Read berom Yɛzɛkyɛl 48 Bible Online

Yɛzɛkyɛl 48 - berom bible

Yɛzɛkyɛl 48

¹Bazâ yére Israyɛl ma vemo. Bak vwel o wo Dan wa sé yi e yɛnɛ̂ rwa bato wo Gworep Tē. Wa kwey e Hɛtlɔn vɔk e rwi Hamat, pere vɔk e Hazar-ɛnɔn de wa sé e yɛnɛ̂ vwêl Damaskus yi e rwa bato e hagât Hamat, ko wa peres yi e rwa rak vɔk e rwa ta.

²Bak o wo Ashɛr wa sé e hagât bak o wo Dan yi e rwa rak vɔk e rwa ta.

³Bak o wo Naftali wa sé e hagât wo Ashɛr yi e rwa rak vɔk e rwa ta.

⁴Bak o wo Manase wa sé e hagât wo Naftali yi e rwa rak vɔk e rwa ta.

⁵Bak o wo Ɛfrayim wa sé e hagât wo Manase yi e rwa rak vɔk e rwa ta.

⁶Bak o wo Rubɛn wa sé e hagât wo Ɛfrayim yi e rwa rak vɔk e rwa ta.

⁷Bak o wo Yuda wa sé e hagât wo Rubɛn yi e rwa rak vɔk rwa ta.

⁸Bak o wo hagât Yuda yi e rwa rak vɔk e rwa ta wô sè womo de hwô tik wɛ jaram. Netês wɛ yi e rwa bato vɔk e rwa batin nê sè lyōsho kuru ko nelis o yi e rwa rak vɔk e rwa ta nê sè tyɛng sede bebak o de ba ga nɔ̂ng yerê Israyɛl. Bê tɛ̀ Gbɔng Duk Re Fongol e tê wɛ.

⁹E tê bak womo mo, bê jut bak o de nelis o na sé lyōsho kuru, ko netes o lyōsho rwit be nára a Dagwi Darwey wɛ.

¹⁰Bepiris bê vɔk bak kwɔn de ba tik jɛrɛ yaga Dagwi. Yi e rwa rak vɔk e rwa ta nelis wɛ nê sè lyōsho kuru ko yi e rwa bato vɔk e rwa batin netes o nê sè lyōsho nyaas. Bê lɔk Gbɔng Duk Re Fongol Dagwi Darwey e tê kwɔn o.

¹¹Kwɔn de ba tik jɛrɛ hê sè yaga bepiris de ba sé yi e yerê Zadɔk. Yɛn á ra a Dagwi fwom na tsak o, ko yɛn á raa bwang BeIsrayɛl e de ragas neves sede remo de bwang yerê Levi ya ra wɛt.

¹²Kwɔn o hê sè mɛn yi e bak de ba tik jɛrɛ, hê dal mwa na nejɛrɛ, ko hê se e hagât hê BeLevi.

¹³E hagât kwɔ̂n bepiris, bê nɔ̂ng BeLevi bak o hwak e rwa batin. Nelîs kwɔn o nê sè lyōsho kuru yi e rwa rak vɔk e rwa ta, ko netes o lyōsho nyaas yi e rwa rak vɔk e rwa ta.

¹⁴Bak vwel de ba nára a Dagwi Darwey wɛ mo, wa dal bwang o mwa na nerat, ko bê tɔk row wɛ, kɛ be sege wɛ, kɛ be nɔ̂ng mwat hwak wɛ ko tyɔng wɛt. Wa sé jɛrɛ ko wa sé wo Dagwi Darwey.

¹⁵Bak de wa pɔl, wo kwɔn de ba tik jaram de nelis o na sé lyōsho kuru ko netes o lyōsho bya wa sé jɛrɛ wɛt, ko bemat bê tɔk ra fwom na wɛ. Yɛn ê tɔk sangal e ji wɛ na be ra fwom na vwel o. Gbɔng repomo mo rê sè e tê wɛ,

¹⁶ko nelis na netês rɛ bê sè tyɛng wɔgɔ, yât gu baba naga betungun na kuru baba (2,520) e kawɛ bak.

¹⁷Bê vɔk tyɛl de ya gwɔrɔ gbɔng repomo mo, yê sè yât naga na kuru banaas e kawɛ bak.

