Read berom Yɛzɛkyɛl 47 Bible Online

Yɛzɛkyɛl 47 - berom bible

Yɛzɛkyɛl 47

¹Mwat o a to toyo na me vey e rwi Gbɔng Duk Re Fongol. Nshi ne nunus e nɛ̂n rwi mo ko ne tele vɔk e rwa rak, e bak de Gbɔng Duk o wo bɛrɛng. Nshi mo ne tele yi e nɛ̂n bak rwa batin wo Gbɔng Duk o ko na kwey e hagât rwa batîn kwɔ̂n nára a Dagwi nɔrɔ.

²Mwat o a nusu na me yi e bak Gbɔng Duk o e gwông ruhûp rwa bato ko a gwɔrɔ na me vɔk e ruhup de gwo bɛrɛng rwa rak. Kerɔt o ke tele e hagât batin hê ruhup o.

³Mwat o a hwo kyè vɔk e rwa rak na rwik e vwɔ mɛ, ko a mara yât naga betungun na kuru batyiimin (560) a raa mɛ rɔt o vɔk e rwa rak, ko a tɛ̀ me yel e ji nshi mo, ko na sé e yis-bol hom zɔng.

⁴A to mara yât naga betungun na kuru batyiimin, ko nshi mo na sé e kwot hom. A to mara yât naga betungun na kuru batyiimin ko nshi mo na sé e wit hom.

⁵A to mara yât naga betungun na kuru batyiimin gbak ko e hwomo, rɔt o ha ga tɛ́ ɛ ciwil sizɔng, ma tɔk kyè ɛ wɛt. Bê tɔk ye dɔ a hɛ wɛt sɛ̌ na dâk sefwa.

⁶A yang me, “À mwasi, hwà ga di pyɛ yerê yemo a?” Ano kwong, mwat o a toyo na me e rekwogôm rɔt o,

⁷ko jeng de ma wul hɛ, ma di batîn cɔ́gɔt pyak e kahɛ kwogom o.

⁸A yang me, “Nshi nemo ne tele e vwel o vɔk e rwa rak vɔk e nɛk Rɔt Yɔrdan pere vɔk e Gworep Nevwashe. Sede na wɔ wul gworep o, ko ne sege nshi neves gworep o na nerat o.

⁹Kahɛ kwɔn de nshi mo na tele vɔk ɛ, bê sɛ̀ nezap pyɛ́ cen na betɔk. Nshî rɔt o nê tɛ̀ nshî gworep o ne tá, ko e kahɛ kwɔn de na tele ɛ, nê vey na nezap pyɛ́ cen.

¹⁰Bemât vos betɔk bê tumsal e kwogom gworep o yi e Ɛn-Gɛdi vɔk e En-Eglayim. Kwogôm gworep o hê sè kwɔn tɛnsɛ̂ bagun mɛn. Bê sɛ̀ nezap betɔk e hwomo sede ne Gworep Tē.

¹¹“Ko nshi de nê sè e berék na bekadung e bahagât gworep o nê ta wɛt, nê nàra ano na be sɛsɛm ɛ nevwashe.

¹²E kahɛ kwogôm rɔt o yére cɔ́gɔt detidetu de ye nɔngɔs pyɛ̂ re yê ras ɛ. Berang yɛ bê sang gabsa wɛt, ko yê sang tik tɔ̂s nèy arɔng wɛt. Yê nɔngɔs nèy nepas kagwɛ pwɛl, yaga ye sɛsɛm nshi yi e rɔt de he tele yi e Kwɔn Jɛrɛ. Batîn cɔ́gɔt o bê nɔngɔs nèy de bê re, ko berang o bê sè yaga tɛ́sɛ bemat serɔ tyang.”

¹³Darwey Dagwi Darwey a ye: “Neyɛnɛ̂ vwel de hwô gas a yére Israyɛl kuru na yɛ bya na he sè benap mɛn à hemo. Yɔsɛf ê vɔk bebak o beba.

¹⁴Hwô gas vwel o tyɛng. Mà kana sira na me nɔ̂ng bedabeda min hɛ, ko ha rɔda sè pyɛ̂ nedanelɔ min.

¹⁵“Yɛnɛ̂ sevwel a hemo: Yɛnɛ mo yi e rwa bato hê kyè vɔk e rwa rak yi e Gworep Tē vɔk e repomô Hɛtlɔn, vɔk e Vwak Hamat, vɔk e repomô Zedat,

¹⁶vɔk e bapomô Bɛrɔta na Sibrayim de ba sé e tê yɛnɛ̂ vwêl segwɔm Damaskus na hê Hamat, tanga vɔk e repomô Hazɛr-hatikɔn de ha sé e yɛnɛ̂ bak vwêl Hauran.

¹⁷Yɛnɛ mo hê raa yi e gworep vɔk e pomô Hazɛr-ɛnɔn de ha sé e rwa bato na yɛnɛ̂ vwel Damaskus, ko he hala pomô Hamat e rwa bato. Hemo hɛ à yɛnɛ mo hê rwa bato.

¹⁸“Neyɛnɛ mo nè rwa rak nà raa rwa batin yi e dem de ha sé e tê yɛnɛ̂ vwêl Damaskus na hê Hauran, ko nà raa Rɔt Yɔrdan de ha gas yɛnɛ̂ bavwêl Israyɛl e rwa ta na Gileyat e rwa rak, pere vɔk e Gworep Nevwashe vɔk e Tamar. Hemo hɛ à yɛnɛ mo hê rwa rak.

¹⁹“Yɛnɛ mo hê rwa batin ha kyè e rwa batin yi e Tamar vɔk e kwɔ̂n nshî Meribat-Kadesh ko ha raa nɛk Misra, vɔk e Gworep Tē. Hemo hɛ à yɛnɛ mo hê rwa batin.

²⁰“Yɛnɛ mo he rwa ta ha yi e Gworep Tē ko ha kyè vɔk e rwa bato vɔk e dem hak de ha sé e rwa ta hê Vwak Hamat.

²¹“Ano de hwô gas a yére Israyɛl sevwel o e bato mɛn.

²²Hwô gas hɛ na he sè benap min, tanga bemat yére dyuk de ba sé sangal na yin, ko ba ga tɔs nèy e vwel o, bê sɛ̀ numo mɛn hê vwel o jeng de yin ê gas hɛ. Yin ê tē na yɛn tyɛng sede nèy tɔ̂ Israyɛl, ko yɛn ê sɛ̀ numo mɛn na masâ sesek sede nèy Israyɛl arɔng.

²³Kawɛ mwât yere dyuk a rɔda sɛ̀ numo mɛ e ji BeIsrayɛl de a sé sangal na yɛn. Me Darwey Dagwi Darwey ma ha ano.”