Read berom Yɛzɛkyɛl 44 Bible Online

Yɛzɛkyɛl 44 - berom bible

Yɛzɛkyɛl 44

¹Mwat o a toyo na me vɔk e ruhup lala majey gwo Gbɔng Duk Re Fongol gwo rwa rak. Ruhup o gwa sé e banga.

²Dagwi Darwey a yang me, “Ruhup gwomo gwô nàra e banga, bê sang wunta gwɛ wɛt. Vit a mwat de ê to yel e gwɛ, yaga Dagwi Darwey, Dagwî Israyɛl a ga yel e gwɛ, yaga ano, gwô nàra e banga.

³Sɛ̌ gbɔng gwɔ̀m de e re negwɔm ê tɔk kwey ɛ, na a re pyɛ́ e nuyel Dagwi Darwey. Yɛ̀ ê yel e ruhup o, ko a to nusu e gwɛ.”

⁴Ano kwong, mwat o a kwey na me e ruhûp rwa bato vɔk e nuyêl Gbɔng Duk Re Fongol. Sede ma sé bɛrɛng, ko ma di gbɔng nedyɛt Dagwi Darwey na ga sila Gbɔng Duk mɛ mo, ko ma vɔk ma gaba gup e vwel.

⁵Dagwi Darwey o a yang me: “À mwasi, tɛ̀ nehywɛ mo, bɛrɛng naka, na hwo wet betong na mwa pyɛ́ de mê ha a hwo e ra begwông râ pyɛ́ e Gbɔng Duk Re Fongôl Dagwi Darwey, na e ra badu wɛ mwa. Bɛrɛng hywɛ na hwo tɔk yerê bemat de ba simo a yɛn na be yel e Gbɔng Duk o, tanga vemo de ba simo a yɛn wɛt.

⁶“Há a bemât sogô nehywɛ, yɛn BeIsrayɛl ngan: Me Darwey Dagwi Darwey ma ye: Óoo à yin BeIsrayɛl, tɛ̀ in kwɔ̂k pyɛ̂ byɛm-byɛm de yin e ragas.

⁷Yaga yin e tɛ̀ Gbɔng Duk hom ligis yi na yeles na yére dyuk de ya sé bemandul e yey na e rebek, jeng de yin a sé nása a me nenɔrɔ̂ pyɛ̂ re, na bwep tanga nemi. Yin a ga kwɔrɔ wuna-na-sira hom na yin yi na ragas pyɛ̂ byɛm-byɛm min.

⁸Yin á gyeng redu de ma nɔng in e ra pyɛ́ de ya sé jaram yaga me wɛt, ko yin á tɛ̀sɛ bemat yére dyuk be ra a yin fwôm pyɛ́ de ma nɔng in nu e ra yɛ e Gbɔng Duk Re Fongol hom.”

⁹Darwey Dagwi Darwey a ye, “Vit à mwat yere dyuk de a se mandul e yey na e rebek yi e yére dyuk de a sé sangal na BeIsrayɛl de ê sang yel e Gbɔng Duk Re Fongol hom.”

¹⁰Dagwi Darwey a ye, “Ko BeLevi de ba hala me yikyik, ba ye rɛ̀ng à gwong hom na be raa cī jeng de BeIsrayɛl bá kana ye rɛng, yɛn ê jut nedirîk tábak mɛn.

¹¹Yɛn ê sè bemat fwom zɔng e Gbɔng Duk o, yɛn ê gyenges rùhup, na ragas tom e Gbɔng Duk o, yɛn ê yɛt yas de bemat be nɔngɔs yaga nɔrɔ̂ rangas burang, na hemo de be nása vɔk na Dagwi, ko yɛn ê sè e hwomo na be ra a bemat fwom.

¹²A remo de yɛn á ra a bemat fwom e nuyel cī mɛn, yɛn a tɛ̀ BeIsrayɛl be ye bugurɛk e ji banɛn, yaga ano, me Darwey Dagwi Darwey ma sira na reza hom, e ra yɛn, ma ye: Yɛn ê jut nedirîk tabak mɛn.

¹³Yɛn ê vey bagat na me, na be ra a me fwôm bepiris hom wɛt, kɛ be vey bagat na pyɛ́ de ya sé a me jɛrɛ, na yemo de ya dal mwa na nejɛrɛ. Ko yɛn ê sɔ rekyen yaga tom byɛm-byɛm mɛn.

¹⁴Ko mwa ano, mê tɛ̀ yɛn à bɛrɛng Gbɔng Duk Re Fongol hom, na yɛn a ra tom sɛl de be ra e ji wɛ.”

