Read berom Yɛzɛkyɛl 45 Bible Online

Yɛzɛkyɛl 45 - berom bible

Yɛzɛkyɛl 45

¹Jeng de bê gas vwel o na be nɔ̂ng kayɛ yere nu mo mɛ, bak o gwining bê tik wɛ jɛrɛ yaga Dagwi Darwey. Nelis wɛ̀ nê sè lyōsho kuru ko netes o nê sè lyōsho rwit. Bak o mwa wô sè jɛrɛ yaga Dagwi.

²E ji bak wane mo, bê vɛ́ ɛ kwɔn hak de nelis o na netes o nà sé tyɛng yaga Gbɔng Duk Re Fongol. Kawɛ bak o wô sè bol naga rwit na kuru banaas. Bê gwɔrɔ wɛ na cwɛl de netes o nà sé bol kuru rwit na vɛ naas.

³E ji bak de ba tik jɛrɛ mo, hwô mara bak o hwak de nelis o nà sé lyōsho kuru ko netes o lyōsho nyaas, bê tik wɛ jɛrɛ yaga Gbɔng Duk Re Fongol.

⁴Bak o wô sè kwɔ̂n jɛrɛ hê sevwel o, wô sè wo bepiris de be ra fwom e Gbɔng Duk Re Fongol, yɛn vemo de be vɛ̀sɛ bagat na Dagwi Darwey na be ra a yɛ fwom. Kwɔn o hê sè yaga lɔk nelɔ mɛn, tanga kwɔ̂n jɛrɛ yaga Gbɔng Duk o.

⁵Bak o hwak de nelis o na sé lyōsho kuru, ko netes o lyōsho nyaas, wa rɔda sè yaga BeLevi de be ra fwom e Gbɔng Duk Re Fongol, sede nap mɛn yaga lɔk bapomo de yɛn ê sangal ɛ.

⁶Kwɔn de he raa hemo de ba tik jɛrɛ mo, e bak o wòt de nelis o nà sé lyōsho kuru, ko netes o lyōsho bya, hê sè hê mwa BeIsrayɛl.

⁷Vwel de ha sé e bak kwɔn de ba tik jɛrɛ, na hê nap repomo, hê sè hê gbɔng gwɔ̀m. Hê bɛrɛng kwɔn de ba tik jɛrɛ, na nap repomo e rwa ta na rwa rak. Nelis hɛ nê sè tyɛng na bak gwining wo bebak de ba gas a yére Israyɛl. Hê nára hɛ yi e yɛnɛ̂ kwɔn jɛrɛ e rwa ta na yi e yɛnɛ̂ kwɔn jɛrɛ e rwa rak vɔk e neyɛnɛ vwel o.

⁸Bak vwel o wô sè numo hê gwɔ̀m e vwêl Israyɛl. Begwɔ̀m bê to mɔt bemat hom wɛt, ko yɛn ê tik BeIsrayɛl be vɔk vwel o tyɛng e yére mɛn.

⁹Darwey Dagwi Darwey a ye, “Óoo à yin Begwɔ̀m Israyɛl! Mɔ̂t bemat na neves de yin e ragas ba ga vey ano! Ra in shɔt na tsak o, na necik. Tik in rô bemat hom yi e vwel mɛn. Me Darwey Dagwi Darwey ma ha ano.

¹⁰“Vɔk in pyɛ̂ mása yê tsak o — pyɛ̂ masâ nedirik, na neshǐ mása de na sé tyɛng, tanga dap arɔng.

¹¹“Kwɛ̀t masâ pyɛ́ na tsung něy, jim mɛn ya sé jining o. Bèkɛt kuru ba sé tyɛng na kwɛngɛ gwining ko betsung kuru ba sé tyɛng na kwɛngɛ gwining arɔng, ano kwɛngɛ gwô sè pyɛ masâ pyɛ́ tanga něy.

¹²“Masâ nedirik min he sè ngan arɔng: Gera kuru baba be sè tyɛng na shɛkɛl gwining ko shɛkɛl kuru batyiimin be sè tyɛng na mina gwining.”

¹³“Pyɛ̂ nɔrɔ de yin ê nɔng à yemo: Yin ê nɔng sede shǐ masa hining e ji kwɛngɛ gwining wo alkama, ko yin nɔng sede shǐ masa hining e ji kwɛngɛ gwining wo baale yaga shǐ masa tyiimin ha sé tyɛng na kwɛt.

