Read berom Yɛzɛkyɛl 40 Bible Online

Yɛzɛkyɛl 40 - berom bible

Yɛzɛkyɛl 40

¹E shey he kuru baba na hɛ tungun (25) he sesam mot, e susu shey o, e pɔlɔ pwɛl he kuru, e shey he kuru na hɛ naas e bama de ba ga gangas gbɔng repomô Yɛrusalɛm. E tuk o, reto Dagwi Darwey ra hwo e ra me, ko ra wɔ́ na me e hwomo.

²E ji negwi-ywey, Dagwi a wɔ́ na me e vwêl Israyɛl, ko a wɔ̀ tik me e ra rak raku hwak de wa sé lwis vɔk e rak o tyɔng wɛt. Bak rwa batin wɛ wa vɔk yerê lɔk hak sede gbɔng repomo.

³Jeng de a wul na me e hwomo, ma di mwat hwak de a nɛp sede dyam pama, a vɔk rwîk linen tanga cwang masâ pyɛ́ e vwɔ mɛ, ko a sé tumal e rwi ruhup.

⁴Mwat o a yang me, “À mwasi, bɛrɛng hywɛ na hwo wok naka, na hwo tɛ̀ yey mo e ra mwa pyɛ́ de mê dura a hwo, yaga ba vey na hwo e ngamo na me dura a hwo pyɛ́ yemo, yaga na hwo bin ha a BeIsrayɛl kayɛ pyɛ de hwà di.”

⁵Pyɛ de ma di yɛ à Gbɔng Duk Re Fongol, ko ba gwɔrɔ wɛ na jwa. Nelîs cwang masa de wa sé e vwɔ̂ mwat o na sé bol kuru. A mara netes jwa mo ko na sé bol kuru, nelis wɛ vɔk e rak o na sé bol kuru arɔng.

⁶A kyè vɔk e ruhup de gwo bɛrɛng rwa rak. A tut e nekwɔn turus, a mara rwi ruhup o, ko gwa sé bol kuru vɔk e rak o.

⁷Nelîs duk bemât gyéng na sé bol kuru, ko netes o bol kuru arɔng. Netes de na sé e tê beduk o na sé bol rwit. E nuyel beduk bemat gyéng o, gwong gwa sé de nelis o na sé bol kuru, gwa kyè vɔk e ruhup de gwó bɛrɛng Gbɔng Duk Re Fongol.

⁸A mara lalâ nuyêl ruhup de he bɛrɛng Gbɔng Duk o ko ha sé bol rwit.

⁹Ano arɔng a mara lalâ ruhup o ko netes o na sé bol kuru na vɛ naas, ko a mara hagat hê yikyik o, ko ha sé bol naas. Lalâ ruhup o he bɛrɛng vey e ji mo.

¹⁰Beduk bemât gyéng ba sé betat e kahɛ hagat rwi ruhup gwô rwa rak, nerey vɛ na sé tyɛng, ko netîng vara duk o na sé tyɛng arɔng.

¹¹Ano arɔng, mwat o a mara netês gwong vɔk e ruhup o, nà sé bol kuru baba na vɛ ba (22) mwâ nɛ, ko netês tê rùhup de ba sé pyot o na sé bol kuru na vɛ tyiimin.

¹²E nuyêl kawɛ duk bemât gyéng, ba lɔk jwa be gwɔrɔ mɛ wɛ, nelis o vɔk e rak o, na netes o na sé bagat bwol gwining na rebit o. Beduk o pyɛ vɛ ba sé bol kuru e kawɛ bak.

¹³Mwat o a to mara neyikyik yi e mâ duk o wo hagat hemo vɔk e hê duk o wo hagat here, bē ye dɔ mɛ̀ gwong de gwa gas vɛ, ko nelis o na sé bol kuru banaas na vɛ ba (42).

¹⁴A mara vàranda duk o de nelis o mwa na sé bol kuru batat na vɛ naas (34), ko lala ha gwɔrɔ vàranda mo e kawɛ bak.

¹⁵Mwa nelis kwɔn o yi e rwi ruhup gwô jey vɔk e ruhup gwô duk wo yɛnɛ mo na sé bol kuru rwit na vɛ naas (84).