¹⁵Darwey Dagwi Darwey a ye, “E ra reha bepiris hom ve yerê Levi yi e ruhûp Zadɔk, de ba re nuyel na ra a me fwom e Duk Jɛrɛ e Gbɔng Duk Re Fongol na tsak o jeng de bwang BeIsrayɛl bá doyo a me ma, e yɛn vɛ de bê vey bagat na me, na yɛn a ra a me fwom, yɛn ê vey bagat na me, na be nása a me nɔrɔ̂ sebwep tanga hê nemi yas.

¹⁶Yɛn ê yel e Duk Jɛrɛ, na yɛn a vey e kwɔn tebut hom, na yɛn a ra a me fwom, ko yɛn ê gyeng nu de ma nɔng ɛn.

¹⁷Jeng de yɛn ê yel e rùhup lala hom hê ji mo, yɛn ê tɛ̀ berugû linen, yɛn ê tɛ̀ pyɛ cak ye wuulu e bek mɛn wɛt, jeng de yɛn a sé ra fwom e rùhup lala ji mo, kɛ e ji Gbɔng Duk o.

¹⁸Yɛn ê tɛ̀ bekpîn linen e bato mɛn, na berugû ji mo de bê rɔgɔs vɛ e rawit. Yɛn ê gyiri hɛn na pyɛ́ de yê tɛ̀ yɛn a tá long wɛt.

¹⁹Jeng de yɛn ê wɔ̀ sɛ bemat e lala majey, ko yɛn ê paa berugû fwom mɛn o, be tik vɛ e beduk de ba tik jaram. Yɛn ê tɛ̀ berugu mo behak yaga na be bin tɛ̀ bemat haalal wɛt yi na berugu de ba sé jaram.

²⁰“Bepiris o bê hwon bato mɛn, kɛ be tik badúk o be ras balis o wɛt. Yɛn ê yɛt setot rato mo zɔng.

²¹Hwak mɛn a kwon sɔ nshi anap jeng de a yel e lala ji mo wɛt.

²²Yɛn ê tɔk ra wenêng kuma wɛt, kɛ hwā de rwas mɛ e ga tɛ̀ ɛ e gwong. Yɛn ê vos beyorom-behwong yi e ji yerê Israyɛl zɔng, kɛ kuma de rwas mɛ á sè piris.

²³“Yɛn ê basa a bemat hom nedetû pyɛ̂ jɛrɛ na yê zɔng-reng, na yɛn a dura a yɛn begwong de yɛn ê tɔk nedetu pyɛ de ya sé haalal na yemo de ya sé ligis.

²⁴Ka sede bemat ba sê cuna e ra pyɛ cak, yɛn a rɔda ra fwom sede bemat shɔt, ko yɛn a yɛrɛ shɔt o tyɛng na Badu hom. Yɛn ê gyeng Badu hom na nu hom e ra mwa yerê nzem de ma nɔng ɛn, ko yɛn ê gyeng Negasî Shábat hom jɛrɛ arɔng.

²⁵Yɛn a kwon tɛ̀ bato mɛn ligis yi na wɔ́ bagat na revin mwat wɛt, ko mwa ano, yɛn ê tɔk tɛ̀ bato mɛn ligis e rekû da, na neng, na hwey wen kɛ hwong, kɛ gwa, kɛ gwa-hwong de a rɔngɔl nà ra weneng.

²⁶E bama de a ga to tɛ̀ tó mɛ haalal, bê bara a yɛ nepɔlɔ netaama.

²⁷E tuk de ê wɔ̀ yel e Kwɔ̂n Jɛrɛ, e lalâ ji mo na a ra fwom e ji hɛ, a rɔda nára nɔrɔ̂ fugût banɛn mɛ. Me Darwey Dagwi Darwey ma ha ano.

²⁸“Bepiris o bê vɔk pyɛ̂ nedanelɔ wɛt. Me wɛ à pyɛ̂ nedanelɔ mɛn. Yin ê nɔng ɛn benap e ji BeIsrayɛl wɛt. Me wɛ à nap mɛn.

²⁹Yɛn ê re pyɛ̂ nɔrɔ yê pyɛ̂ yeneng, na yê fugut banɛn, na yê yông buru. Ano arɔng, yɛn a rɔda sey kayɛ pyɛ de ba tik jaram yaga Dagwi e ji BeIsrayɛl.

³⁰Mwa pyɛ́ de ya dal na nerat yê bwâl mɛsɛng gwô kayɛ pyɛ cap, na kayɛ pyɛ de be nɔng nɔrɔ̂ yɛ yaga Dagwi ya sé ye bepiris o. Kayɛ jeng de bemat bé kyé kpam-tuk, yɛn ê tanga nɔ̂ng bepiris o regat o rê mɛsɛng o sede pyɛ nɔrɔ, ko nerat hom na rɔda hwo e ra nelɔ mɛn.

³¹A sé kyiri na bepiris be re kagwɛ gwonon kɛ ngyama de ya ku zɔng-reng, kɛ ngyama cak ya mɔrɔ yɛ.”