Read berom Yɛzɛkyɛl 4 Bible Online

Yɛzɛkyɛl 4 - berom bible

Yɛzɛkyɛl 4

¹“Ko di hwo, à mwasi, jut gàt bwos na hwo tik hɛ e nuyel mo. E ra hɛ, wɔrɔ gbɔng repomo Yɛrusalɛm.

²Rɔnɔ regat o na como sede ra sé gbɔng repomo mó mwin. Tula gwofongol na hwo rɔnɔ mɛ rɛ, yong pyɛ̂ gang jwa mo, lɔk nekwɔn ye ngyɔk, yong sesêk kulsa rùhup o pere wɔ gwɔrɔ rɛ.

³Ano arɔng, jut dyam tyes na hwo tɛ̀ yɛ sede jwa de wa gas o yi e repomo mo, ko hwo doyo, hwo bɛrɛng rɛ arɔng. Yi ano, ba ga rɔnɔ repomo mo na como, ko hwo hwo e ra rɛ. Hemo hê se a BeIsrayɛl pyɛ dura.

⁴“E bama mo, dyɛng e hagat vwɔ mwɛlɛng mo, ko mê tɛ̀ mwa neves BeIsrayɛl e ra hwo. Hwô jut nedirik tabak mɛn, mwa nepyak nepɔlɔ de hwà sé e dyɛngɛ e hwomo ano.

⁵Ma ga yɛrɛ a hwo nepyak nepɔlɔ, nà sé naga betat na kuru shabatat (390), tyɛng na nepyak neshey tabak mɛn. A sé ano de hwô jut nedirik tabak BeIsrayɛl.

⁶Jeng de hwà ga yɛnɛ nemo, hwô to dyɛng hê neba, ko hê se e hagat vwɔ yege mo, na hwo jut nedirik tabak BeYuda. Ma ga yɛrɛ a hwo nepɔlɔ kuru banaas (40), tuk hining yaga kahɛ shey.

⁷“Sɛt bayis mo e ra Yɛrusalɛm de ba ga rɔnɔ na como. Nára vwɔ mo hal na hwo zarap e ra repomo mo.

⁸Di, mê rɔgɔs hwo na bezining, yaga na hwo tɔk doyo yi e hagat hemo vɔk e here wɛt, sɛ̌ hwà yɛnɛ nepɔlɔ̂ rɔnɔ̂ rɛ na como.

⁹“A remo, jut alkama, na baale, na shila, na shila-soya, na géy tanga celes, wuna yɛ mwa e gwokywa gwining, na hwo yong a tó mo mɛ bagat kpam-tuk. E vɛ de hwô re mwa nepɔlɔ naga betat, na kuru shabatat (390) de hwô se e dyɛngɛ e hagat mo.

¹⁰Bê mara nedirik pyɛ́ de hwô re mo, nê se bak gwining e ji benaas vê kilo, hwô reres yɛ e jeng de ba tɛ̀ kahɛ tuk.

¹¹Ano arɔng bê mara a hwo nshi de hwô sɔ, nê se sede netus neba kahɛ tuk, e jeng de ba yong ɛ.

¹²Hwô pɛl kya mo na beving mwasi behwogot e dem de bê bɛrɛng hwō, hwo halang pyɛ́ mo sede negat kpam-tuk ne baale, ko hwo re.”

¹³Dagwi Darwey a ye, “A rɔda se ano de BeIsrayɛl bê re pyɛ́ de ya sé ligis, e kahɛ kwɔn de ma shara hɛn ɛ̀ e tê yére bemat jey.”

¹⁴Ko ma toyo a ye, ma ye, “Áaa, à Darwey Dagwi Darwey! Ma ga sang tɛ̀ to hom ligis wɛt. Yi e newen hom vey e remo, ma ga sang re namâ pyɛ de ya ku, kɛ ngyāma ya hama yɛ wɛt. Mwa pyɛ́ de ya sé ligis ya ga sang yel e nu hom wɛt.”

¹⁵Ko Dagwi Darwey a yang me, “Di, mê tik o hwo ra fwom na bagâng rɔndɔng e tô beving mwasi, na hwo halang mɛ kpam-tuk mō.”

¹⁶Ko a to yang me, “À mwasi, ma sé kyè wɔ tùt vɛ́sɛ na pyɛ̂ re e Yɛrusalɛm. Yɛn ê masa nedirik kpam-tuk mɛn na bengyip, ko yɛn ê masa nshi sɔ mɛn na reyɔm,

¹⁷sɛ̌ vit à bwang pyɛ́ na nshi sɔ de ya tɛt ɛ̀. Yɛn ê bɛrɛng bemɛn e ji bɔrɔk hɛn, ko yɛn ê kyě tala hɛn e tabak banɛn mɛn.”