¹⁶Ba vɔk bapɔk e vara de be bɛrɛng jey vè beduk o mwa, ko ba vɔk vɛ e varâ gâs beduk o arɔng. Ba wɔrɔ batîn tyet e varâ beduk o vè ji mo de bé bɛrɛng gwong de gwa yi e ruhup o.

¹⁷Mwat o a vey na me e lalâ jey, ba lɔk beduk e hwomo, ko ba lɔk gàgbang ba gwɔrɔ mɛ lala mo, ba lɔk ɛ beduk kuru batat e nuyêl gàgbang o.

¹⁸Gàgbang o wa raa tyɛng vɔk e hagât rùhup o, ko wà sé e nɛk e ra wo ji mo.

¹⁹Ko a mara neyikyik de na sé e tê ruhup majey de gwa sé e vwel o vɔk e gwo lalâ ji mo, ko nà sé bol naga na kuru batyiimin na vɛ rwit.

²⁰Ano arɔng, mwat o a mara nelis na netes ruhup lala majey de gwo bɛrɛng rwa bato.

²¹Beduk betat vê bemat gyéng e kahɛ hagât gwong yel o, na varâ duk de bà gas vɛ̀, tanga ruhup o mwa, mása mɛn ha sé tyɛng na hê nekwɔn yere nining o nè rwa rak. Nelîs gwong o na sé bol kuru rwit na vɛ naas, ko netes o na sé bol kuru banaas na vɛ ba.

²²Nerêy bapɔk duk o, na ne lala mo, tanga ne wɔ́rɔ batin tyet o na sé tyɛng na vê ruhûp rwa rak. Nekwɔn turus na sé netaama vɔk e ruhup o, ko duk wò yɛnɛ̂ ruhup o wó bɛrɛng lala mo.

²³E hagât ruhûp rwa bato ruhup hwak gwa sé de be kwey ɛ vɔk e lala ji mo. Mwat o a mara nelis yi e rwi gwomo vɔk e gworo, ko na sé bol naga na kuru batyiimin na vɛ rwit.

²⁴Mwat o a kyè na me vɔk e rwa batin, ko e hwomo, rwi ruhup o hwak gwa sɛ́. A mara vara duk o ve ji mo, na beduk bahagât gwong o, ko mwa ba sé sede vê bwang rùhup o.

²⁵Beduk bahagat o mwa yi e ruhup o ba vɔk bapɔk tyɛng sede bwang o. Nelis o mwa na sé bol kuru rwit na vɛ naas ko netes o na sé bol kuru banaas na vɛ ba.

²⁶Nekwɔn turus na sé netaama vɔk e ruhup o, ko duk wo yɛnɛ̂ ruhup o wó bɛrɛng lala mo. Ba wɔrɔ batin tyet e vara duk o ve ji mo, e kahɛ hagat o.

²⁷E hagat ruhup rwa batin arɔng, ruhup hwak gwa sé de be kwey ɛ vɔk e lala ji mo. A mara nelis o yi e rwi gwomo vɔk e gworo ko na sé bol naga na kuru batyiimin na vɛ rwit.

²⁸Ano, mwat o a wɔ́ na me e lalâ ji mo, hê ruhup rwa batin. A mara rwi ruhup rwa batin o ko gwa sé tyɛng na rùhup lala majey.

²⁹Beduk bemat gyéng, na rùhup majey tanga vara ji mo, nerey o na sé tyɛng na ne bwang o.

³⁰Ba gwɔrɔ ruhup o na varâ ji mo na bapɔk. Nelis vɛ̀ na sé bol kuru rwit na vɛ naas ko netes o na sé bol kuru banaas na vɛ ba.

³¹Vara ji mo be bɛrɛng lala majey, ko ba wɔrɔ batin tyet e varâ beduk gwông ruhup o. Gwong o gwa vɔk nekwɔn turus rwit vɔk e ruhup o.

³²Mwat o a kwey na me e rwi ruhup rwa rak vɔk e lala ji mo. A mara ruhup o, ko gwa sé tyɛng na bwang o.

³³Beduk bemât gyéng, na ruhup majey tanga varâ ji mo ba sé tyɛng na vɛ bwang o. Ba gwɔrɔ ruhup o na varâ ji mo na bapɔk. Nelis o na sé bol kuru rwit na vɛ naas, ko netes o na sé bol kuru banaas na vɛ ba.

