Read berom Yɛzɛkyɛl 5 Bible Online

Yɛzɛkyɛl 5 - berom bible

Yɛzɛkyɛl 5

¹Dagwi Darwey a ye, “À mwasi, jut wal de wa sé vootot, ra fwom na wɛ sede bâ hwon, na hwo wula mɛ to mo tanga negyɛk mo. Jut pyɛ masa nedirik na hwo gas mɛ tot o zang tat.

²Rangas bak o gwining na kya e tê gbɔng repomo mó, e bama de ba ga yɛnɛ gwɔrɔ rɛ na como. Jut bak o wo neba na hwo kyě kpɔgɔm wɛ na wal o, hwo rɔnɔ mɛ repomo mo. Jut bak o wo netat hwo waram na gul gwo kyè mɛ, ko mê hwɔltɔ wal o yi e fwal o na me ro ɛn mɛ.

³Hwô vɛ tot o tyɔng, hwo rɔgɔs e nû rugu mo.

⁴Yi e tot de ha sé tyɔng o, vɛ hak, bomo hɛ e kya na hwo rangas hɛ. Yi e hɛ de kya hê shara hɛ vɔk e mwa nelɔ BeIsrayɛl.”

⁵Darwey Dagwi Darwey a ye, “Womo wɛ à Yɛrusalɛm. Ma tɛ̀ wɛ e tê yére bemat jey, ko bwang bavwel ba gwɔrɔ wɛ.

⁶Ko bemat Yɛrusalɛm ba sogo a me nehywɛ e ra Badu, na nu de ma nɔng. Yɛn a dal yére bemat jey na mwa bavwel de ba gwɔrɔ wɛ na neves. Yɛn a ye zak à Badu hom, ko yɛn a kyɛ́ ɛn nà raa nu hom.

⁷Yaga ano, Darwey Dagwi Darwey a ye, Yaga yin a dal bwang yére bemat jey de ya gwɔrɔ hin na sogo nehywɛ, ko yin a kyɛ́ in nà raa Badu hom, kɛ yin a gyeng nu de ma nɔng in, ko yin a ra pyɛ́ tyɛng na badu yére bemat jey de ya gwɔrɔ hin,

⁸ko di, me Darwey Dagwi Darwey ma ye, Me pyɛ hom, ma sé kyè vey hwo e ra hwo. Mê yɛrɛ a hwo shɔt e bɛrɛng yére bemat jey.

⁹Yaga mwa tomong min ve byɛm-byɛm, mê ra a hwo pyɛ de ma ga sang ra wɛt, ko mê sang to ra arɔng wɛt.

¹⁰Beda bê re banama nèy mɛn e tē min, ko nèy nê re vê beda mɛn arɔng. Mê yɛ́t a yin shɔ̄t, ko bwang min de ba dal, mê shara hin e kagwɛ rwa gul.”

¹¹Yaga ano, Darwey Dagwi Darwey a sira, a ye, “Mwin, a remo de yin a ga tɛ̀ kwɔn re fongol hom ligis na mwa pyɛ́ de ma kyɛ́ me zakzak, tanga pyɛ̂ byɛm-byɛm min, mê gas me na yin, mê to di in na bayis hom wɛt, ko mê wok nemwishish min wɛt.

¹²Bak gwining e ji betat min wô kushu na tumbang, kɛ vyong yê ré ɛn, e tē min, bak wo neba wô wey na wal como e tē min, ko bak wo netat, mê shara e gul vɔk e kagwa, ko mê kyě ro ɛn na wal de ma ga hwɔltɔ.

¹³“Yi ano, shom hom yê ye rɔ̀s, ko lashe yey hom e ra yɛn hê dyɛng sɛ̌ a to yang me wɛ́kwɛk, ko yɛn ê tɔk, me Dagwi Darwey ma ga ha e ji repugu hom, jeng de ma ye rɔ̀s à lashe yey hom e ra yɛn.

¹⁴Ano arɔng, mê tɛ̀ yin a sè sede barin, na pyɛ sedusa e tê yére bemat jey de ya gwɔrɔ hin, tanga na e bayis mwa bemat de be kweres.

¹⁵“Yin ê se pyɛ sedusa, na ye seshɛgɛsh, na ye tusa, na ye neves na yére bemat jey de ya gwɔrɔ hin, jeng de ma yɛt a yin shɔ̄t e ji shom na lashe yey hom, na tabak de ha sé siitit. Me Dagwi Darwey ma ha ano.

¹⁶Ko di mê tɛ̀ vyong vyes ye hwo e ra yin sede ba tabas hin na ket de ma tabas hin mɛ, yaga na bè wey na yin. Jeng de mê gwɛ̌ vey na vyong e ra yin, mê dul begwong vɛ́sɛ a yin na pyɛ́.

¹⁷Mê tomo na vyong, na ngyāma e ra yin, ko yê wey na nèy min. Ano arɔng, tumbang na lusha nemi bê kyè e ra yin. Mê vey na wal como e ra yin arɔng. Me Dagwi Darwey ma ha ano.”