Read berom Yɛzɛkyɛl 43 Bible Online

Yɛzɛkyɛl 43 - berom bible

Yɛzɛkyɛl 43

¹E bama mo, mwat o a vey na me e ruhup de gwo bɛrɛng rwa rak.

²E hwomo, ma di gbɔng nedyɛt Dagwî Israyɛl ne kyè vey yi e rwa rak. Fwɔ̂ Dagwi o gwa wus sede nshi de ne tele na yol, ko jey o ya nɛp na gbɔng nedyɛt mɛ.

³Negwi-ywey de ma di mo na sé sede nemo de mà kana di jeng de Dagwi à vey wey na gbɔng repomô Yɛrusalɛm, na nemo de mà kana di e hagat Rɔt Kebar arɔng. Ko ma gaba gup e vwel.

⁴Sede gbɔng nedyɛt Dagwi Darwey o na yel e Gbɔng Duk Re Fongol e ruhûp rwa rak,

⁵ko Gabik Dagwi o ha yang me cik, ha kyè na me vɔk e lalâ ji mo, ko gbɔng nedyɛt Dagwi Darwey na sila Gbɔng Duk Re Fongol.

⁶Mwat o a sé tumal e hagat hom, ko ma wok Dagwi Darwey a sé ha na me yi e Gbɔng Duk o.

⁷A ye, “À mwasi, kwɔn gwofwa negwɔm hom, na kwɔn tas bol hom à hemo. Mê sangal e ngamo e tê BeIsrayɛl nesheneshey. BeIsrayɛl bê sang to tɛ̀ reza hom rê jɛrɛ ligis wɛt — kɛ yɛn, kɛ begwɔ̀m mɛn, kɛ yi na nedeneves ne sâp cī, kɛ yi na yông cī yê bavin begwɔ̀m mɛn de ba ga kushu.

⁸Begwɔ̀m mɛn o bá lɔk batis na ri rùhup nelɔ mɛn bagat na vɛ̀ Gbɔng Duk Re Fongol hom, ko yɛn á tik kekwɔn lɔk jwa-duk zɔng e tē mot na yɛn, yi ano, yɛn á tɛ̀ reza hom ligis na tom mɛn de ba sé byɛm-byɛm, yaga ano, ma wey na yɛn e ji shom hom.

⁹A remo, tik na yɛn a wey na nedeneves ne sâp cī, tanga sâp bavin begwɔ̀m mɛn, be wey na yɛ yikyik yi na me, ko mê sangal e tē mɛn nesheneshey.”

¹⁰Dagwi Darwey a re nuyel a ye, “À mwasi, misang a BeIsrayɛl rehâ Gbɔng Duk Re Fongol, na yɛn a bɛrɛng begwong lɔk wɛ yɛɛlɛl. Tɛ̀ yɛn a vo rekyên tom banɛn de yɛn a ga ragas.

¹¹Ka sede yɛn a vo rekyên pyɛ́ de yɛn a ga kana ragas, ko hwo misang a yɛn begwong lɔk Gbɔng Duk o, begwong de ba wɔrɔ wɛ, na nekwɔn yeles tanga ne nunus e ji wɛ, na begwong de ba kyɔrɔk wɛ, na begwong de ba ngyɛrɛ kayɛ pyɛ e ji wɛ. Hwo to ha a yɛn mwa nu tanga badu de ba nɔng e ra wɛ. Jɛk vɛ e bayis mɛn yaga na yɛn a gyeng vɛ, na yɛn a raa kayɛ pyɛ de ba yong, mwa na nu de ba nɔng e ra yɛ̄.

¹²Badu Gbɔng Duk Re Fongol á vemo: Mwa yɛnɛ kwɔn de ha gwɔrɔ wɛ e ra raku mo, mwa kwɔn o hê sè kwɔ̂n jɛrɛ sizɔng. Di, badu Gbɔng Duk Re Fongol à vemo.

