Jeng de mê toyo na yɛn yi na yére bemat jey, na me tula hɛn yi e bavwêl vê repugu mɛn, na me dura nejɛrɛ hom yi na yɛn e bayîs yére bemat jey pyak.

²⁸Ano de yɛn ê tɔk, me wɛ à Dagwi Darwey, Dagwi mɛn, yaga ma tomo hɛn vɔk e de sesam e ji yére bemat jey, ko ma to tula hɛn na me vey na yɛn e sevwel mɛn. Mê ka tik hwak e ji mɛn e jey wɛt.

²⁹Mê to lɛrɛ bayis hom yi na yɛn wɛt, jeng de ma shushu Gabik hom e ra yɛn BeIsrayɛl. Me Darwey Dagwi Darwey ma ha ano.”