¹⁴Yin ê nɔng sede fùs gwining e ji kwɛngɛ něy pwat, yaga bètus kuru ba sé tyɛng na tsung.

¹⁵“Yin ê nɔng tyimit jining e ji tyīmit naga beba de be gyenges e nekwɔn sehwêy Israyɛl. “Nenɔrɔ ma nemo de yin ê nɔngɔs yaga nɔrɔ̂ nemuk, na hê yas de be rangas burang, tanga hê wuna nesa, na be ra mɛ talâ-nɛn, na be fugut a yɛn mɛ banɛn mɛn. Me Darwey Dagwi Darwey ma nɔng nu ano.

¹⁶“Mwa bemât vwel o bê wuna hɛn na gbɔng gwɔ̀m e ji Israyɛl na be nára nenɔrɔ nemo.

¹⁷A sé e gbɔng gwɔ̀m o de a vɔk nedirik nɔ̂ng yas de be rangas burang, na pyɛ̂ yeneng yê nɔrɔ̂ wuna nesa, tanga nshi anap yaga nɔrɔ̂ pyɛ̂ sɔ yaga mwa yére bemat Israyɛl e jeng mwa Nzem Pwɛl Pwas, na Tuk Shábat tanga mwa negasi nzem. A rɔda nɔng yas yaga nɔrɔ̂ halâ banɛn, na he pyɛ̂ yeneng, na yas nɔrɔ de be rangas burang, tanga nɔrɔ̂ wunâ nesa na be ra mɛ talâ-nɛn yaga mwa BeIsrayɛl.”

¹⁸Darwey Dagwi Darwey a ye, “E tuk hê mɛsɛng hê pwɛl gwo susu mo, hwô nára nɔrɔ̂ bwot mus de wà vɔk ram wɛt na hwo fung mɛ Gbɔng Duk Re Fongol.

¹⁹Piris ê vɛ nemî nɔrɔ̂ halâ banɛn o, ko a tɛ̀ nɛ e ra sesêk ri Gbɔng Duk o, na e ra bato-kwɔng banaas vê gàgbang nára nɔrɔ̂ yas, tanga e ra sesêk ruhup de be yel ɛ vɔk e lala ji mo.

²⁰E tuk hê taama hê pwɛl o hwô to ra ano yaga kawɛ mwat de a ra banɛn e gawey kɛ e netɔn. Yi na ra ano, hwô ra a Gbɔng Duk o talâ-nɛn.

²¹“E tuk he kuru na hɛ naas he pwɛl gwo mɛsɛng o, yin ê hwo ra Nzem Gyilsit Nelɔ BeIsrayɛl. Nepɔlɔ netaama kawɛ mwat ê re kpam-tuk de ba yong sana géy-sing.

²²E tuk hê mɛsɛng Nzem o, gbɔng gwɔ̀m ê nára nɔrɔ̂ bwot mus yaga halâ banɛn mɛ na vê mwa bemat vwel o.

²³E kahɛ tuk e ji nepɔlɔ netaama ne nzem o, ê nɔng bebot mus betaama, na beturuk betaama, mwa yɛ sana ram, yaga nɔrɔ̂ rangas burang vɔk na Dagwi Darwey. Kahɛ tuk a rɔda nɔng nɔrɔ̂ gam gwining yaga halâ banɛn arɔng.

²⁴A rɔda to nɔng nɔrɔ pyɛ̂ yeneng kwɛt gwining yaga kawɛ mus, na kwɛt gwining yaga kawɛ turuk tanga fùs gwining gwo něy pwat yaga kagwɛ kwɛt.

²⁵“Yaga Nzem Bǔk de be pɛrɛ nɛ e tuk hê kuru na hɛ tungun he pwɛl gwo netungun, e kahɛ tuk hê nepɔlɔ netaama mo, gbɔng gwɔ̀m o a rɔda nára nɔrɔ̂ halâ banɛn na nɔrɔ̂ yas de be rangas burang tanga nɔrɔ̂ pyɛ̂ yeneng na hê něy pwat tyɛng na pyɛ de be dopse ragas.”