¹⁸Bama de ba ga lɔk gbɔng repomo mo, bwang vwel de ha pɔl e rwa batîn kwɔ̂n jɛrɛ mo, nelis o na sé lyōsho nyaas, ko netes o lyōsho bya e rwa rak, ko na to sé tyɛng ano e rwa ta, ba vɛ cāp na wɛ yaga pyɛ̂ re.

¹⁹Bemât fwôm gbɔng repomo mo yi e kayɛ yerê Israyɛl ba how cāp o.

²⁰Yi ano, mwa nepyak kwɔn de ba tik jɛrɛ e tē, nelis o na netes o na sé tyɛng, nà sé lyōsho kuru e kawɛ bak, nà wuna mwa na bak de ba lɔk ɛ gbɔng repomo mo.

²¹Bwang pyɛ de ya pɔl e bahagât kwɔn de ba tik jɛrɛ, na kwɔn gbɔng repomo, yê sè ye gbɔng gwɔ̀m. Yê yi e lyōsho kuru yê kwɔn de ba tik jɛrɛ, vɔk e yɛnɛ vwel o e rwa rak, yi e lyōsho kuru mo arɔng vɔk e yɛnɛ vwel o e rwa ta, ye bɛrɛng bak o wo yére Israyɛl, yê se ye gbɔng gwɔ̀m. Bak de ba tik jɛrɛ mo tanga kwɔ̂n jɛrɛ hê Gbɔng Duk Re Fongol bê sè e tê hɛ.

²²Bak o wo BeLevi na wo gbɔng repomo, wô sè e tê wo gbɔng gwɔ̀m. Bak o wo gbɔng gwɔ̀m wô sè e tê bak o wo Yuda e rwa bato na bak o wo Bɛnyamin e rwa batin.

²³“Bwang yére yê sɛ̀ bebak o bemɛn arɔng. Bak vwel o wo Bɛnyamin wa sé yi e rwa rak vɔk e rwa ta.

²⁴Bak o wo Simɛyɔn wa sé e hagât wo Bɛnyamin yi e rwa rak vɔk e rwa ta.

²⁵Bak o wo Isakar wa sé e hagât wo Simɛyɔn yi e rwa rak vɔk e rwa ta.

²⁶Bak o wo Zɛbulun wa sé e hagât wo Simɛyɔn yi e rwa rak vɔk e rwa ta.

²⁷Bak o wo Gat wa sé e hagât wo Zɛbulun yi e rwa rak vɔk e rwa ta.

²⁸“Bagat na bak o wo Gat vɔk e rwa batin, yɛnɛ mo ha raa yi e Tamar vɔk e nshî Meribat-Kadesh, yi e hwomo nà raa nɛk Misra vɔk e Gworep Tē.

²⁹Vwel á hemo de hwô gas a yére Israyɛl na he sè benap mɛn, bebak o bemɛn à vemo. Me Darwey Dagwi Darwey ma ha ano.”

³⁰“Rùhup núnus yi e gbɔng repomo ma vemo: E hagât rwa bato de nelis o na sé yât gu baba naga betungun na kuru baba (2,520),

³¹ha vɔk rùhup tat — vɛ à Ruhup Rubɛn, na Ruhup Yuda tanga Ruhup Levi, ba vos a rùhup o bazâ yére Israyɛl.

³²E hagât rwa rak de nelis o na sé yât gu baba naga betungun na kuru baba (2,520) ha vɔk rùhup tat — vɛ à Ruhup Yɔsɛf, na Ruhup Bɛnyamin tanga Ruhup Dan.

³³E hagât rwa batin de nelis o na sé yât gu baba naga betungun na kuru baba (2,520), ha vɔk ruhup tat — vɛ à Ruhup Simɛyɔn, na Ruhup Isakar tanga Ruhup Zɛbulun.

³⁴E hagât rwa ta de nelis o na sé yât gu baba naga betungun na kuru baba (2,520) na vɔk rùhup tat — vɛ à Ruhup Gat, na Ruhup Ashɛr tanga Ruhup Naftali.

³⁵“Nelîs jwâ gbɔng repomo mo e rǎ gùl naas o na sé mwa yât gu kuru, na kuru rwit (10,080). Yi e ngamo nuyel bê yila gbɔng repomo mo à, ‘Dagwi Darwey a sé e Ngamo!’ ”