¹³“Mára bebak detidetu vê gagbang nɔrɔ̂ yas à hemo, ba ra fwom na bol masâ Gbɔng Duk Re Fongol. Ba kás kekǎng be rɔnɔ mɛ tîn gàgbang o, netes kɛ na sé bwol gwining na rebit o, ko neciwil o na sé tyɛng ano arɔng. Ba rɔnɔ hagât jey hê vɔng o na lɔk de ha vey bagat bwol gwining vɔk e rak o.

¹⁴Bak vwêl gàgbang nɔrɔ mo yi e retis o vɔk e rak o wa sé bol naas. Bak o wo neba ba gwɛ̌ netes wɛ e kawɛ bak na bwol gwining na rebit o, ko wà sé bol taama vɔk e rak o. Bak o wo netat ba gwɛ̌ netes wɛ e kawɛ bak na bwol gwining na rebit o.

¹⁵Bak wo netat wɛ à wo rak o de be nása ɛ nɔrɔ̂ yas, nelis wɛ na sé bol taama arɔng. Ba tɛ̀ badúk e bato-kwɔng o banaas.

¹⁶Rà rak gàgbang nɔrɔ yas o wà sé bol kuru baba e kawɛ bak.

¹⁷Kahɛ hagât bak wo tē ha sé bol kuru baba na vɛ naas. Ba rɔnɔ hagât jey o na lɔk de ha vey bagat bwol gwining vɔk e rak o. Netês kekǎng o na sé bwol gwining na rebit o. Nekwɔn bɔrɔs vɔk e ra rak kwɔn rangas yas o ne bɛrɛng rwa rak.”

¹⁸Mwat o a to yang me, “À mwasi, Darwey Dagwi Darwey a ye, ‘Vemo vɛ à badu gàgbang nɔrɔ yas o: Jeng de ba yong hɛ, be nása nenɔrɔ̂ yas de be rangas, na be waram nemi e ra hɛ,

¹⁹ko hwo nɔ̂ng bepiris ve yerê Zadɔk, vemo de be ra a me fwom, bwôt mus yaga nɔrɔ̂ banɛn. Me Darwey Dagwi Darwey ma ha ano.

²⁰Hwô vɛ nemi, na hwo tɛ̀ e ra badúk banaas vê gàgbang nɔrɔ mo, na e bato-kwɔng banaas vê kwɔn o hê tē tanga e ra bahagat o mwa. Yi ano, hwô fung kwɔn o, na hwo ra mɛ talâ-nɛn yaga yɛ̄.

²¹Hwô jut mus wo nɔrɔ̂ banɛn, ko bê rangas wɛ e kwɔn de ba ga yong ɛ gyam, e bamâ yɛnɛ̂ kwɔ̂n Gbɔng Duk Re Fongol.

²²E tuk hê neba, hwô nára nɔrɔ̂ gam de wa vɔk ram wɛt, yaga nɔrɔ̂ banɛn, ko bê fung kwɔn nára nɔrɔ mo tyɛng sede ba ra na bwôt mus.

²³Sede hwà ga yɛnɛ fûng kwɔn o, ko hwo nára nɔrɔ̂ mus tanga hê turuk de ba vɔk ram wɛt yi e kwara arɔng.

²⁴Hwô nára yɛ e nuyêl Dagwi Darwey, ko bepiris bê zagat nevwashe e ra yɛ, na be nára yɛ sede nɔrɔ̂ yas de be rangas burang yaga Dagwi Darwey.

²⁵E ji nepɔlɔ netaama, kahɛ tuk, hwô nɔng vyel shi yaga nɔrɔ̂ hála banɛn, na mus tanga turuk de vit a yɛ̄ na ram, yi e kwara mo.

²⁶Pɔlɔ taama yɛn ê ra talâ-nɛn yaga gàgbang nɔrɔ mo, na be kus hɛ haalal, yi ano, bê nára a Dagwi hɛ.

²⁷Sede nepɔlɔ mo na ga kwey, ko yi e tuk he rwit vɔk e nuyel, bepiris bê nása nenɔrɔ̂ yas min de be rangas, na nè wuna nesa min arɔng e ra kwɔn nára nɔrɔ mo. Yi ano, mê vɔk yey pyɛng na yin. Me Darwey Dagwi Darwey ma ha ano.’ ”