Read berom Yɛzɛkyɛl 42 Bible Online

Yɛzɛkyɛl 42 - berom bible

Yɛzɛkyɛl 42

¹E bama mo, mwat o a kyè na me vɔk e lala majey, a wɔ́ na me e beduk de ba sé bagat na lalâ Gbɔng Duk Re Fongol hê rwa bato, e hagat duk de wa sé e rwa ta.

²Nelis duk o na sé bol naga na kuru batyiimin na vɛ rwit ko netes o na sé bol kuru rwit na vɛ naas.

³Hagat hining wɛ he bɛrɛng tîs beta de ha nusu e jey bol kuru batat na vɛ naas, hemo de ha sé e hagat Gbɔng Duk o, ko hagat o he neba he bɛrɛng gwong lala majey. Ba lɔk duk o turus tat, turus hê neba ba pɛrɛ hɛ e ji mo tyɔng yi e hê vwel o, ko hê netat ha gwɛ̌ sé e ji mo tyɔng yi e hê neba mo arɔng.

⁴E nuyel beduk o, gwong gwa sé de netes o na sé bol kuru na vɛ tyiimin, ko nelis o na sé bol naga na kuru batyiimin na vɛ rwit. Ri duk o be bɛrɛng rwa bato.

⁵Neduk nelɔ rak o na sé nesɛl e ra nè tē na ne vwel, a remo de ba pɛrɛ lɔk nɛ e ji mo na bwang o.

⁶Beduk mwa zang tat e ra bemɛn ba vɔk bevaranda tyɔng e nuyel o, ko ba vɔk sesêk gyep vɛ sede bwang beduk lala vwel o wɛt. Yi ano, neduk de na sé e tut hê netat na wul nè tut hê tē na hê vwel na nerey wɛt.

⁷Nelis vwara duk majey de gwa sé e hagat beduk lala majey na sé bol kuru rwit na vɛ naas.

⁸Nelis beduk de be bɛrɛng lala majey na sé bol kuru rwit na vɛ naas. Vemo de be bɛrɛng Gbɔng Duk o nelis o na sé bol naga na kuru batyiimin na vɛ rwit.

⁹E nɛ̂n beduk o, rwi ruhup gwa sé e rwa rak, sede bê yel e beduk o yi e lala majey.

¹⁰Beduk behak ba sé e netês vwara duk lala hê rwa batin e nuyêl lala hak tanga e nuyêl Gbɔng Duk o.

¹¹Gwong gwa sé e nuyel beduk o, gwa sé sede vèmo de ba sé e rwa bato. Nelis beduk o na netes o, na begwong de ba yong vɛ, na ri vɛ mwa ba sé yere jining na ve rwa bato.

¹²Sede ri beduk de ba sé e rwa batin, ano arɔng beduk vemo ba vɔk rwi hwak de gwo bɛrɛng jwa-pomo wo rwa rak.

¹³Mwat o a yang me, “Beduk de ba sé e rwa batin na vê rwa bato e nuyel lala mo ba tik vɛ jaram. A sé e ji vɛ de bepiris de be ra fwom e nuyel mɛ, be reres ɛ pyɛ̂ nɔrɔ de ba ga kana tik jaram yaga Dagwi. A sé e ji vɛ arɔng de be tikis ɛ pyɛ̂ nɔrɔ de ya dal mwa, yemo de be nása a Dagwi, yɛ a, pyɛ̂ nɔrɔ yê yéneng, na yê banɛn, tanga yê burû gawey. Kwɔn o ha sé jaram yaga Dagwi.

¹⁴Jeng de bepiris be nusu yi e Duk Jɛrɛ vɔk e lala majey, a sé gbing-gbing na yɛn a paa berugu de yɛn e tɛ̀sɛ na be ra a Dagwi mɛ̀ fwom, be tik vɛ e beduk o gyam na yɛn a de nusu, yaga bà sé jɛrɛ. A sé gbing-gbing na yɛn a tɛ̀ berugu behak detu gyam na yɛn a de wɔ́ e majey e dem de bemat ba sé ɛ.”

¹⁵Bama de mwat o a ga yɛnɛ marâ yɛnɛ ji Gbɔng Duk Re Fongol, ko a kwey na me e ruhup rwa rak, ko a hwo mara yɛnɛ̂ kwɔn de ha rɔnɔ Gbɔng Duk o.

¹⁶A mara hagat rwa rak na cwang mása mo, ko nelis o na sé bol naga rwit na kuru banaas.

¹⁷Ano, a mara hagât rwa bato na cwang masa mo, ko nelis o na sé bol naga rwit na kuru banaas.

¹⁸A mara hagat rwa batin na cwang masa mo, ko nelis o na sé bol naga rwit na kuru banaas.

¹⁹Ano kwong a mara hagat rwa tā na cwang masa mo, ko nelis o na sé bol naga rwit na kuru banaas.

²⁰Yi ano, a masa mwa bahagat o banaas. Ba gwɔrɔ cwɛl o mwa na jwa-pomo de nelis o na sé bol naga rwit na kuru banaas, ko netes o na sé bol naga rwit na kuru banaas, na be gas kwɔn jɛrɛ yi e nekwɔn zɔng-reng.