³⁴Varâ ji mo be bɛrɛng lala majey. Ba wɔrɔ batin tyet e varâ beduk gwong ruhup o e kahɛ hagat. Gwong o gwa vɔk nekwɔn turus rwit vɔk e ruhup o.

³⁵Ano arɔng, mwat o a kwey na me vɔk e rwi ruhup rwa bato, a mara gwɛ, ko gwa sé tyɛng na bwang o.

³⁶Beduk bemat gyéng, na ruhup majey, tanga varâ ji mo ba sé tyɛng na bwang o. Ba gwɔrɔ ruhup o na vara ji mo na bapɔk. Nelis o nà sé bol kuru rwit na vɛ naas, ko netes o nà sé bol kuru banaas na vɛ ba.

³⁷Varâ ji mo be bɛrɛng lala majey. Ba wɔrɔ batin tyet e varâ beduk gwong ruhup o e kahɛ hagat. Gwong o gwa vɔk nekwɔn turus rwit vɔk e ruhup o.

³⁸E lala majey ba lɔk duk hwak de rwi mo gwa sé e vwarâ ruhup rwa bato de be kwey ɛ vɔk e lala ji mo. A sé e hwomo de be kus ɛ banama yas de be rangas burang yaga nɔrɔ vɔk na Dagwi.

³⁹E hwomo e vwarâ ji mo gwo ruhup o ba vɔk betebut beba e kahɛ hagat, yaga yɛt nɔrɔ yas de be rangas burang, na ye nɔrɔ̂ banɛn tanga ye nɔrɔ̂ yaga yông burû gawey.

⁴⁰E majey duk o, e gwông yel gwo ruhup rwa bato, ba vɔk betebut beba, ko e hagat o het, e yɛnɛ̂ vwarâ ji mo gwo ruhup o ba vɔk betebut beba arɔng.

⁴¹Ba vɔk betebut benaas e ji mo, ko ba vɔk betebut benaas e majey o arɔng. Mwa vɛ ba sé rwit de bê dopse yɛt ɛ yas de bê nára nɔrɔ̂ yɛ vɔk na Dagwi.

⁴²Ba to vɔk betebut benaas de ba yong na beta bagasak, nelis na netês kagwɛ mo nà sé bol ba na rebit o, ko nelis o vɔk e rak o na sé bwol gwining na rebit o. Be tikis pyɛ̂ yɛt yas de be nára nɔrɔ̂ rangas burang, na yê bwang nenɔrɔ e ra betebut o.

⁴³Ba tɛ̀ begúk be gwɔrɔ mɛ ji duk o, nelîs vɛ na sé sede nára beken vwɔ mwat. Mwa banama de bê nása sede nɔrɔ̂ rangas be tikis vɛ e ra betebut o.

⁴⁴Ano arɔng, mwat o a vey na me e lala ji mo, beduk ba sé beba e lala mo — gwining e hagat ruhup rwa bato, gwó bɛrɛng rwa batin, ko hwak e hagat ruhup rwa batin, gwó bɛrɛng rwa bato.

⁴⁵A yang me, “Duk de wó bɛrɛng rwa batin wa sé yaga bepiris de ba vɔk nedirîk tom Gbɔng Duk Re Fongol,

⁴⁶ko duk de wó bɛrɛng rwa bato wa sé yaga bepiris de ba vɔk nedirîk tom kwɔn nása nenɔrɔ. Yɛn vɛ à yerê Zadɔk. E yɛn vɛ zɔng vê yerê Levi de ba simo a yɛn na be yel e kwɔn Dagwi Darwey na be ra a yɛ fwom.”

⁴⁷Mwat o a masa lala ji mo, ko ha sé bol naga na kuru batyiimin na vɛ rwit e kawɛ bak wɔgɔ, ba sé tyɛng. Kwɔn nása nenɔrɔ ha sé e nuyel Gbɔng Duk Re Fongol.

⁴⁸Mwat o a wɔ́ na me e duk ruhup Gbɔng Duk Re Fongol. A mara wɛ ko nelis o na sé bol shatat, ko netes o na sé bol kuru baba na vɛ naas, ko netês kagwɛ vwara gwô hagat o na sé bol tungun.

⁴⁹Nelis kwɔn yel e ruhup o na sé bol kuru batat na vɛ naas ko netes o na sé bol kuru baba. Nekwɔn bɔrɔs na sé kuru vɔk e ruhup o, ko na vɔk sesek ba, gwining e kahɛ hagat.