Read berom Yɛzɛkyɛl 41 Bible Online

Yɛzɛkyɛl 41 - berom bible

Yɛzɛkyɛl 41

¹E bamâ hane, mwat o a kyè na me vɔk e duk wo tē wo Gbɔng Duk o, e kwɔn Duk Jɛrɛ. A mara gwong wɔ yel e ji wɛ, nelis o na sé bol kuru,

²ko netes o bol kuru na vɛ rwit, netîng vara mo e kawɛ bak na sé bol rwit. Nelis duk o na sé bol kuru batyiimin na vɛ rwit ko netes o bol kuru batat na vɛ naas.

³Ano arɔng a wɔ̀ yel e duk wo ji mo mwa. A mara gwong yel e wɛ, nelis o na sé bol tat ko netes o bol kuru, netîng vara mo bol kuru na vɛ ba.

⁴A mara duk o pyɛ wɛ, ko nelis o na netes o mwa na sé bol kuru batat na vɛ naas. Duk o wa sé e nuyel duk wo tē. Ko a yang me, “Duk Jɛrɛ Wo Jɛrɛ à womo.”

⁵Mwat o a mara netîng vara ji mo vè lɔk Gbɔng Duk Re Fongol, ko na sé bol kuru. Ba lɔk neduk nesɛl o de netes o na sé bol taama, ba gwɔrɔ mɛ mwa vara Gbɔng Duk o.

⁶Neduk o na sé turus ba yi e duk vwel o vɔk e rak o, ko kahɛ tut ha vɔk neduk kuru batat. Varâ Gbɔng Duk o ne kahɛ tut rak o ba radɛn ve vwel mɛn na neting, yaga na be lɔk neduk o e ra vɛ, sana lashe vara Gbɔng Duk o.

⁷Yi ano, ka sede ba di varâ Gbɔng Duk o e jey, bà sé sede neting o mwâ nɛ na sé tyɛng pere wɔ̀ tā e rak o. Ba lɔk nekwɔn turus vɔk e neduk rak o e ra vwarâ jey gwo Gbɔng Duk o. Nekwɔn turus o na sé e majêy neduk o, yaga ano, bé tɔk kyè yi e neduk vwel o vɔk e ne tē, pere vɔk e ne rak o arɔng.

⁸Ba bomo retîs Gbɔng Duk o e ra retîs beta de ra sé bol kuru yi e vwel, ko ba lɔk neduk de na gwɔrɔ Gbɔng Duk o e ra retis rane mo.

⁹Netîng vara jey ve neduk de na gwɔrɔ Gbɔng Duk o na sé bol rwit. Ba lɔk pyɛ cak e tê vara neduk o,

¹⁰na bwang beduk lala mo wɛt. Lala de ha sé e tē mɛn ha sé bol kuru batat na vɛ naas.

¹¹Rwi duk gwining gwa sé vɔk e neduk ne rwa batô Gbɔng Duk o, ko hwak gwa sé vɔk e neduk ne rwa batin. Retîs beta de ba lɔk ɛ̀ Gbɔng Duk o mwa na neduk o ra nusu e jey bol rwit.

¹²E yɛnɛ̂ lala de ha sé e rwa tâ Gbɔng Duk o, ba lɔk duk hwak de nelis wɛ na sé bol naga na kuru batungun, ko netes o bol naga gwining kuru rining na vɛ tyiimin. Netîng vara duk o mwa na sé bol shatat.

¹³Mwat o a mara nelis Gbɔng Duk Re Fongol ko na sé bol naga na kuru batyiimin na vɛ rwit. A mara yi e vwara bamâ Gbɔng Duk o, a kwey mɛ lala bamâ wɛ vɔk e vwara bamâ duk de wa sé e yɛnɛ mo e rwa ta, ko nelis o na sé bol naga na kuru batyiimin na vɛ rwit.

¹⁴Nelis o de na kwey e nuyel Gbɔng Duk o mwa na nelala ne kahɛ hagat o, na sé bol naga na kuru batyiimin na vɛ rwit arɔng.

¹⁵E yɛnɛ mo, mwat o a mara nelis duk rwa ta, mwa na neduk kahɛ hagat o ko na sé bol naga na kuru batyiimin na vɛ rwit. Ruhup yel e Gbɔng Duk Re Fongol o, na Duk Jɛrɛ, na Duk Jɛrɛ Wo Jɛrɛ,

¹⁶ba bang vara mo na nebak cɔgɔt de ba hyulum ne naka yi e vwel vɔk e bapɔk — ko ba tɔk bang bapɔk o — na beduk betat vê bahagat o ba tɔrɔ mwa vɛ na nebak cɔgɔt o arɔng.

¹⁷Vara jî Gbɔng Duk o yi e vwel pere vɔk e ra rak ri duk o ba bang vɛ mwa na wɔrɔ̂

¹⁸batin tyet na pyɛ́ cen. Ba sɔ́sɔ̀k batin tyet o na pyɛ́ cen o ba gwɔrɔ mɛ vara beduk o. Kayɛ pyɛ cen o ya vɔk bwang bayis baba:

¹⁹Bwang bayîs mwasi de gwo bɛrɛng tîn tyet hê hagat hemo, na bwang bayîs gukum de gwo bɛrɛng tîn tyet hê hagat here. Ba ra ano ba pere wɔ̀ gwɔrɔ mɛ varâ Gbɔng Duk o,

²⁰yi e vwel vɔk e ra rak ri duk o.

²¹Nelis na netês sesêk ri Duk Jɛrɛ mo na sé tyɛng. E nuyel ruhup Duk Jɛrɛ Wo Jɛrɛ ba tik ɛ pyɛ cak de ya sé sede

²²gàgbang nása nenɔrɔ vɔk na Dagwi de ba yong na cɔgɔt. Kwɔn o ha sé bol tungun vɔk e rak o, ko netes na nelis o na sé bol naas. Bato-kwɔng o, na retis o, na vara mo mwa ba yong na cɔgɔt. Mwat o a yang me, “Womo wɛ a tebut nuyêl Dagwi Darwey.”

²³Rwi duk wuma bā gwa sé e yɛnɛ̂ gwong wɔ̀ yel e Duk Jɛrɛ, ko hwak yerê gwɛ gwa sé arɔng e yɛnɛ̂ gwong wɔ̀ yel e Duk Jɛrɛ Wo Jɛrɛ.

²⁴Mwa vɛ ba manas vɛ bibeba ko ba wuma vɛ e tē bebak beba.

²⁵Ba wɔrɔ batîn tyet na pyɛ́ cen e ra ri Duk Jɛrɛ, tyɛng sede remo de ba ra e vara ruhup o. Ba bang rwi ruhup o na cɔgɔt tyɛng ano arɔng.

²⁶E vara bahagât ruhup o, ba tɛ̀sɛ bapɔk, ko ba tɔrɔ vara mo na wɔrɔ̂ batin tyet.